Mga guro, may P1K bonus sa Teacher's Day

ni Madel Moratillo @News | October 3, 2023

May P900 milyong pondo ang nakapaloob sa 2023 General Appropriations Law para sa World Teachers’ Day Incentive Benefit ng mga guro ngayong taon.

Ayon kay Quezon City 4th District Rep. Marvin Rillo, dapat tumanggap ng P1,000 insentibo ang may 900K public school teachers.

Ayon kay Rillo, para sa 2024 may P912 milyon namang inilaan ang gobyerno.

Ang World Teachers’ Day ay isang international day na idineklara ng United Nations Educational, Scientific and Cultural Organization (UNESCO) at ipinagdiriwang ito tuwing Oktubre 5.

Ito ay pagkilala sa mga guro at kanilang mahalagang papel sa development ng mga bata.

Kasabay nito, isinulong ni Rillo ang pagpasa ng panukala na layong itaas ng 36 percent ang starting pay ng public school teachers.

Sa ilalim nito ay tataas sa P36,619 (Salary Grade 15) ang entry-level monthly pay ng public school teachers mula sa kasalukuyang P27,000 (Salary Grade 11).

Nakasaad din sa panukala ang gawing fix sa P16,000 ang minimum monthly pay ng lahat ng non-teaching personnel ng DepEd.

After 2 years.. Bonus ng titser, ibibigay na

ni Madel Moratillo @News | September 15, 2023

Matatanggap na ng 920,073 guro sa pampublikong paaralan ang kanilang performance-based bonus para sa fiscal year 2021.

Ito ay matapos ilabas na ng Department of Budget and Management (DBM) ang P11.6 bilyong pondo para rito.

Sa isang pahayag sinabi ng DBM na hanggang nitong September 1, 2023, lahat ng kanilang 16 regional offices ay ini-release na ang Special Allotment Release Orders (SAROs) at Notice of Cash Allocations (NCAs) para rito.

Ayon kay DBM Secretary Amenah Pangandaman, kinikilala ng DBM ang extraordinary na trabaho ng mga guro.

Pero para sa non-teaching personnels na nasa ilalim ng Schools Division Offices sa Metro Manila, Cordillera Administrative Region, Central Luzon, Calabarzon, Eastern Visayas, Davao Region, Soccsksargen, at Caraga ibinalik ito sa DepEd para sa revalidation o revision. Ito ay dahil sa ilang concern gaya ng duplicate entries, maling impormasyon, at iba pa.

Dagdag-5K non-teaching, aprub — DBM.. Titser, mababawasan na ng trabaho

ni Mylene Alfonso @News | August 31, 2023

Aprubado na ng Department of Budget and Management ang paglikha ng 5,000 non-teaching positions sa Department of Education.

Ayon kay Budget Sec. Amenah Pangandaman, layunin nitong mabigyan ng sapat na manpower at masuportahan ang mga guro sa pagbibigay ng dekalidad na pagtuturo sa mga estudyante.

Binubuo ang 5,000 items ng 3,500 Administrative Officer (AO) II positions na layuning tanggalin sa mga guro ang administrative tasks na sumusuporta sa mga operasyon.

Habang ang 1,500 Project Development Officer (PDO) I positions ay tutulong sa mga AO II at iba pang non-teaching personnel sa pamamagitan ng pagpapatupad ng ilang programa, proyekto at aktibidad na pinangungunahan ng mga eskwelahan o mandato ng DepEd Central Office.

Nabatid na makatatanggap ang mga nasa AO II at PDO I positions ng basic salary na P27,000 (SG-11) base sa Fourth Tranche Monthly Salary Schedule for Civilian Personnel of the National Government.

"Malaking tulong po ito sa ating mga guro na ma-unload sila sa mga administrative work at maka-focus sa pagtuturo sa mga estudyante,” ayon pa kay Pangandaman.