Kung dati, namumudmod ng ayuda… GRETCHEN, BIGLANG NAGTAGO DAHIL SA E-SABONG

ni Erlinda Rapadas @Teka Nga | Dec. 12, 2024

Photo: Gretchen Barretto - Instagram

Sobrang nami-miss ng mga small workers sa showbiz si Gretchen Barretto ngayong Pasko. 

Last year kasi ay namigay si La Greta ng ayuda, Christmas box para sa maliliit na manggagawa sa movie industry. May bigas, groceries at ‘yung iba ay nakatanggap din ng financial assistance.

Pati ang mga artista, talents, at bit players sa pelikula at telebisyon ay nakatanggap ng pamasko ni Gretchen. Marami siyang pinasayang taga-industriya.  

Pero, dahil sa kontrobersiya ng e-sabong, kung saan meron siyang farm ng mga manok na panabong, medyo nag-lie-low at hindi na muna nagpakita sa publiko si Gretchen. 

Walang makapagsabi kung ano ang pinagkakaabalahan ngayon ni La Greta. Hindi na siya gaanong lumalabas. Ang mga private at personal na lakad na lamang niya ang nababalitaan kasama ang kanyang mga loyal friends.

Well, hopefully, one of these days, muling magparamdam si Gretchen Barretto sa showbiz at magpasaya sa Pasko.

---

Anaaak ng tupa naman! BILYONARYANG DATING AKTRES, HINUHUGASAN ANG LEFTOVER AT IPINALULUTO ULI SA MGA MAIDS

Paboritong topic ng mga kaibigang artista ang super rich na veteran actress dahil sa sobra nitong kakuriputan at pati sarili ay tinitipid upang hindi mabawasan ang kanyang yaman. 

Kung tutuusin, bilyonarya ang veteran actress sa dami ng assets-properties na kanyang naipundar. Hindi katas ng showbiz ang yaman ng veteran actress, sadya lang siyang masipag, madiskarte, masuwerte at nakapag-asawa ng foreigner na mayaman.

Ang dami-dami niyang properties na nabili — ilang condo units, apartments, resort, farm, atbp.. 

Pero ang nakakatawa, kapag daw may party sa kanyang bahay, ang mga leftovers ng mga bisita ay kanyang iniipon at pinapahugasan sa mga maids, ipinare-recycle ito at iniluluto ulit. ‘Yun daw ang ulam nila nang ilang araw. 

Bawal ding kumuha ng food sa ref ang kanyang mga katulong na hindi nagpapaalam dahil bilang niya ang laman nito.

Iniisnab na lang ng veteran actress ang showbiz at wala siyang balak balikan ang pag-aartista dahil sobra-sobra na ang kanyang kadatungan.

---

Mababago na ang mundo ng talent manager/businessman/influencer na si Wilbert Tolentino kapag lumusot ang Ahon Mahirap Partylist sa 2025 elections kung saan siya ang first nominee. 

Hindi na kasi siya sa showbiz world sasabak, kundi magiging public servant at congressman na. 

Hindi na siya magma-manage ng mga talents tulad nina Herlene Budol, Madam Inutz, atbp..

Ganunpaman, patuloy pa rin daw siyang tutulong at susuporta sa career ng mga dati niyang alagang artista. 

At dahil sa magandang adbokasiya ng Ahon Mahirap Partylist, maraming celebrities ang sumusuporta rito at tumutulong sa pagpo-promote nang walang talent fee, as in libre, tulad nina Regine Velasquez, Katrina Halili, Herlene Budol, Madam Inutz, atbp..

Umaasang makakasama sa Pasko… CARLOS, HINIHINTAY LANG NG MADIR NA MAGPAKUMBABA

ni Erlinda Rapadas @Teka Nga | Dec. 11, 2024

Photo: Angelica at Carlos Yulo - Instagram

Dahil nalalapit na ang Araw ng Pasko, marami ang nag-aabang kung magagawa na ng Paris Olympic gold medalist na si Carlos Yulo ang dumalaw sa kanyang mga magulang at makipag-bonding sa kanyang mga kapatid. 

Hindi naman kailangan na magdala siya ng mamahaling regalo o magbigay ng malaking halaga sa kanyang mga magulang. Sapat na sa kanyang Mama Angelica at Papa Andrew na siya ay makita, mayakap at muling makapiling. Kaligayahan na ng mga magulang na makasama ang kanilang anak, lalo na kapag Araw ng Pasko.

Hindi naman galit at walang sama ng loob ang Nanay Angelica ni Carlos. Lagi nitong idinarasal na sana ay muli niyang mayakap ang anak. Alam ni Nanay Angelica na darating ang tamang panahon na maaayos din kung anuman ang naging problema nilang mag-ina. 

Sabi naman ng ilang netizens na nagmamalasakit, mas lalong susuwertehin sa buhay si Carlos kapag naging mabait sa kanyang mga magulang.

---

Hindinga rin ba nagustuhan ng comedian-TV host na si Vice Ganda ang naging pahayag ni Maris Racal tungkol sa iskandalo ng mga screenshots ng text nila sa phone ni Anthony Jennings na nakunan ng ex-GF nitong si Jamella Villanueva?

