Mister, ipinahaharang din sa guard… JASON, PINALALAYAS NI MELAI SA BAHAY TUWING NAG-AAWAY

ni Erlinda Rapadas @Teka Nga | May 18, 2024

File photo: Melai Cantiveros at Jason Francisco

Sanay na ang publiko sa away-bating relasyon ng mag-asawang Melai Cantiveros at Jason Francisco. Kabisado na ng lahat ang setup ng mag-asawa kapag ang mga anak lang ang kasama ni Melai sa post niya sa social media. Tiyak daw na may LQ (lovers' quarrel) ang mga ito at hindi nagpapaka-plastic si Melai para pagtakpan ang problema nilang mag-asawa. 

Maging ang dalawa nilang anak ay alam na rin ang drama nina Melai at Jason. Hindi na sila nagtataka o nagtatanong kapag hindi umuuwi si Jason sa kanilang bahay. Babalik din naman daw ang kanilang Papa Jason. 

Sa kanyang guesting sa vlog ni Ogie Diaz, inamin ni Melai na kapag malala ang away nila ni Jason ay pinalalayas niya ito at nagbibilin pa sa guard na ‘wag na ‘wag papasukin ang mister. 

Gayunpaman, marami ang nagsasabing suwerte si Melai kay Jason. Simula pa lamang ay hindi raw pinakikialaman ni Jason ang pera at kinikita ng aktres. Ang kinikita naman ni Jason ay ibinibigay niya kay Melai para sa mga pangangailangan nila sa bahay. 

Mabait, masipag at responsableng padre de familia si Jason Francisco. Hindi na makakatagpo si Melai ng lalaking tulad ng kanyang mister.

Comedy Queen, certified baker na… UBE PANDESAL NI AI AI, MABENTA SA USA

ni Erlinda Rapadas @Teka Nga | May 17, 2024

File photo: AiAi Delas Alas

Bago pa sumikat sa showbiz si Ai Ai delas Alas ay pangarap na niyang magkaroon ng sariling resto at franchise ng sikat na fastfood chain. Kaya naman, nang kumikita na siya ay unti-unti na niyang sinimulan ang kanyang dream na magkaroon ng sariling resto business. 

Nagsimula si Ai Ai sa ilang maliliit na food business. Ito ang payo ng ilang kaibigan na hindi magiging successful ang kanyang negosyo kung kalat-kalat at small time lang.

Kaya’t naglabas siya ng puhunan sa bawat negosyo na pinasok niya na umabot na nga ng P25 million. 

Nu’ng nag-pandemic ay nagklik ang kanyang ube pandesal business. Halos lahat ng kaibigang celebrities ay naging suki n’ya. 

Pero, pansamantalang natigil ang kanyang ube pandesal business dahil kailangan niyang asikasuhin ang kanyang papeles sa USA (United States of America). Nauna nang nanirahan sa Amerika ang kanyang mga anak at sumunod na rin ang kanyang mister na si Gerald Sibayan na nag-a-apply na ng US citizenship. 

Habang nasa San Francisco sila ay naisipan ni Ai Ai na mag-aral ng baking upang maging ganap na pastry chef at nakapasa naman siya, kaya muli niyang binuhay ang dati niyang negosyo, ang Martina's Breads.

Marami ang naghahanap ng ube pandesal ni Ai Ai sa San Francisco, USA. ‘Yun na sana ang chance niya na magkaroon ng sariling marka at negosyo. Pero, nag-iisa lang siya at kailangan niya ng mga helpers sa kanyang bakeshop. 

Gayunpaman, hindi nawawalan ng pag-asa si Ai Ai delas Alas, patuloy siyang nangangarap na magkakaroon ng sariling resto balang-araw. Baka nga higitan pa niya ang tagumpay ng Pares Overload ni Diwata.

‘Di na sina Sarah at Anne… KATHRYN, PINAKAMABENTANG ENDORSER

ni Erlinda Rapadas @Teka Nga | May 13, 2024

File photo: Kathryn Bernardo

Tiyak na magre-react at hindi papayag ang mga fans nina Sarah Geronimo at Anne Curtis sa pahayag ng mga fans ni Kathryn Bernardo na ang kanilang idol ang most in demand product endorser ngayon dahil sa transformation ng personalidad ni Kathryn matapos ang breakup nila ni Daniel Padilla.

Dahil sa simpatya ng publiko ay mas sumikat s’ya nang husto, maraming malalaking endorsements ang dumating. 

Gayunpaman, hindi payag ang mga fans nina Sarah at Anne na mapunta kay Kathryn ang korona bilang Endorsement Queen. Mas malawak kasi ang fan base nina Sarah Geronimo at Anne Curtis.