COVID-19 hindi pa malala.. DOH, kontra sa tigil-klase

Nilinaw ni Health Secretary Francisco Duque III na hindi pa nila inirerekomenda ang suspensiyon ng mga klase sa kabila ng pagtaas sa Code Red Sublevel 1 Alert status sa bansa dahil sa Coronavirus Disease 2019 (COVID-19).

Ginawa ni Duque ang pahayag kasunod ng suspensiyon ng klase ngayong araw hanggang bukas sa Navotas City at mga bayan ng Cainta at Taytay sa Rizal.

Gayunman, aminado ang kalihim na wala silang magagawa rito dahil saklaw ito ng local government code.

Paliwanag ni Duque, bagama’t naka-code red na ay sublevel 1 pa lang naman

ang sitwasyon ngayon.

Matatandaang, kasunod ng anunsiyo ng DOH na nagkaroon na ng local case ng COVID-19 sa bansa, nagdeklara si Navotas City Mayor Toby Tiangco ng suspensiyon ng klase sa kanilang lugar.

Nanawagan din si Tiangco sa Department of Education (DepEd) na ipasa na lamang ang mga estudyante at pagbakasyunin na ang mga ito at huwag nang ipatapos ang natitirang dalawa hanggang tatlong linggong pasok para sa kaligtasan ng mga ito.

Nilinaw ni Tiangco na walang kumpirmadong kaso ng COVID-19 sa kanilang lugar.

Matapos ang ilang oras ay nagsuspinde na rin si Cainta Mayor Keith Nieto ng klase sa kanilang lugar mula Lunes hanggang Martes matapos matukoy na mula sa kanilang lugar ang pasyente na positibo sa virus.

Ayon kay Nieto, layunin nitong mabigyan ng panahon ang gagawin nilang pagbabahay-bahay at pamamahagi ng mga face mask, sanitizer at vitamins sa mga residente at lahat ng estudyante sa Cainta para makasigurado na malakas ang resistensiya ng mga ito kontra sa virus.

Samantala, nagsuspinde rin ng klase si Taytay Mayor Joric Gacula, para maging handa ang mga residente kontra sa virus.

Inatasan din ng alkalde ang municipal health office na ipagpatuloy ang pag-monitor sa mga taong hinihinalang nahawa sa sakit.

COVID-19 quarantine center.. Hotel gumuho, 71 na-trap, 10 patay

Sampu katao ang patay matapos gumuho nitong Sabado ng gabi ang isang hotel sa Quanzhou, China na nagsisilbing coronavirus quarantine center.

Ayon sa Ministry of Emergency Management ng China, tinatayang nasa 80 katao ang nasa loob ng 7-palapag na gusali nang ito ay gumuho.

Siyam umano ang nakatakas habang 71 katao ang na-trap.

Sa 71 na ito, 48 ang nakuha na habang 23 naman ang hinahanap pa rin.

Nabatid na 58 katao ang naka-quarantine sa nasabing hotel at lahat ay negatibo naman sa Coronavirus Disease 2019 (COVID-19).

May 16 na staff din ng hotel at 6 na car dealership employees ang naroon nang gumuho ito. Ayon sa ulat, nasa kustodiya na umano ng pulisya ang may-ari ng gusali.

Ang gumuhong hotel ay itinayo noong 2013 at na-convert bilang hotel noong 2018.

Nitong Enero, sinimulan umanong ipa-renovate ang unang palapag ng hotel. Kabilang sa aalamin ng mga awtoridad ay kung gumuho ang gusali dahil sa structural issue o dahil sa ginagawang renovation.

Ang Quanzhou ay 600 milya ang layo mula sa Wuhan na epicenter ng COVID-19.

Chinese workers, huli sa drugs, prostitution etc.. May pera sa POGO, ituloy — P-Du

Tutol si Pangulong Rodrigo Duterte na ipasara ang Philippine Offshore Gaming Operators (POGOs) sa gitna ng mga iregularidad.

Ayon kay Presidential Spokesperson Salvador Panelo, ibinahagi umano sa kanya ng Pangulo na batay sa ulat ng Philippine Amusement and Gaming Corporation ay maganda aniya ang report sa kanya tungkol dito. Aniya, maaaring magamit ang mga makokolektang buwis mula sa POGOs sa pagpondo sa iba’t ibang proyekto at maging sa pagtugon ng gobyerno sa Coronavirus Disease 2019 (COVID-19).

Una nang inihayag ng kalihim na ikinokonsidera ni Pangulong Duterte ang pagsuspinde sa POGO operations sakaling umigting pa ang mga iregularidad na idinadawit dito.

Matatandaang, naalarma na rin ang ilang senador kaugnay sa talamak na krimen na pinaniniwalaang konektado sa POGO tulad ng money laundering, prostitution at drug trafficking.

“Ang sabi niya (President Duterte) sa akin kahapon, maganda ang report ni PAGCOR Head (Andrea Domingo), so okay, kailangan talaga natin ng pondo galing d’yan. Marami tayong projects na kailangan natin ng pondo. For instance, for the salaries of the nurses, teachers, madami. Ngayon may problema na naman tayo sa coronavirus, eh, di puwede rin nating pagkunan ‘yan. ‘Yang problema sa operations ay puwedeng magawan ng paraan ‘yan.

All you have to do is implement, establish laws and regulations,” paliwanag pa ni Panelo.