ni Erlinda Rapadas @Teka Nga | Dec. 23, 2024
Photo: Sunshine Cruz at Atong Ang - Instagram
Ngayong inamin na sa publiko ni Atong Ang ang relasyon nila ni Sunshine Cruz, maraming kababaihan ang super-inggit na inggit sa magandang kapalaran ng aktres, lalo na’t ipinagpapatayo na raw siya ni Atong ng isang mansion sa isang sosyal na subdivision sa bandang South.
Ang susunod na aabangan ng mga Marites ay ang pagsusuot ni Sunshine ng mga alahas na milyones ang halaga, tulad ng mga jewelries ni Gretchen Barretto na dating na-link kay Atong.
Napaka-generous nito sa mga babaeng nauugnay sa kanya, hindi lang bahay at kotse ang kanyang inireregalo dahil may alahas at trip abroad pa.
Sey naman ng mga netizens, hindi nakakapanghinayang gastusan si Sunshine Cruz dahil bukod sa maganda at sexy, flawless din ang kutis na mala-labanos sa puti at mukhang lagi itong mabango. Masasabing “trophy girlfriend” si Sunshine at puwedeng i-display ni Atong saanman siya pumunta.
Samantala, kahit na hindi pa sila kasal ni Atong, balitang magla-lie-low sa showbiz si Sunshine at hindi muna tatanggap ng anumang project sa telebisyon at pelikula.
Well, tutal ay singer din si Sunshine, bakit hindi niya karirin ang kanyang pagiging singer upang meron siyang pagkaabalahan? Puwede rin niyang tulungan si Atong Ang sa ibang negosyo nito.
Well, marami ang nagsasabing hindi nagkamali si Atong Ang sa pagpili kay Sunshine Cruz dahil maganda ang reputasyon nito at isa pang mabuting ina.
Ayon sa psychic na si Gloria Escoto, maganda ang vibes niya sa pelikulang Uninvited at posibleng maging isang blockbuster sa takilya. Ang ibang movies tulad ng Green Bones (GB) ay magkakamit ng award. Malakas din ang laban ni Dennis Trillo bilang Best Actor.
Sa tuwing ginaganap ang Metro Manila Film Festival (MMFF), ang inaabangan ng lahat ng moviegoers ay mga pelikulang comedy-fantasy, ganoon din ang horror films.
Ganunpaman, may hatak sa mga moviegoers ang mga pelikulang hahakot ng awards sa Gabi ng Parangal ng MMFF 2024.
Inaabangan din ang mga pelikulang mananalo ng major awards tulad ng Best Picture, Best Actress, Best Actor, at Best Director.
Malaking factor din para panoorin ang isang pelikula ang “word of mouth” ng mga moviegoers. Kapag mismong ang nakapanood ng pelikula ang nagsabing maganda ang isang movie, tiyak na magiging curious din ang lahat na ito ay panoorin.
Ang ibang pelikula na hindi gaanong kakagatin sa takilya, babawi na lang sa mga filmfests abroad.
Nagbabayad sa mga na-scam…
NERI, GAGAWIN LAHAT PARA MALINIS ANG NAME
Nakalaya man, malungkot pa rin ang magiging Pasko ng mag-asawang Neri Naig at Chito Miranda dahil sa kinasasangkutang malaking problema ng dating aktres nang dahil sa mga pinasok nitong negosyo.
Balitang nagbebenta ngayon ng mga properties si Neri para maibayad sa mga investors na naghahabol ng interes sa kanilang investments.
Maraming kaibigan naman ang nakikidalamhati sa mag-asawa na biktima rin daw ng negosyanteng dapat ay siyang nananagot sa mga tinakbuhang investors.
Mabigat man ang pinagdaraanan ngayon ng mag-asawa, ang mahalaga ay buo ang tiwala at suporta sa kanila ng kanilang pamilya at mga kaibigan na nagbibigay-lakas sa kanila upang malagpasan ang problemang ito.
Well, strong woman si Neri Naig at hindi ito basta susuko sa mga pagsubok na dumating sa kanilang buhay.
Gagawin lahat ni Neri upang linisin ang kanyang pangalan. Paninindigan niya na wala siyang nilokong tao at isa rin siyang biktima ng mga scammers.
