Social distancing sa S. Korea, extended

ni Thea Janica Teh | January 2, 2021

Pinalawig pa hanggang Enero 17, 2021 ang ipinatutupad na social distancing rules sa South Korea at iba pa nitong kalapit na lugar, ayon sa health official nito ngayong Sabado.

Ayon kay Kwon Deok-cheol, ito ay pinalawig upang maiwasan ang patuloy na pagtaas ng bilang ng kaso ng COVID-19 sa bansa. Mahigpit ding ipinatutupad ang pagbabawal sa mass gathering na hindi dapat hihigit sa apat na katao.

Nitong Biyernes, nakapagtala ng 824 bagong kaso ng COVID-19 ang South Korea, mas mababa sa naitala noong Huwebes na 1,029.

Nurse na naturukan ng Pfizer Inc. vaccine, nagpositibo sa COVID-19

ni Thea Janica Teh | December 30, 2020

Nagpositibo sa COVID-19 ang isang nurse mula sa California mahigit isang linggo matapos maturukan ng vaccine na gawang Pfizer Inc., ayon sa ABC News nitong Martes.

Kinilala ang nurse na si Matthew W., 45-anyos, mula sa dalawang lokal na ospital sa California. Nitong Disyembre 18, ibinahagi ni Matthew sa kanyang Facebook na naturukan na siya ng vaccine at nakaramdam ng pamamaga ng braso sa buong araw.

Makalipas ang 6 na araw, mismong Kapaskuhan, nagkasakit umano si Matthew matapos magtrabaho sa COVID-19 unit. Nakaramdam ito ng panginginig, pananakit ng kasu-kasuan at panghihina.

Agad itong pumunta sa drive-up hospital upang magpa-test at napag-alamang nagpositibo ito sa COVID-19.

Ayon kay Christian Ramers, isang infectious disease specialist ng Family Health Centers of San Diego, ang senaryong ito ay hindi inaasahan.

Aniya, "We know from the vaccine clinical trials that it's going to take about 10 to 14 days for you to start to develop protection from the vaccine."

Dagdag pa ni Ramers, nasa 50% pa lamang epektibo ang unang dose ng vaccine kaya naman kinakailangan pa ang ikalawang dose upang maging epektibo ng 95%.

US, pasok sa travel ban sa ‘Pinas

ni Thea Janica Teh | December 30, 2020

Kabilang na ang United States sa mga bansang kasali sa travel restrictions dito sa Pilipinas upang maiwasan ang pagdating ng bagong variant ng COVID-19, ayon kay Presidential Spokesperson Harry Roque ngayong Miyerkules.

Ani Roque, epektibo na ang pagsama sa US sa listahan ng mga lugar na may restricted entry. Ngunit, hindi ito maituturing na travel ban, kundi paghihigpit lamang dahil pinapayagan pa rin ang pag-uwi ng mga Pinoy galing US.

Samantala, ang travel restriction na ipinatupad sa United Kingdom kung saan na-detect ang bagong variant ng COVID-19, kasama ang 19 pang bansa, ay pagbabawal sa mga banyaga na makapasok sa ‘Pinas hanggang Enero 15, 2021.

Una na ring sinabi ni Health Secretary Francisco Duque na pansamantalang isasama ang US sa travel restriction habang pinag-aaralan pa ng pamahalaan ang bagong variant.

Ayon naman sa Malacañang, ang DOH at DFA na ang bahalang maglabas ng guidelines patungkol sa restricted entry ng US at iba pang lugar.