Kawawa ang mga komyuter — P-BBM.. 1 week na tigil-pasada, huwag ituloy

ni Mylene Alfonso | March 2, 2023

Umapela si Pangulong Ferdinand “Bongbong” Marcos, Jr., sa transport group na irekonsidera ang kanilang nakaplanong isang linggong protesta kasabay ng pagtiyak

na pag-aaralan pa rin ng pamahalaan ang public utility vehicle (PUV) Modernization Program.

“I’m hoping na dito sa mga initiatives na iniisip natin eh makumbinsi naman natin ang mga transport groups na huwag na muna mag-strike dahil kawawa talaga ang mga tao at marami pang naghihirap at mas lalo pang maghihirap ‘pag hindi makapasok sa trabaho,” pahayag ni Marcos sa isang panayam sa Rizal Park sa Maynila.

Inamin ni Marcos na bagama’t kailangan na ang modernisasyon ng mga PUV, hindi pa sapat ang pagpapatupad ng programa at magsasagawa pa ang gobyerno ng karagdagang pag-aaral tungkol sa nasabing isyu.

“Sa issue ng modernization, sa aking palagay, ay kailangan ding gawin talaga ‘yan. Ngunit sa pag-aaral ko, parang hindi naging maganda ang implementasyon nu’ng modernization program,” wika ng Pangulo.

“Tingnan natin. Siguro kaya nating kausapin ang mga transport groups at sabihin natin, “Hindi babaguhin talaga naming para hindi masyadong mabigat sa bulsa ng bawat isa”, ayon pa kay Marcos.

Iminungkahi din niya na siyasatin ang mga tradisyunal na PUV kung magagamit pa ito at nasa maayos na kondisyon sa kabila ng kanilang edad.

“Dapat ang puwedeng gawin ay ins-peksyunin ang mga vehicles. May mga luma naman na maganda pa rin, eh. May luma naman na pwede pang gamitin,”

sambit ng Pangulo.

“Just because five years old, or 10 years old, hindi na pwede. Tingnan natin ‘yung condition. Kung magandang mag-alaga ‘yung driver, maganda ‘yung jeep niya, pwede pang gamitin ‘yan, safe pa naman,” aniya pa.

Dagdag ni Marcos na ang modernization program ay kailangang ipatupad “sa ibang paraan,” dahil ito ang unang hakbang sa paglipat sa mga electric vehicles.

“So siguro we will eventually move there pero kailangan pa rin nating ayusin ang supply ng renewables kasi ang sinasabi ng mga nag-aaral kung talagang para sa

climate change ‘yan, kahit na mag-electric vehicle ka, magtsa-charge ka, ‘yung kuryente galing din sa coal-fired plant, ‘di ganoon din, walang nagbago. Nilipat mo lang ‘yung pollution nang kaunti so that’s an improvement but that’s not — doesn’t help climate change. That’s why kailangan pag-aralan natin ang timetable, hindi ganoon kasimple,” paliwanag ni Marcos.

“Ito’y nakita namin sa pag-uusap natin sa mga car manufacturers na sinasabi nila — kasi nag-e-encourage tayo ng electric vehicles. Sabi nila puwede tayong gumawa ng electric vehicles pero aayusin niyo muna ‘yung source of power. So ganoon ang mga issue diyan sa modernization na hinaharap ng mga ating public utility vehicles,” hirit ng Punong Ehekutibo.

Resbak sa PUV modernization program.. Marso 6-12, tigil-pasada

ni BRT | February 28, 2023

May ikinakasang isang linggong tigil-pasada ang ilang grupo ng mga jeepney at UV Express operator bilang pagtutol sa Public Utility Vehicle (PUV) Modernization Program ng gobyerno.

Inaasahang mula Marso 6 hanggang 12 ang ikakasang tigil-pasada ng mga jeep at UV Express na kasapi ng mga grupong Alliance of Concerned Transport Organizations, Manibela at Piston.

Nasa 40,000 units ang inaasahang makikiisa sa Metro Manila na sakop ang lahat ng ruta.

Ang nasabing tigil-pasada ang sagot umano ng mga grupo sa pagbibigay ng Land Transportation Franchising and Regulatory Board (LTFRB) ng deadline na Hunyo 30 sa mga operator na hindi pa nakasunod sa industry consolidation.

Bahagi ito ng PUV Modernization Program, kung saan kailangang maging kasapi ng kooperatiba o korporasyon ang mga operator at driver.

Kung hindi makapag-consolidate o kahit pending application hanggang Hunyo 30, mapapaso ang provisional authority ng mga tsuper at hindi makakapamasada.

Una nang sinabi ng LTFRB na hindi agad patitigiling pumasada ang mga tradisyunal na jeep basta susunod sa industry consolidation.

Gayunman, ang mismong pagsali sa mga kooperatiba ang kinukuwestiyon ng mga operator, bukod pa sa gastos sa pagpapalit sa modern jeep na nagkakahalagang higit P2 milyon kada unit.

Samantala, balak din ng ilang transport group na magsampa ng temporary restraining order laban sa PUV Modernization Program.

Hindi pa nagbibigay ng pahayag ang LTFRB at Department of Transportation (DOTr) hinggil sa planong tigil-pasada.

Libreng sakay sa EDSA Carousel, extended; free train ride sa estudyante, aprub — P-BBM

ni Lolet Abania | July 1, 2022

Inaprubahan ni Pangulong Ferdinand “Bongbong” Marcos, Jr. ngayong Biyernes, ang extension ng libreng sakay sa EDSA Bus Carousel at libreng sakay naman para sa mga estudyante sa mga train sa Metro Manila at ang Philippine National Railways (PNR), batay sa anunsiyo ng Department of Transportation.

Ayon sa DOTr, ang free rides sa EDSA Bus Carousel ay pinalawig ng hanggang Disyembre 2022, habang free train rides para sa mga estudyanteng sasakay sa Metro Rail Transit Line 3 (MRT3), Light Rail Transit Line 2 (LRT2), at PNR na mula Agosto 22 hanggang Nobyembre 4, 2022.

Base sa isang bahagi ng DOTr memorandum na inaprubahan ni Pangulong Marcos, sinabi ng ahensiya na kinonsidera rito ang availability ng budget para sa Service Contracting sa ilalim ng 2022 General Appropriations Act sa pagpapalawig ng free bus rides.

Ginawa ito, ayon sa DOTr, “[to] ease the burden of rising living expenses on Filipino families and help them save money, especially with the return of face-to-face classes after more than two years.”

Habang tinapos na ng gobyerno nitong Hunyo 30, ang libreng sakay sa mga pasahero maliban sa mga estudyante sa MRT3, sinabi ng DOTr na inirekomenda nila ang free rides para sa mge estudyante sa MRT3, LRT2, at PNR bilang konsiderasyon na rin sa kapakanan ng mga ito na ani ahensiya, “whose learning outcomes have been disproportionately affected by the pandemic.”

Kaugnay nito, ayon sa Department of Education, tinatayang nasa mahigit sa 38,000 paaralan sa bansa ang nakatakda nang mag-resume para sa face-to-face classes sa School Year 2022-2023.