25K miyembro ng Manibela, join sa tigil-pasada

ni Gela Fernando @News | June 8, 2024

Nagpahayag ang samahan ng transportasyon na Samahang Manibela Mananakay at Nagkaisang Terminal ng Transportasyon (Manibela) nitong Sabado na aabot sa 25k miyembro nila ang sasali sa 3-araw na protesta na gaganapin sa Lunes.

"'Eto po kasing NCR (National Capital Region) ang pinaka concentration ng protesta at tigil pasada. Dito pa lang po hindi na bababa ng 25,000," saad ni Manibela pres. Mar Valbuena. Dagdag ni Valbuena, Makati at Mandaluyong lang ang hindi maaapektuhang lugar sa NCR.

"Sa mga mahal naming mananakay, sana maunawaan ninyo na mahirap din eto. Hindi lang sa pagsakay ninyo, apektado yung kabuhayan din namin ng tatlong araw," mensahe ni Valbuena sa mga komyuter.

Nanawagan din siya sa kanyang mga miyembro na iwasan ang anumang gusot sa mga otoridad habang isinasagawa ang rally.

3K dagdag-trabaho sa bagong railway project

ni Mylene Alfonso @News | July 14, 2023

Inaasahan ni Pangulong Ferdinand Marcos, Jr., na makalilikha ng 3,000 bagong trabaho at pakikinabangan ng 800,000 mananakay kada araw sa sandaling matapos ang pagpapatayo ng South Commuter Railway Project (SCRP) sa taong 2029.

Ang SCRP ay bahagi ng North-South Commuter Railway (NSCR) System, isang major railway project na nag-uugnay mula sa Pampanga, Bulacan, Metro Manila at Laguna.

“I am also happy to note that we are anticipating the generation of approximately 3,000 jobs once civil works for these sections begin,” wika ni Marcos sa kanyang talumpati makaraang saksihan ang paglagda sa Contract Packages S-01, S-03A, at S-03C sa Palasyo kahapon.

"With the signing of these three contract packages that cover a total of around 14.9 kilometers of at-grade and railway viaduct structures, we will be a step closer to our goal of serving around 800,000 commuters daily by 2029," ani Marcos.

Sa pinagsamang gastos na mahigit P52 bilyon, sakop ng civic contract packages ang 14.9 kilometro na elevated at ground-level na mga riles, kabilang ang anim na bagong istasyon ng tren na itatayo sa Blumentritt, Buendia, EDSA, Senate, Bicutan, at Sucat.

Habang ang ibang istasyon ay ikokonekta naman sa iba pang rail systems kabilang dito ang pagpapatayo ng elevated pedestrian connection sa mga kasalukuyang istasyon ng tren tulad ng Blumentritt Station sa LRT 1 at EDSA Station kasama ang MRT 3 Magallanes Station.

Nabatid na itatayo ang Senate Station malapit sa Senate Subway Station at ang Bicutan Station ay gagamitin naman ang platform na nasa Bicutan Subway Station.

Matatandaang sinuspinde ang operasyon ng Philippine National Railways nang limang taon upang bigyang-daan ang pagtatayo ng NSCR.

Pinasalamatan ni Marcos ang Asian Development Bank (ADB) at Japan International Cooperation Agency (JICA) upang maisakatuparan ang nasabing proyekto.

Resbak ng mga tsuper sa pangakong napako.. SONA ni P-BBM, 3 araw tigil-pasada!

ni Mai Ancheta @News | July 13, 2023

Tatapatan ng tatlong araw na tigil-pasada ng ilang transport groups ang ikalawang State of the Nation Address (SONA) ni Pangulong Ferdinand Marcos, Jr. sa July 24.

Ito ang inianunsiyo ng grupong Malayang Alyansa ng Bus Employees at Laborers (MANIBELA).

Ayon kay Mar Valbuena, ang tatlong araw na tigil-pasada ay sisimulan sa July 24, 25 at 26 na dadaluhan ng kanilang mga miyembro mula sa Metro Manila, Calabarzon at Central Luzon.

Sinabi ni Valbuena na ito ang paraan nila para iparating kay Marcos ang hinaing ng kanilang sektor at mariing pagtutol sa PUV Modernization Program ng gobyerno.

Nababagalan aniya sila sa aksiyon ng Land Transportation Franchising and Regulatory Board (LTFRB) sa ipinangakong rerebyuhin ang franchising guidelines pero hanggang ngayon ay wala pa ring resulta.

"Hanggang ngayon naka-hang pa rin po tayo, pagdating doon sa mga ipinangako sa atin na rerebyuhin po 'yung franchising guidelines, hanggang ngayon nakatiwangwang ito," ani Valbuena.

Marami aniyang ibang grupo ang nagpahayag ng intensiyon na sumama sa tatlong araw na tigil-pasada.

Ang grupo ni Valbuena ay mayroong tatlong libong miyembro sa buong bansa.