‘Pinas, makakabawi sa epekto ng COVID-19 — Palasyo

Kumpiyansa ang Malacañang na makakabawi ang Pilipinas sa 17.7% na unemployment rate na naitala ng Philippine Statistics Authority (PSA) para sa buwan ng Abril.

Bagama't ikinalungkot, sinabi ni Presidential Spokesman Harry Roque na hindi na nila ito ikinabigla dahil epekto ito ng economic shutdown noong isinailalim sa enhanced community quarantine (ECQ) ang buong Luzon.

Bunsod nito ang pagsasara ng karamihan sa mga negosyo at ang pananatili ng mga tao sa kanilang mga tahanan.

Kaya naman aniya ang administrasyon ay nag-implementa ng mga programa upang mapaabutan ng ayuda ang mga mamamayan habang umiiral ang ECQ.

Kabilang dito ang Social Amelioration Program (SAP) ng Department of Social Welfare and Development (DSWD), COVID-19 Adjustment Measures Program (CAMP), Abot-Kamay ang Pagtulong (AKAP) para sa displaced OFWs at Tulong Panghanapbuhay para sa Ating Disadvantaged/Displaced Workers (TUPAD) ng Department of Labor and Employment (DOLE); Financial Subsidy for Rice Farmers (FSRF) ng Department of Agriculture (DA); at ang Small Business Wage Subsidy (SBWS) Program ng Department of Finance (DOF).

Aniya, ang National Economic and Development Authority (NEDA) ay bumuo na ng komprehensibong polisiya at mga istratehiya para sa production at tourism sector upang muling makabangon ang ekonomiya ng bansa at makapag-transition sa new normal.

Giit ni Roque na ang Pilipinas ay binubuo ng matatag at masisikap na mga mamamayan at sama-sama nating haharapin at lalampasan ang naturang health crisis.

Dr. Leopoldo Vega, bagong DOH Usec.

Itinalaga ni Pangulong Rodrigo Duterte si Dr. Leopoldo Vega bilang undersecretary ng Department of Health (DOH).

Ito ang kinumpirma ni Presidential Spokesman Harry Roque sa pagtalaga sa chief ng Southern Philippines Medical Center sa Davao City.

"Dr. Leopoldo Vega been appointed by President Duterte as Health undersecretary," ani Roque.

Nabatid na 2008 nang maging chief ng SMPC si Vega na noon ay Davao Medical Center (DMC).

Una rito, nagsilbi ang opisyal bilang medical director ng Davao Medical School Foundation medical director mula 2004 hanggang 2008.

Matatandaang dismayado si Pangulong Duterte sa DOH dahil sa nabinbing pagbibigay ng ayuda sa pamilya ng mga nasawing healthcare workers na tinamaan ng COVID-19.

Walang bakuna, walang eskuwela... P-Digong, duda sa online learning

Duda si Pangulong Rodrigo Duterte na handa na ang Pilipinas sa implementasyon ng online learning sa bansa upang maiwasan ang pagkalat ng Coronavirus Disease 2019.

Sa kanyang public address, muling nanindigan si Pangulong Duterte na hindi pa rin niya papayagan ang face-to-face classes nang walang bakuna kontra COVID-19.

"We have to wait for the vaccine. Maghintay talaga tayo sa vaccine. Sabi ko sa inyo walang vaccine, walang eskuwela,” ani Pangulong Duterte.

Sa kabila nito, ikinatuwiran ng Pangulo na nakahanda naman si Education Secretary Leonor Briones para sa online education na alternatibong pamamaraan para sa pag-aaral ng mga estudyante dahil sa kinakaharap na problema sa krisis sa kalusugan.

"We have to wait for the vaccine. It’s… Mga kapatid ko, kaigsuonan nako, maghintay talaga tayo sa vaccine. Sabi ko sa inyo walang vaccine, walang eskuwela. Nandito — sayang nandito but Secretary Briones is insisting that there should be an alternative there and she has a very good program for that, parang teleconferencing," paliwanag ng Pangulo.

"How — the technology is good. I do not know if we are ready for that. Meaning to say, if we have enough of those na gamitin para sa the whole of the Philippines," ani Pangulong Duterte. Magandang ideya umano ito at kung kakayanin ay bibili ng kagamitan ang pamahalaan para maipagpatuloy ang pag-aaral ng mga estudyante.

Itinakda ng DepEd sa Agosto 24 ang pagbubukas ng klase sa bansa.

"We are talking of students here, it’s millions. Mayroon ba siya? But if she has or if we can afford it, we’ll buy it and she can proceed with the — her novel idea of how she — the children can continue with their education," dagdag pa ng Punong Ehekutibo.