Mula sa India lang ang bawal… Lahat ng papasok sa 'Pinas, puwede na!

ni Ronalyn Seminiano Reonico | April 30, 2021

Aalisin na ang entry ban sa Pilipinas para sa mga banyaga maliban sa mga galing sa India at sa mga may travel history sa naturang bansa, ayon sa Malacañang ngayong Biyernes.

Ayon kay Presidential Spokesperson Harry Roque, inaprubahan ng Inter-Agency Task Force (IATF) ang pagpasok ng mga foreign nationals sa bansa simula sa May 1.

Sa ilalim ng Resolution No. 113, nakasaad ang mga kondisyon sa pagpapapasok ng mga banyaga sa bansa at ito ay ang mga sumusunod:

Una, dapat ay mayroon silang valid at existing visa sa oras ng pagpasok sa bansa maliban sa mga nasa ilalim ng Balikbayan Program. Kailangan ding may “pre-booked accommodation for at least seven nights in an accredited quarantine hotel/facility.”

Kailangan ding sumailalim ng mga dayuhan sa COVID-19 testing sa quarantine hotel/facility sa ikaanim na araw ng pagdating sa bansa.

Samantala, noong Marso 22, nagpatupad ng travel restrictions sa Pilipinas sa mga banyaga dahil sa patuloy na pagtaas ng kaso ng COVID-19. Nilinaw naman ng Palasyo na mananatili ang travel ban sa mga galing sa India.

Saad ni Roque, “All passengers coming from India or those with travel history to India within the last 14 days preceding arrival shall not be allowed to enter the Philippines starting April 29, 2021 until May 14, 2021.

“The Commissioner of Immigration shall have the exclusive prerogative to decide on the waiver or recall of exclusion orders of foreign nationals.”

Mga galing sa India, bawal sa ‘Pinas

ni Ronalyn Seminiano Reonico | April 27, 2021

Magpapatupad na ng travel ban sa bansa sa mga galing sa India simula sa April 29 hanggang May 14 dahil sa patuloy na paglobo ng kaso ng COVID-19, ayon sa Malacañang ngayong Martes.

Ayon kay Presidential Spokesperson Harry Roque, sakop din sa naturang restriksiyon ang mga Pinoy na manggagaling sa India at ang mga mayroong travel history sa naturang bansa sa loob ng 14 na araw.

Pahayag ni Roque, “Inaprubahan ng ating Presidente ang rekomendasyon ng IATF na i-ban ang lahat ng pasahero, kasama ang mga Pilipino na galing sa India.”

Hindi naman umano kasama sa travel ban ang mga pasahero na nakalabas na sa India at ang mga mayroong travel history sa nasabing bansa na dumating sa Pilipinas bago mag-April 29.

1,300 OFWs apektado ng 2-week travel ban sa Hong Kong

ni Ronalyn Seminiano Reonico | April 19, 2021

Aabot sa 1,300 overseas Filipino workers (OFWs) ang maaapektuhan ng 2 linggong travel ban sa Hong Kong dahil sa bagong COVID-19 strain, ayon sa Philippine Overseas Employment Administration (POEA).

Ayon kay POEA Administrator Bernard Olalia, kalahati ng 2,600 manggagawa na nakatakdang pumunta sa Hong Kong ang maaapektuhan ng naturang travel restriction.

Simula bukas, April 20, isususpinde nang dalawang linggo ang mga flights papuntang Hong Kong mula sa India, Pakistan at Pilipinas dahil sa na-detect na N501Y mutant COVID-19 strain.

Pahayag ni Olalia, “Magkakaroon ng dalawang linggo na temporary suspension of deployment dahil nga sarado ‘yung kanilang border dahil sa pandemya.

“So kalahati ng 2,600 ay hindi makakaalis. More or less nasa 1,300 ang apektado roon sa pagpunta sa bansang Hong Kong.”

Nilinaw din ni Olalia na tuloy pa rin ang pagpoproseso at issuance ng Overseas Employment Certifications (OECs) sa kabila ng ipinatupad na travel ban.

Aniya. "Kahit may border closure or temporary suspension of flights, ang ating POLO (Philippine Overseas Labor and Office), POEA ay patuloy sa pagpoproseso ng documents.

"Ibig sabihin, ang POLO, tuloy po ‘yan. Ang accreditation sa POEA, tuloy po ‘yan, kasi may 60 days na validity period ang OEC, so kahit may temporary suspension, mag-aantay sila ‘pag na-lift iyon. Kapag na-lift in two weeks' time, valid pa rin ‘yung OEC na na-issue.”

Ayon din kay Olalia, kailangang makipag-ugnayan sa private recruitment agencies ang mga maaapektuhang OFWs.

Aniya, "Ang private recruitment agency, sila po ang may coordination sa stranded OFWs. May 2016 rules na kung saan in-amend at pinalawig natin ‘yung tinatawag na monitoring at assistance sa OFWs to include ‘yung ating mga stranded.”