7 pasahero ng lumubog na bangka sa Tawi-Tawi, nasagip na

ni Zel Fernandez | May 10, 2022

Nailigtas na kagabi ang pitong (7) pasahero ng tumaob na bangka sa karagatan ng Bongao, Tawi-Tawi sa pagsaklolo ng mga tropa ng 2nd Marine Brigade ng Joint Task Force Tawi-Tawi.

Naatasang magsundo at mag-escort sa mga board of election inspector at vote counting machines mula sa Lato-Lato Elementary School ang mga sundalo nang matagpuan nila ang tumaob na bangka sa Brgy. Lato-Lato.

Ayon sa ulat, bandang alas-7:20 ng gabi nang mamataan ng mga sundalo sa laot habang nakakapit sa tumaob na bangka ang pitong biktima na kinilalang sina Nurkaiza Maduid, 42; Nadania Aripin, 31; Sherie Abdulasan, 52; Arzaida Monteron, 33; Apra Tuanpanis, 12; Omar Tuanparis, 29; at Sadeeq Taunparis, 30.

Pawang mga mula sa Brgy. Lamion ang mga biktima na agad dinala ng mga tropa sa headquarters ng 82nd Marine Corps sa Lamion wharf kung saan binigyan ng Forward Support Medical Team (FSMT-33) ng medical assistance ang mga biktima.

Dahil dito, pinapurihan ni 2nd Marine Brigade Commander Brigadier General Romeo Racadio ang mga tropa sa pagresponde ng mga ito sa mga kababayang nangangailangan ng saklolo, habang ginagampanan ang kanilang tungkulin sa araw ng eleksiyon.

19 nasagip sa lumubog na bangka sa Sulu

ni Ronalyn Seminiano Reonico | June 15, 2021

Nasagip ng Philippine Navy (PN) ang 19 katao sa lumubog na bangka sa Banguingui, Sulu noong Linggo nang gabi.

Ayon sa PN, habang papunta sa Ubian, Tawi-Tawi, nagkaroon ng engine failure ang ML Sea Glory dahil sa lakas ng alon sa karagatan sa pagitan ng Basilan at Sulu.

Saad ng PN, "The boat captain said while their vessel was cruising within the vicinity of the northeast off Bitinan Island, Banguingui, Sulu, seawater penetrated the hull of their vessel, which caused the engine to conk out.”

Samantala, kabilang sa 19 na na-rescue ay ang kapitan ng bangka at dinala sila sa 4th Marine Brigade headquarters sa Luuk, Sulu para sa atensiyong medikal.

Kinuha naman ng Maritime Industry Authority (MARINA) ang lumubog na bangka.

P2 M pabuya sa mga pumatay sa Abu Sayyaf leader

ni Ronalyn Seminiano Reonico | May 31, 2021

Pinagkalooban ni Pangulong Rodrigo Duterte ng P2 million ang mga marine troops na sumagip sa Indonesian kidnap victims sa Tawi-Tawi at pumatay sa Abu Sayyaf leader, ayon sa Western Mindanao Command (WestMinCom).

Sa ulat ng WestMinCom, si Armed Forces of the Philippines (AFP) Chief of Staff General Cirilito Sobejana ang naging representante ni P-Duterte sa pagbibigay ng mga medal at monetary reward sa marine troops noong Linggo.

Ipinagkaloob ni Sobejana ang Distinguished Navy Cross award kay Colonel Nestor Narag, Jr. sa pagtupad niya sa kanyang tungkulin bilang Deputy Commander of Joint Task Tawi-Tawi sa isinagawang rescue operations para sa apat na Indonesian kidnap victims sa Kalupag Island, Languyan, Tawi-Tawi noong Marso 21.

Si Narag umano ang nagplano ng operasyon na ikinasawi ng Abu Sayyaf leader na si Majan Sahidjuan a.k.a. Apo Mike at dalawa pa niyang tagasunod.

Saad pa ng WestMinCom, “Col. Narag orchestrated a comprehensive Fleet-Marine operation and provided command and control to the operating sailors and marines who engaged the enemies which resulted in the neutralization of Abu Sayyaf Group leader Majan Sahidjuan, a.k.a. Apo Mike, and two of his followers.”

Tumanggap naman ng Silver Cross Medal ang Special Intelligence Team sa ilalim ng 2nd Marine Brigade “who provided timely intelligence information that led to the successful conduct of focused military and combat clearing operations in Kalupag Island, Languyan and Tandungan Island, Tandubas, all of Tawi-Tawi on March 19 to 24, 2021.”

Pahayag pa ni Sobejana, “We have to make ourselves happy all the time so that we become more productive. I always translate happiness into productivity regardless of where we are.

“To the commanders, let us always strike a good balance on mission accomplishment and the morale and welfare of our soldiers.”

Samantala, isinagawa ang awarding at handing over ng monetary award sa covered court sa loob ng 2nd Marine Brigade headquarters sa Barangay Sanga-Sanga, Bongao, Tawi-Tawi noong May 30.