May COVID-19 sa bansa, 24 na — DOH

Umakyat na sa 24 ang bilang ng mga positibong kaso ng COVID-19 sa bansa. Ito ang kinumpirma ni Health Asec. Ma Rosario Vergeire matapos silang makatanggap ng report na may 10 pang pasyente na nagpositibo sa COVID-19.

Gayunman, sa ngayon ay wala pa aniya silang detalye hinggil sa profile ng bagong sampung kaso. Sa ngayon, nakakalat na aniya ang iba pang team ng epidemiology bureau ng DOH para mahanap ang mga posibleng nakasalamuha ng mga bagong kaso.

Kaugnay nito, sinabi ni Vergeire na nasa stable na kondisyon ang apat sa bagong COVID case na kanilang nauna nang iniulat kahapon.

Ang tinutukoy na ika-7 kaso ay 38-anyos na lalaking Taiwanese na may history umano ng contact sa isa pang Taiwanese na bumisita sa bansa at pagdating sa Taiwan ay nagpositibo sa COVID-19.

Ang ikapitong kaso ay wala umanong biyahe sa labas ng bansa. Ito ay naka-confine sa Makati Medical Center.

Ang ika-8 kaso naman ay 32-anyos na Pinoy at may travel history sa Japan sa nakalipas na 14 na araw. Naka-confine ito sa St. Luke’s Hospital sa BGC at residente ng Pasig.

Habang ang ika-9 na kaso ay 86-anyos na lalaking Amerikano na may pre-existing hypertension at travel history sa USA at South Korea. Ito ay naka-confine sa Medical City at residente ng Marikina.

Ang ika-10 kaso ay 57-anyos na Pinoy na walang biyahe sa labas ng bansa pero, sinasabing nagkaroon umano ng contact sa isang pasyente na positibo sa COVID-19. Ito ay nasa St. Luke’s Hospital sa Quezon City at residente rin ng

lungsod.

Samantala, inihayag ni Vergeire na bagamat, guarded ay stable naman ang kondisyon ngayon ng 62-anyos na unang naitalang local case ng COVID-19.

Matatandaan, na nitong weekend, una nang naiulat na nasa kritikal na sitwasyon ang nasabing pasyente.

Sa kabila ng patuloy na pagtaas na ito ng kaso ng COVID-19 sa bansa ay nilinaw naman ng DOH na hindi pa nila inirerekomenda ang pagpapatupad ng lockdown sa mga lugar na may COVID case.

Iwas-COVID-19.. Voters registratrion, stop — Comelec

Ipinagpaliban na ng Commission on Elections ang nagpapatuloy na voters registration sa buong bansa.

Ayon kay Comelec Spokesperson James Jimenez, kasunod ito ng lumalawak na banta ng COVID-19.

Ani Jimenez, ang suspensiyon ng voters registration ay simula ngayong araw, Marso 10 hanggang Marso 31, 2020.

COVID-19 para ‘di lalong kumalat.. Lockdown sa Metro Manila

May pangangailangan na umanong magpatupad ng lockdown sa Metro Manila at ideklara nang walang pasok sa loob ng isang linggo bilang paraan ng pag-iingat na lumaganap ang Coronavirus Disease 2019 (COVID-19).

Ikinatwiran ni Albay Rep. Joey Salceda na dahil nasa Metro Manila ang maraming kaso ng COVID-19, makatwiran lang na suspendihin muna ng isang linggo ang pasok sa eskuwela at sa mga trabaho upang magkaroon ng pagkakataon na magsagawa ng paglilinis.

Dahil malapit na rin naman ang bakasyon sa eskuwela, makabubuti aniyang maaga nang itakda ng Department of Education (DepEd) ang summer break.

Nais din ng kongresista na isara muna ang mga paliparan para sa domestic flights, South Luzon Expressway (SLEX), North Luzon Expressway (NLEX) at mga railway upang hindi na kumalat pa sa ibang probinsiya ang COVID-19.

Ang exempted lang sa temporary entry ban sa NCR ay ang pagbiyahe ng mga pagkain, gamot at nauukol sa pangkalusugan.

Binigyan-diin ni Salceda na bagamat, tinatayang nasa P100 bilyon ang mawawala sa ekonomiya ng bansa dahil sa NCR lockdown, aabot naman sa P218.5 bilyon ang mawawala kapag lumaganap ang COVID-19. Samantala, ipinasisiguro ni Iligan City Rep. Frederick Siao sa sektor ng transportasyon na nasusunod ang mga hakbang para manatiling ligtas sa paglaganap ng COVID-19.

Ayon kay Siao, kailangang tiyakin ng local government units, MMDA at LTFRB na may umiiral na public health procedures sa mga transport company.

Kabilang dito ang pagtiyak na may tubig at sabon at regular na malinis ang mga palikuran sa terminal.

Ang mga madalas na hawakan ng tao sa mga sasakyan tulad ng baggage compartment, doorknob, handle bar, railing, bintana, upuan at armrest ay dapat na malimit na nalilinis ng mabuti.

Inirerekomenda pa ni Siao na masigurong malinis sa pangangatawan at nasa mabuting kalusugan ang mga drayber at kundoktor tulad ng pananatiling malinis ng kanilang mga ibinibiyaheng sasakyan.