Idinawit sa oust Duterte nu'ng 2019... Hidilyn, pinatawad na si Panelo

ni Lolet Abania | August 1, 2021

Napatawad na ni Olympics gold medalist Hidilyn Diaz si Chief Presidential Legal Counsel Salvador Panelo matapos na maisangkot umano ng kalihim sa tinaguriang oust-Duterte plot matrix ang weightlifting champion.

“As a Catholic Christian, napatawad ko na po siya [Panelo]. At masasabi ko na lang na may rason kung bakit nangyari ‘yun. At ito naiuwi ko na po ang gold medal para sa Pilipinas,” ani Diaz sa isang radio show. Inamin ni Diaz na mula nang idawit siya umano sa oust-Duterte plot matrix, nakaranas siya ng hirap na makakuha ng pondo para sa kanyang trip sa 2020 Tokyo Olympics habang kinailangan niyang humingi ng donasyon mula sa private sector para suportahan sa kanyang laban.

Matatandaang noong 2019, ipinrisinta ng noon ay acting Palace spokesperson na si Panelo sa Malacañang media ang isang matrix sa sinasabing "oust-Duterte" plot, kung saan nakatala ang maraming pangalan kabilang dito ang kay Diaz.

Gayunman, nilinaw na umano ni Panelo ang pangalan ni Diaz, habang isinisi sa media ang nangyaring “faulty analysis” ng nasabing matrix. Sa isang television interview noong 2019, ayon kay Panelo, “When a principal gives you a document, it is assumed that it was done [with presumption of] regularity in performing official duty.” “I am sorry and I am sad to know na nasaktan si Hidilyn. I am sorry for that, kawawa naman. Hindi naman iyon ang intensiyon nu’ng mga gumawa ng matrix,” dagdag niya.

Hidilyn gold sa Olympics

ni MC / Gerard Arce - @Sports | July 26, 2021

TOKYO – Gumawa ng kasaysayan si weightlifter Hidilyn Diaz matapos nitong masungkit ang unang gintong medalya para sa Pilipinas nang talunin nito ang world champion ng China at record holder Liao Qiuyun sa makapigil hiningang face off sa Tokyo International Forum.

Halos hindi humihinga ang lahat ng nasa stadium nang buhatin ng 30-year old weightlifter mula Zamboanga ang Olympic record na 127 kilograms sa kanyang third at final lift upang maiuwi ang gold medal sa kabuuang iskor na 224.

Hindi magkamayaw sa tuwa ang maliit na grupo ng mga Filipino na nasa stadium habang ang iba ay halos maiyak nang tapusin ng Pinay ang 97-year na paghihintay ng bansa para sa Olympic gold medal sa kakaibang edisyon ng Summer Games.

Matatandaang si Hidilyn din ang kumuha ang silver medal sa Rio Olympics apat na taon na ang nakararaan at ngayon ay gold medal naman ang karangalang iuuwi nito sa bansa. “Hindi ako makapaniwala na nasorpresa ako na nagawa ko iyon. Kakaiba si God, kakaiba si God,” pahayag ni Diaz matapos ang awarding ceremony. “Nagpapasalamat ako sa lahat ng prayer warriors.

Sa team HD at sa lahat ng sumuporta sa akin. Thank so much for believing in me. When the times, gusto ko ng sumuko dahil sa dami ng pagsubok na pinagdaanan, pero nakaya natin. Kaya natin mga Filipino,” dagdag ni Diaz na nagawang sumabak ng apat na beses sa Olympic Games simula nung 2008 Beijing na nagtapos sa 11th place, na sinundan ng nakakdismayang 2012 London Olympics at ang malupit na 2016 Rio Olympics.

“Sa totoo lang kinakabahan ako baka hindi ko magawa, pero the whole day, the whole week sinasabi ko na I believe, and I believe tsaka prepared ako. Lahat ng pinagdaanan ko, pineprepare ako ni God for today,” paliwanag ni Diaz na sa sobrang pagtutok sa laban ay hindi napapansing gumagawa siya ng isa pang marka sa Olympiad.

“Actually, hindi ko na alam na Olympic record na yung ginagawa ko, hindi rin ako makapaniwala na andun yung pangalan ko sa Olympic record. So, I’m really thankful, grabe si God, grabe si God.”

#HidilynDiaz #TokyoOlympics

10K volunteers sa Tokyo 2020 Olympic, umatras na

ni Lolet Abania | June 3, 2021

Nasa 10,000 mula sa 80,000 na kasama sa Tokyo 2020 Olympic volunteers ang nag-quit, ayon sa organizers nito, kasabay ng mga nadarama nilang pagdududa sa Games kung saan 50 araw na lamang ang opening ceremony.

Ayon kay Tokyo 2020 chief Seiko Hashimoto, ang karagdagang pagpapaliban ng Games, na inilalabas ng isang Japan sports paper, at ang sinasabing kanselasyon nito ay mangyayari lamang kung may catastrophic circumstances o sakunang magaganap gaya ng hindi pagdating sa Japan ng maraming mga delegado.

Gayunman, ayon sa mga organizers, 50 araw na lamang mula ngayong Huwebes ay ipapabatid nila ang tungkol sa magaganap na medal ceremonies upang makahikayat ito sa publiko, sa kabila na karamihan ng mga tao sa Japan ay nagnanais na i-delay o kanselahin ang Games.

Sa ngayon, nakikipaglaban ang Japan sa pandemya na nasa fourth wave ng COVID-19 kung saan kabilang ang Tokyo at maraming bahagi pa ng naturang bansa ang nasa ilalim ng state of emergency na magtatapos isang buwan bago ang Games.

Nitong Miyerkules ng gabi, inianunsiyo ni Tokyo 2020 CEO Toshiro Muto sa local media, “Around 10,000 volunteers — who are vital to the smooth running of the massive event — have quit, largely over Coronavirus concerns.”

Ang iba naman ay nag-drop out, matapos na ang Games ay na-postpone nang isang taon.

Ayon sa opinion polls, ilan sa mga volunteers na kasama rito na nasa 80 porsiyento ng mga tao sa Japan ay tinututulan ang pagho-host ng Games ngayong taon.

Subalit, sa isinagawang surveys mula sa populasyon ng Tokyo, lumalabas na mas nahahati ang naging pasya sa pagitan ng pagpayag at pagtanggi ng kanilang mga mamamayan sa pagsasagawa ng Games.

Paliwanag naman ni Muto, “The reduction in volunteers would not affect the running of the Games because the event has been scaled back, so fewer people are needed.”