Mga Cong. na pabor sa anti-terror bill, atras

Ilang kongresista na unang bumotong pabor sa House Bill 6875 o Anti-Terrorism Act of 2020 ang umatras na sa kanilang pagpanig sa panukala.

Pinakahuling nagpatanggal ng kanyang pangalan sa botong "Yes" si Albay Rep. Joey Salceda at sa halip ay nag-abstain ito.

Nagkaroon din umano ng technical error sa pagpili ng "No" vote ay naisama sa "Yes" vote. Sa ngayon ay nasa 167 pabor, 36 tutol at 30 ang abstain sa tally ng mga boto para sa panukala mula sa dating 173, 31 at 29. Nananatiling kuwestyon pa kung ano ang paniniwala ng mahigit 60 kongresista na hindi bumoto.

Katwiran ni Salceda, may mga probisyon sa Anti-Terrorism Bill ang salungat sa ginagarantiya ng Saligang Batas patungkol sa karapatang pantao tulad ng warrantless detention na mula sa dating tatlong araw ay pinalawig ng 24 araw.

Naniniwala pa ang kongresista na makabubuting maisalang sa bicameral conference committee ang panukala upang maplantsa pa ng mga senador at kongresista ang ilang probisyon na inaalmahan ng taumbayan.

Ang bersyon na inaprubahan sa House of Representatives ay adopted o kopya lang ng napagtibay sa Senado. Dahil iisa lang ang bersyon na inaprubahan ay hindi na ito idinaan sa bicam at ang enrolled bill ng Senado ay diretsong pinalalagdaan kay Pangulong Rodrigo Duterte.

Mayroong 30 araw naman ang Presidente para aksyunan ang panukala at kung walang gagawin ang Punong Ehekutibo ay awtomatiko na itong magiging batas.

Gayunman, sinabi ni Justice Sec. Menardo Guevarra na hanggang kahapon ay hindi pa naipapadala ng dalawang Kapulungan ng Kongreso ang enrolled bill sa Palasyo.

Dahil dito, umapela si Albay Rep. Edcel Lagman kay Speaker Alan Peter Cayetano na huwag munang lumagda sa enrolled bill para magkaroon ng pagkakataon ang mga mambabatas na marepaso pa ito.

Mga negosyante sa ‘Pinas, tutol sa Anti-terror bill

Naglabas din ng kanilang saloobin ang grupo ng malalaking negosyante sa Pilipinas kaugnay sa Anti-terrorism bill.

Matatandaang, naipasa ang naturang panukala sa Kongreso bago nagsara ang first regular session noong isang araw.

Kabilang sa mga lumagda sa joint statement ang mga sumusunod na grupo:

- Bishops-Businessmen’s Conference for Human Development

- Information Technology and Business Process Association of the Philippines (IT-BPAP)

- Investment House Association of the Philippines (IHAP)

- Judicial Reform Initiative (JRI)

- Management Association of the Philippines (MAP)

- Makati Business Club (MBC)

- Philippine Business for Education (PBEd)

- Subdivision and Housing Developers Association, Inc. (SHDA)

Anila, maraming iba pang mahahalagang bagay ang kinakailangan ngayon kaysa sa nasabing panukala.

Mas kailangan umanong tugunan ang mga bumagsak na negosyo, nawalan ng trabaho, mga kabataang nagugutom at problema sa pagpapatuloy ng edukasyon.

Bukod sa ‘PM is key’ — DTI Online seller na dagdag-presyo, isumbong

Binalaan ng Department of Trade and Industry (DTI) ang mga online seller na pagmumultahin o makukulong kung patuloy na iisnabin ang polisiya ng gobyerno patungkol sa paglalagay ng price tag sa kanilang mga itinitindang produkto.

Diin ni Trade Secretary Ramon Lopez, obligado ang online sellers na maglagay ng price tag na layong proteksyunan ang mga konsyumer laban sa panloloko.

"Required po ' price tag doon sa mga items na 'yon. Kaya ho hindi uubra ‘yung walang presyong ilalagay" ani Lopez.

Sinabi ni Lopez na mahigpit ang batas patungkol sa price tag policy at kung hindi ito masusunod ng mga seller ay wala silang karapatan na magtinda.

Kasabay nito, inihayag ng kalihim na nakikipag-ugnayan na sila sa National Bureau of Investigation (NBI) para tukuyin ang mga lumalabag na online sellers.

Ikinatwiran naman ng ilang online sellers na ang hindi paglalagay ng price tag ay bahagi ng kanilang marketing strategy.

"Sa mga matitigas ang ulo, lalo na sa hindi paglagay ng price tag sa mga prime commodity, ay may multa po 'yun at maaari kayong makulong" babala ni Lopez.

Inabisuhan naman ni Lopez ang mga konsyumer na magsumbong sa hotline 1384 para matunton ang mga pasaway na online sellers.

"Dapat magsumbong kayo upang matunton at mapuntahan natin 'yung mga ayaw sumunod. Price tags also indicates the authenticity and quality of the product. Kung ano "yung specifications na sinasabi sa tag, dapat 'yun din ang dapat ibigay sa customers. 'Pag 'di nasunod, itatawag nila sa 1384," dagdag pa nito.

Nasasaad sa Article 95 ng Republic Act 7394 o ang Consumer Act of the Philippines ang parusang pagmumulta ng P200 hanggang P5,000 o pagkakakulong ng isa hanggang anim na buwan o pareho para sa unang paglabag.

Kung uulitin ang paglabag ay mahaharap na sa pagkansela ng business permit at license to operate.