ni Erlinda Rapadas @Teka Nga | Nov. 28, 2024
Photo: Kobe at Kyline - Instagram, Kobe Paras
Inseperable ang magkasintahang sina Kyline Alcantara at Kobe Paras, kaya madalas silang magkasama sa iba't ibang events at okasyon. Kapag may mga shows na tinatanggap si Kyline, lagi niyang kasama ang nobyo niyang si Kobe. Dahil dito, sobrang kinikilig ang kanilang mga fans.
Pasado si Kobe sa mga solid fans ni Kyline dahil mabait, marespeto, at alagang-alaga niya ang aktres. Gayunpaman, may ilang mga netizens na nagtatanong kung ano na ang plano ni Kobe sa kanyang basketball career. Mukhang nalilibang na raw ito sa showbiz dahil sa palaging pagsama sa kanyang nobya.
Samantala, wish ni Kobe na makasama ang kanyang ina na si Jackie Forster ngayong Pasko. Pero dahil nasa abroad ito, hindi ito makakauwi ng Pilipinas. Kaya naman sa bahay na lang daw nina Kyline siya magpa-Pasko, kasama ang pamilya ng aktres. Para kay Kobe, sila na ang magiging pamilya niya ngayong Kapaskuhan.
MALAKI ang pasasalamat ni Heart Evangelista sa mga photographers na nagko-cover sa mga Fashion Week events sa Paris at New York.
Dahil sa kanilang magagandang kuha, nakuha si Heart bilang cover ng international magazine na Vogue.
Malaking boost ito para sa kanyang modeling career, kaya’t naging in-demand siyang endorser ng malalaking beauty products at iba pang kumpanya.
Ang latest niyang endorsement ay ang Coke Zero in can. Napakasosyal ng kanyang photos para sa nasabing soft drink ad campaign.
Bukod dito, ang pagsikat ni Heart sa mga fashion events ay napapansin ng malalaking business groups sa Paris at New York. Kahit abala, hindi nakakalimutan ni Heart na mag-treat ng merienda para sa mga photographers na nagko-cover ng events.
Paborito siya ng mga foreign photographers dahil napaka-sweet niya at hindi umaastang primadonna. Dahil dito, lumulutang ang presence niya kahit maraming magagandang international models na rumarampa sa Fashion Week.
DAHIL sa kanyang sipag at taos-pusong pagtulong sa mga nangangailangan, sunud-sunod ang mga parangal na natanggap ni Sen. Bong Revilla, Jr.
Sa nakaraang Lingkod Bayan Awards 2024, isa siya sa mga pinarangalan bilang Outstanding Senator of the Philippines.
Sa Gawad Pilipino Awards, binigyan siya ng parangal bilang “Asia’s Distinguished Leader
in Public Service”.
Nakikita ng sambayanan na si Sen. Bong ang nangunguna sa pagtulong tuwing may kalamidad. Maging ang mga binaha at nasunugan ay agad niyang pinupuntahan upang magbigay ng ayuda.
Marami rin siyang naipasang batas na lubos na kapaki-pakinabang, tulad ng “Expanded Senior Citizens Act” at ang batas na nagdaragdag ng allowance para sa mga guro.
Siya rin ang masigasig na tumutol sa “no payment, no enrollment policy” sa mga paaralan.
Dahil dito, nasa top senatoriables si Sen. Bong Revilla, Jr.. Marami ang nagtitiwala sa kanyang kakayahan bilang isang public servant.
HINAHANAPAN ng GMA Network si Jillian Ward ng babagay sa kanya bilang love team o leading man. Mukhang may chemistry naman sila ng Sparkle artist na si Michael Sager, na guwapo at tisoy. Bagay ang kanilang personalidad dahil mestiza type si Jillian.
Kampante si Jillian kay Michael dahil nagkatrabaho na sila sa seryeng Abot Kamay na Pangarap (AKNP). Madali silang nagkasundo, kaya’t meron nang mga fans ang kanilang tambalan, ang “JilMike”.
May bagong hairstyle ngayon si Jillian—nagpakulay siya ng buhok, at bumagay naman ito sa kanyang mestiza features.
Bukod sa kanyang guest appearance sa sitcom na Walang Matigas na Pulis sa Matinik na Misis, gumaganap din siyang doktora rito.
Excited si Jillian sa kanyang bagong proyekto—isang romantic-comedy movie. Gustung-gusto niya ito dahil sobra siyang napagod sa mga dramatic scenes ng AKNP.
