Paglabas at pagpasok sa M. Mla. binawal ni P-Duterte.. OA! — Sotto

Nilinaw ng Malacañang na hindi maituturing na overreaction ang community quarantine sa Metro Manila upang mapigilan ang pagkalat ng COVID-19 sa bansa.

Ito ang sinabi ni Cabinet Sec. Karlo Nograles, kasunod ng pahayag ni Senate President Vicente “Tito” Sotto III, na overreaction ang pagbabawal sa mga biyahe papasok at palabas ng Metro Manila at hindi pa ito napapanahon kung ikokonsidera ang bilang ng kaso ng COVID-19 sa bansa at dahil sa magiging epekto nito sa ekonomiya.

Ayon kay Nograles, posibleng ang nasa isip ni Sotto ay ‘lockdown’ kaya niya nasabi ang pahayag na ito.

Ang connotation aniya kasi kapag sinabing lockdown ay wala nang papasok na cargo, limitado na ang food supplies at iba pa kaya nagpa-panic ang publiko.

Nilinaw ng kalihim na hindi lockdown ang ipatutupad sa Metro Manila kaya magtutuluy-tuloy lamang ang pagpasok ng goods at produkto rito.

Sa panig naman ni Department of Trade and Industry (DTI) Sec. Ramon Lopez, balanse aniya ang desisyong ito ni Pangulong Rodrigo Duterte at kung tutuusin ay dapat mas istrikto pa ang mga ipatutupad na measures lalo at kalusugan ng mga Pilipino ang pinag-uusapan.

Sa ipatutupad na community quarantine.. Pasaway sa checkpoint, kulong agad

Aarestuhin ng mga pulis ang mga susuway sa ipatutupad na community quarantine sa Metro Manila na magsisimula bukas, Marso 15.

Ayon kay National Capital Region Police Office Director, Police Maj. Gen. Debold Sinas, tukoy na kung saan-saan magtatalaga ng checkpoints, kailangan na lamang itong aprubahan ng pamunuan ng Philippine National Police (PNP).

“Once someone violates the quarantine and enter the region, people would be charged with violation of quarantine law and the Revised Penal Code. Para alam nila ‘pag nag-violate ka, huli ka,” paliwanag ni Sinas.

Wala na rin umanong pakikipag-usap sa mga violator.

“Ano ang gagawin naming dialogue? Those who will violate will be arrested, kasuhan namin once na may mag-violate,” pahayag ni Sinas.

Ang maaarestong violators ay dadalhin at ikukulong sa lokal na pulisya kung saang lugar niya ginawa ang kasalanan.

Samantala, ang Regional Mobile Force Battalion ang siyang magbabantay sa mga checkpoints sa Metro Manila patungo sa ibang rehiyon.

Asahan na rin umano ang grabeng trapik kapag sinimulan na ang community quarantine.

Samantala, susundin naman ng pulisya ang mga kautusan tulad ng pagpapapasok sa mga manggagawa na ang trabaho ay sa Metro Manila subalit, nakatira sa karatig probinsiya.

Code Red Sub-Level 2: Mga bawal sa COVID-19.. Sumunod kayo! — P-Du30

Inianunsiyo ni Pangulong Rodrigo Duterte na itinaas na sa Code Red Sub-Level 2 ang Code Alert System sa buong bansa kaugnay sa Coronavirus Disease 2019 (COVID-19).

Sa kanyang public address matapos ang Inter-Agency Task Force on the Emerging Infectious Diseases (IATF-EID) sa Malacañang, inaprubahan at binasa ni Pangulong Duterte ang resolusyong binuo ng task force para sa pagkontrol sa pagkalat ng virus lalo sa Metro Manila.

Kabilang sa ipatutupad ang pagsuspinde ng mga biyahe papasok at palabas ng Metro Manila simula March 15 hanggang April 14.

Ang trabaho sa Executive Branch ay suspendido rin pero, kailangang may skeletal force na magbibigay pa rin ng serbisyo.

Hinihikayat din ang pribadong sektor na magkaroon ng flexible work arrangements.

Pinalawig din hanggang April 12 ang suspensiyon ng klase sa lahat ng level sa Metro Manila.

Magpapatuloy naman ang operasyon ng LRT, MRT at PNR basta magkaroon ang Department of Transportation (DOTr) ng guidelines sa social distancing sa loob ng mga nasabing pampublikong transportasyon. Bagama’t, wala naman umanong biyahe papasok at palabas ng Metro Manila.