Newborn baby girl at dalawa pa, nasawi dahil sa COVID-19

ni Jasmin Joy Evangelista | February 8, 2022

Nasawi ang isang bagong silang na sanggol at dalawang iba pa dahil sa COVID-19 complications sa Tarlac, ayon sa provincial government noong Linggo.

Sa latest bulletin, sinabi ng Tarlac government na mula sa bayan ng Concepcion ang 1-day-old baby girl habang ang dalawa ay 52-anyos mula sa Capas at 68-anyos mula sa Gerona.

Nakapagtala ang Tarlac ng 60 bagong kaso ng COVID-19 at 249 recoveries noong Linggo, kung saan ang kabuuang bilang ng active cases ay nasa 504.

Ang Tarlac City ang may pinakamaraming bagong Covid cases — 29, at sinundan ng Capas na may 14 cases at Gerona na may 7 cases.

Pinakamarami ring active cases sa Tarlac City na may 191, sinundan ng Concepcion na may 43 at Paniqui na may 40.

Mula nang magsimula ang pandemya noong 2020, nakapagtala na ang Tarlac ng 22,946 COVID-19 cases, kung saan 21,590 ang naka-recover habang 852 ang namatay.

2 baby kabilang sa bagong kaso ng COVID-19 sa Tarlac

ni Jasmin Joy Evangelista | January 6, 2022

Isang 1-month-old na lalaki mula sa bayan ng Camiling at isang 1-year-old na lalaki rin mula sa Tarlac City ang kabilang sa 20 bagong kaso ng COVID-19 na naitala sa Tarlac.

Ayon sa datos mula sa Tarlac COVID-19 Task Force noong Enero 4, nakapagtala ng 13 bagong Covid cases ang Tarlac City. Ang ilan pang bayan na may bagong kaso ay Camiling (2), Moncada (2), Paniqui (1), Capas (1), at Victoria (1).

Mayroon namang 7 recovery sa lalawigan habang isa ang namatay noong Martes. Ang nasawi ay isang 83-anyos na lalaki mula sa bayan ng Concepcion.

Ang Tarlac City ang may pinakamaraming active cases (45), at sinundan ng Capas at Concepcion na may tig-8 na active case, habang ang Gerona at Paniqui ay mayroong tig-7.

Noong Lunes, isang 9-month-old na babae, 1-year-old na babae, at dalawa pang bata ang kabilang sa 26 na bagong kaso ng COVID-19 sa Tarlac.

Mula nang magsimula ang pandemya noong 2020, nakapagtala na ang Tarlac ng 19,106 cases kung saan 18,167 dito ang gumaling, habang 839 ang nasawi.

40 taong kulong sa pulis na pumatay sa mag-inang Gregorio

ni Lolet Abania | August 26, 2021

“Guilty” ang naging hatol ng korte ng Tarlac sa sinibak na pulis na si Jonel Nuezca dahil sa pagpatay nito sa mag-ina na kanyang nakaalitan noong nakaraang Disyembre sa nasabing lugar.

Matatandaang naging kontrobersiyal ang kasong ito matapos mag-viral sa social media ang nakunan ng video na pagpatay ng pulis sa mag-ina.

Sinentensiyahan ni Judge Stela Marie Asuncion ng Paniqui, Tarlac Regional Trial Court Branch 106 si Nuezca ng “reclusion perpetua,” o pagkakakulong ng hanggang 40 taon.

Pinagbabayad din si Nuezca ng halagang P952,560 bilang danyos.

Disyembre 20, 2020 nang magkaroon ng pagtatalo sina Nuezca at mag-inang Sonia at Frank Anthony Gregorio sanhi ng ingay ng putok ng “boga.”

Bago nito, una nang nagkaroon ng hidwaan si Nuezca at pamilya Gregorio hinggil sa “right of way” sa kanilang lugar.

Si Nuezca ay nakatalaga noon sa Parañaque City crime laboratory subalit umuwi sa kanyang bahay sa Paniqui, Tarlac.

Agad ding sinibak si Nuezca bilang pulis matapos ang krimen.

Una rito, naghain ng “not guilty” plea si Nuezca sa kasong murder na kinaharap niya. Sa naging desisyon ng korte, nakasaad na hindi batid ng mga biktima na may baril ang pulis sa mga sandali ng pagtatalo.

“The suddenness and succession of shots fired by the accused indeed rendered the said victims helpless to retaliate the attack made by the accused,” pahayag ng korte.

“These fatal wounds that [cost] the lives of the victims are indeed treacherous,” dagdag pang pahayag.

Sa isang interview sa abogado ng mga biktima na si Atty. Freddie Villamor, sinabi nitong masaya at ikinatuwa ng pamilya Gregorio ang agarang pagdinig ng hukom sa kaso.