Mas nakisimpatya raw si Vice sa ex-GF ni Anthony. Hindi kumbinsido si Vice na hindi alam ni Maris na may relasyon pa sina Jamela at Anthony. Mas pinaniwalaan ni Maris ang sinabi ni Anthony na single ang aktor, kaya naman na-in love rin siya rito.  

Ilang beses ngang nag-deny si Anthony at pinapaniwala niya si Maris na break na sila ni Jamela. 

Samantala, maging ang talent manager-TV host na si Boy Abunda ay nakasilip din ng butas sa naging pahayag ni Maris tungkol sa relasyon nila ni Anthony. 

Dahil dito, hindi madaling intindihin ang sitwasyon ngayon ni Maris. Maging ang publiko ay naaawa sa ex-GF ni Anthony Jennings na inagawan ng boyfriend ni Maris, na tiyak na magmamarka sa pagkatao niya.

---

Ibang klase talaga ang kasosyalan ng fashion icon na si Heart Evangelista, pati ang ginagamit niyang pantaboy ng lamok ay kakaiba at hindi ordinaryong produkto lamang. 

Hindi ito katulad ng nakasanayang katol lamang na ginagamit ng masang Pinoy. Ang gamit ni Heart ay para lang pabango na ini-spray niya sa paligid upang hindi siya dapuan ng lamok. 

Well, lahat na yata ng produkto ay gustong si Heart ang maging endorser. Kaya kahit wala siyang pelikula at regular na soap ay kumikita pa rin siya nang milyones.  

Sa lahat ng artista ngayon, tanging si Heart ang certified na may class at kinikilala sa fashion world abroad. Gustung-gusto siyang kunin ng mga sikat na fashion designers at ng mga world-class na brand ng cosmetics, bags, shoes, at mga damit.

Dahil sa isang business trasaction… JINKEE AT ANNABELLE, FRIENDS NOON, WAR NA NGAYON

ni Erlinda Rapadas @Teka Nga | Dec. 10, 2024

Photo: Jinkee Pacquiao at Anabelle Rama / IG

Ayon sa isang mapagkakatiwalaang source, may lamat umano ang pagkakaibigan nina Jinkee Pacquiao at Annabelle Rama. 

Dati’y suki ni Annabelle si Jinkee sa pagbili ng alahas, ngunit nagkaroon ng problema sa isang business transaction na naging sanhi ng kanilang alitan.  

Kunsabagay, hindi naman hilig ni Jinkee ang showbiz. Masaya na siya sa tahimik at marangyang pamumuhay kasama ang pamilya.  

Hindi rin siya nakikipagkumpitensiya sa kahit sino, at mas pinipili ang mapayapang buhay bilang “First Lady” ni Manny "Pacman" Pacquiao.

---

Natututwa ang mga fans ni Julia Montes dahil aktibo na muli ang aktres sa paggawa ng pelikula, dahilan upang muling sumigla ang kanyang karera. 

Ilang taon ding nagpahinga sa showbiz si Julia, at bagama't hindi niya direktang inaamin, alam ng publiko na mas pinili niya ang tahimik at masayang buhay sa piling ni Coco Martin. 

Ngayon, masaya ang mga tagahanga dahil bumabalik na si Julia sa pag-arte at may basbas pa ito mula kay Coco. 

Una niyang ginawa ang pelikula kasama si Alden Richards. Ngayon naman, sumabak siya sa action-drama film na Topakk kasama sina Arjo Atayde, Sid Lucero, Kokoy de Santos, atbp. sa direksiyon ni Richard Somes.  

Pinuri ni Sylvia Sanchez si Julia dahil wala itong kaarte-arte at kinakaya kahit ang mga mahihirap at delikadong eksena. Kinarir ni Julia ang pagiging “Action Queen”. 

Well, panatag naman si Coco Martin dahil walang kissing o love scenes ang aktres sa pelikulang Topakk. 

Isa ang Topakk sa 10 official entries sa Metro Manila Film Festival (MMFF) 2024.

---

MAHIGIT tatlong dekada na mula nang iwan ni Julie Ann Fortich ang showbiz. Siya ay ini-launch ng Agrix Films at nakasabay nina Azenith Briones at Janet Bordon (SLN). 

Sa kanyang kaarawan kamakailan, dumalo sina Azenith at Daisy Romualdez upang magdiwang kasama niya.  

Si Julie Ann ay nakapareha noon ng ilang sikat na action stars tulad nina Rudy Fernandez at Ace Vergel. Ang kanyang unang pelikula ay Sa Pusod ng Sierra Madre (SPNSM). 

Noong 1982, iniwan niya ang showbiz matapos magdesisyon na bumuo ng sariling pamilya.  

Sa kasalukuyan, dalawang beses na siyang nabiyuda, kaya’t pinili nang huwag magpakasal muli. 

Bagama't kaya pa niyang bumalik sa showbiz, masaya na siya sa kanyang domesticated life.  

Samantala, isang malaking sorpresa para kay Julie Ann ang natanggap niyang ruby earrings mula kay Azenith bilang regalo, patunay ng tunay na pagkakaibigan at pagiging mapagbigay ni Azenith.