Apela sa DOTr: PUV Modernization Program, stop

ni Jenny Rose Albason @News | October 10, 2023

Umapela si Senador Grace Poe sa Department of Transportation (DOTr) na suspendihin ang pagpapatupad ng Public Utility Vehicle Modernization Program (PUVMP) sa gitna ng mga alegasyon ng mga katiwalian sa Land Transportation Franchising and Regulatory Board (LTFRB.)

Ayon kay Poe, chairman ng Senate Public Services Committee, dapat suspendihin ang PUVMP hangga't hindi nareresolba ang lahat ng isyu na nauugnay dito.

"We want to modernize our PUVs, but it should be one that is progressive, just and humane," ani Poe.

"Hindi na nga makausad nang maayos ang PUVMP dahil sa iba't ibang isyu, nabahiran pa ng korapsyon,"wika pa niya.

Giit pa ng senadora, dapat umanong panagutin ang ng mga nagkasalang opisyal partikular na sa napakakritikal na programa ng sektor ng transportasyon.

"Umaasa tayo na habang iniimbestigahan ang mga sangkot, inaayos din ang modernization program na magpapabuti sa kabuhayan ng mga drayber at magbibigay ng maayos na serbisyo sa mga commuter," pagtatapos ni Poe.

Kaugnay nito, sinuspinde ni Pangulong Ferdinand Marcos Jr., si LTFRB Chairman Teofilo Guadiz III dahil sa mga ulat ng umano'y katiwalian sa loob ng nasabing ahensya.

Una nang ibinunyag ni Jeff Tumbado, dating head executive assistant ni Guadiz III ang sinasabing korapsyon sa loob ng ahensya kung saan umaabot umano hanggang sa Palasyo.

Ayon kay Tumbado, umabOt umano sa P5 milyon ang sinasabing 'lagayan' para makakuha ng pabor sa LTFRB kabilang umano ang "Ruta for Sale", "Special Permit for Sale" at "Modification of Route".

Solusyon sa taas-presyo.. Oil Deregulation Law at excise tax sa langis, ibasura — Tsuper

ni Mai Ancheta @News | August 20, 2023

Hindi dagdag-pasahe ang hirit ng ilang transport groups sa sunud-sunod na taas-presyo sa produktong petrolyo kundi ang ibasura ang Oil Deregulation Law at excise tax sa langis.

Ito ang panawagan ng grupong Manibela at Pinagkaisang Samahan ng mga Tsuper at Operator Nationwide o PISTON upang mabawasan ang pagdurusa ng transport sector sa pagtaas ng presyo ng petrolyo.

Sinabi ni Manibela President Mar Valbuena na kapag ibinasura ang Oil Deregulation Law at excise tax sa langis ay gagaan ang kanilang pasanin dahil magkakaroon na ng kontrol sa presyuhan ng langis.

Hindi aniya tulad ngayon na walang habas sa pagtataas ng presyo ang mga kumpanya dahil walang nagre-regulate sa presyuhan nito.

Ayon naman kay Piston National President Mody Floranda, halos P250 ang nawawala sa

kita nila araw-araw dahil sa mataas na presyo ng langis at kung susumahin ito sa loob ng 25 araw ay halos P7K ang nawawalang kita sa kanila.

Sa SONA — LTFRB.. Bawi-prangkisa sa tigil-pasada

ni Mai Ancheta @News | July 16, 2023

Nagbabala ang Land Transportation Franchising and Regulatory Board (LTFRB) na babawian ng prangkisa ang mga lalahok sa tatlong araw na tigil-pasada upang tapatan ang ikalawang State of the Nation Address (SONA) ni Pangulong Ferdinand Marcos, Jr. sa July 24.

Ayon kay LTFRB Chief Teofilo Guadiz III, may obligasyon ang mga operator ng public utility jeepney bilang franchise holder na huwag ilagay sa alanganin na sitwasyon ang mga pasahero o ang pampublikong transportasyon.

Ang tatlong araw na tigil-pasada ay inianunsyo ng grupong MANIBELA nitong nakalipas na linggo upang ipakita umano sa kasalukuyang administrasyon ang kanilang pagkadismaya sa isinusulong na modernisasyon sa mga pampublikong sasakyan.

Tiniyak naman ng LTFRB Chief na hindi maaapektuhan ang mga pasahero sa ikinakasang tatlong araw na tigil-pasada dahil hindi sasali sa kilos-protesta ang "Magnificent 7" na mas maraming miyembro kumpara sa grupong MANIBELA.

Kabilang sa mga grupong nagpahayag na hindi sasali sa tatlong araw na transport strike ang Pasang Masda, ALTODAP, PISTON, ACTO, FEJODAP, Stop and Go at LTOP.

Sinabi rin ni Guadiz na magde-deploy ang ahensya ng mga libreng sakay sakaling may mga pasaherong maapektuhan ng tigil-pasada sa July 24, 25 at 26.