100 trak, bumalagbag sa Maynila vs. taas-toll fee ng NLEX

ni Mylene Alfonso @News | July 22, 2023

Nagkakaroon ng mahigpit na daloy ng trapiko matapos na magsagawa ng "caravan protest" ang grupo ng truckers sa Bonigavio Drive kahapon ng umaga sa Port Area, Maynila.

Nagsimula ang protesta, alas-7 ng umaga sa Anda Circle kung saan tinututulan ng mga truck company ang ipinatutupad na toll hike increase sa North Luzon Expressway.

Umabot sa 100 trak o dalawang kilometro ang haba ng isinagawang protesta malapit sa Manila North Harbour hanggang sa Anda Circle.

Balak din ng grupo na ibalagbag ang kanilang mga truck sa bukana ng NLEX upang ipakita ang kanilang pagtutol.

Nabatid sa Central Luzon Alliance of Concerned Truck Owners Organization (ACTOO) na naging epektibo ang toll hike noong Hunyo 15.

Umaabot umano sa P19 hanggang P100 ang ipinatutupad na taas- singil sa toll fee.

Mula Dis. 6... Truck ban uli sa Valenzuela

ni Lolet Abania | December 5, 2021

Simula sa Lunes, Disyembre 6, muling ipapatupad ng lokal na pamahalaan ng Valenzuela ang truck ban sa mga sakop na pangunahing kalsada ng lungsod sa partikular na oras kada araw, mula Lunes hanggang Sabado.

Sa ulat, ang truck ban hours ay ipapatupad mula alas-6 ng umaga hanggang alas-10 ng umaga at alas-5 ng hapon hanggang alas-10 ng gabi.

Kabilang sa sakop ng ban ang mga pangunahing kalsada at kalye gaya ng McArthur Highway, M.H. del Pilar Street, Governor Santiago Road, P. Santiago Street, Paso de Blas, Maysan Road, General P. De Leon, East Service Road mula Karuhatan up to NLEX, Que Grande, A. Mariano, Tatalong Ugong, Sapang Bakaw, General Luis, at Galas Bignay Exit.

Samantala, ang truck ban hours naman mula Bisig Road hanggang Tagalag Road ay mula alas-6 ng umaga hanggang alas-10 ng umaga at alas-3 ng hapon hanggang alas-10 ng hapon.

Batay pa sa city ordinance, bawal ang mga truck na may timbang o bigat na 4,500 kilograms at pataas.

Truck, bawal na uli

ni Lolet Abania | May 14, 2021

Muling ibabalik ang ipinatutupad na truck ban sa mga pangunahing lansangan sa National Capital Region (NCR) simula sa Lunes, May 17, batay sa anunsiyo ng Metropolitan Manila Development Authority (MMDA).

Ayon sa MMDA, ang mga trak ay bawal dumaan sa mga pangunahing lansangan mula alas-6:00 hanggang alas-10:00 ng umaga at mula alas-5:00 ng hapon hanggang alas-10:00 ng gabi, tuwing Lunes hanggang Sabado.

Kaugnay nito, isang total truck ban naman ang ipatutupad sa kahabaan ng EDSA, magmula Magallanes Interchange sa Makati City hanggang North Avenue sa Quezon City.

Ito ay isasagawa ng 24 oras mula Lunes hanggang Linggo.

“[T]rucks carrying perishable and agricultural foodstuffs are exempted from the ban,” pahayag ng MMDA.

Ayon pa sa ahensiya, ito ay bilang pagsunod sa ipinatutupad na general community quarantine (GCQ) sa NCR at karatig probinsiya ng Bulacan, Rizal, Cavite, at Laguna.

Ang GCQ "with heightened restrictions" ay magsisimula ng May 15 hanggang May 31.