Fake accounts, nagkalat… Facebook, hindi na safe

Nagrereklamo ngayon ang ilang indibidwal dahil sa pagsulputan ng mga pekeng account sa social media platform na Facebook.

Karamihan sa mga pekeng account ay walang profile picture at blangko ang detalye.

Agad namang ibinabahagi ito ng mga may lehitimong account upang mai-report na pag-abuso sa Facebook Philippines.

Samantala, nagpalabas din ng opisyal na pahayag ang University of the Philippines dahil sa ilang mga estudyante, opisyal at alumni nito ang mayroong pekeng Facebook accounts.

"We urge the members of the UP community to check their names and accounts and to make the proper report to the Data Protection Officer of Facebook,” ayon sa Facebook.

Tiniyak din nito na ang UP System Data Protection Officer ay nakipag-ugnayan na sa Philippine National Privacy Commission para matulungan ang mga mag-aaral na at alumni na isumbong ang mga peke o dummy account.

Ayon naman sa UP Office of the Student Regent, ang paglutang ng maraming blangko, pare-pareho at pekeng account na may pangalan ng mga estudyante ng UP ay kasunod ng mga protesta laban sa Anti-Terrorism Bill.

"We are encouraging students NOT to panic and instead help each other in reporting SUSPICIOUS accounts ONLY. We just need to stand together against possible tactics seeking to silence our voice," ayon sa UP Office of the Student Regent.

Paano isusumbong ang fake account?

Ayon sa Facebook, ang mga account o pages na peke ay paglabag sa kanilang Community Standards at hindi pinahihintulutan.

Upang maisumbong ang pag-abuso ay himukin ang mga kaibigan sa Facebook na hanapin ang pekeng account at i-click ang Report profile.

Mayroon namang kaukulang form ang Facebook para sa mga nais magsumbong na walang account pero may lumutang na mga peke o dummy.

21,340 positibo sa COVID-19

Umakyat na sa 21,340 ang kabuuang bilang ng COVID-19 cases na naitala sa bansa.

Batay sa datos ng Department of Health, ito ay matapos silang may maitalang 714 na karagdagan pang kaso.

Pero sa bilang na ito ay 350 ang fresh cases habang 364 naman ang late cases.

Sa mga fresh cases na ito, 104 ang mula sa National Capital Region, 171 sa Region 7, ang 75 naman ay mula sa iba pang lugar sa bansa.

Sa mga late cases naman, ang 140 ay mula sa NCR, 224 naman sa iba pang lugar sa bansa.

May 111 namang naitala na bagong nakarekober mula sa COVID-19.

Kaugnay nito, umakyat na sa 4,441 ang bilang ng mga pasyenteng gumaling mula sa virus.

Habang may 7 namang naiulat pang nasawi dahil sa COVID-19.

Sa kabuuan ay nasa 994 na ang bilang ng nasawi sa bansa dahil sa nasabing sakit.

Walang nangyayaring riot tulad sa U.S. .. P-Digong, todo-puri sa pagiging masunurin ng mga Pinoy

Pinuri ni Pangulong Rodrigo Duterte ang pagiging masunurin sa batas ng mga Filipino kasabay ng pagkadismaya nito sa kaguluhang nagaganap sa Estados Unidos.

Ipinagpapasalamat ni Pangulong Duterte na walang nangyayaring riot sa bansa hindi tulad sa mga kilos-protesta sa Amerika dahil sa pagkamatay ng isang African-American sa kamay ng pulisya doon.

Gayundin, aniya ang katangian ng mga Filipino bilang mga masunuring mamamayan kaya hindi nahirapan ang pamahalaan na ipatupad ang community quarantine.

"There’s a riot going on all over and it seems to me that is no end in sight. Mabuti na lang hindi tayo ganun at natimingan naman that the Filipinos are really law-abiding," wika ni Duterte.

"Imagine if Amerika ‘to, how can you enforce the lockdown and the sequestration — ah itong quarantine? Buti’t na lang ganun ‘yon so we have to respond to the problem besetting the distribution of assistance to them," sabi pa ng Pangulo.

Magugunitang nauwi na sa ilang araw na riot at insidente ng looting ang mga kilos-protesta sa Amerika sa isyu ng police brutality at racism bunsod naman ng pagkamatay nni George Floyd sa kamay ng isang police officer.