Drayber ng hit-and-run incident, inisyuhan na ng lookout order

ni Lolet Abania | June 14, 2022

Nag-isyu na ng isang lookout bulletin order ang Department of Justice (DOJ) sa Bureau of Immigration (BI) laban sa drayber ng SUV na sumagasa sa isang security guard sa Mandaluyong City noong nakaraang linggo.

Sa isang mensahe sa mga reporters ngayong Martes, sinabi ni DOJ Secretary Menardo Guevarra na ang lookout bulletin ay kanilang inisyu ng tanghali.

Ipinahayag naman ni Prosecutor General Benedicto Malcontento kaninang umaga na hiniling na ng Mandaluyong Prosecutor’s Office ang isang Immigration lookout order laban sa SUV driver.

Gayundin, sa isang television interview kay Philippine National Police (PNP) officer-in-charge Police Lieutenant General Vicente Danao Jr., sinabi nitong ni-request na rin nila sa DOJ na mag-isyu ng kahalintulad na order.

“We already requested from DOJ on the immigration bulletin lookout para magkaroon ng hold departure order sa kanya,” paliwanag ni Danao. “It will be coming out very soon para hindi po siya makalabas ng bansa,” dagdag ni Danao.

Matatandaan noong Hunyo 6, ang biktimang sekyu na si Christian Joseph Floralde ay sinagasaan ng isang SUV habang nagmamando ito ng trapiko sa intersection ng Julia Vargas Avenue at St. Francis Street sa Mandaluyong bandang alas-4:00 ng hapon. Unang binundol saka sinagasaan si Floralde ng isang White Toyota RAV5 na may license plate NCO 3781.

Agad na tumakas ang drayber sa pinangyarihang lugar matapos ang insidente sa halip na tulungan ang biktima. Nitong Lunes, ni-revoke na ng Land Transportation Office (LTO) ang lisensiya ng sinasabing drayber na si Jose Antonio V. Sanvicente, matapos na bigong magpakita ito sa LTO ng maraming beses sa kabila ng ibinabang show cause orders dito.

Ayon kay Guevarra, isang reklamo na rin ang inihain laban sa drayber para sa frustrated murder at paglabag sa Article 275 ng Revised Penal Code.

Batay sa nakasaad sa Article 275, “the penalty of arresto mayor will be imposed upon those who fail to render assistance to those who he has accidentally wounded or injured, among others.” Sinabi naman ni Danao na base sa kanilang latest monitoring, si Sanvicente ay hindi pa nakakalabas ng bansa.

Driver ng SUV na bumundol sa guwardiya ng mall, tukoy na; hearing sa Hunyo 7 — LTO

ni Lolet Abania | June 6, 2022

Nag-isyu na ang Land Transportation Office-National Capital Region (LTO-NCR) ngayong Lunes ng umaga ng isang show cause order laban sa driver ng SUV na sangkot sa hit-and-run ng isang guwardiya ng mall sa Mandaluyong City na naganap nitong Linggo ng hapon.

Ito ang kinumpirma ni LTO-NCR Regional Director Atty. Clarence Guinto sa isang radio interview, kung saan aniya, naitakda ang hearing sa Martes, Hunyo 7.

“We scheduled the hearing this week and hopefully the driver and the owner would appear in the hearing. We are, of course, observing due process, ‘yung notice of hearing,” sabi ni Guinto.

Nagpapagaling naman ang biktimang security guard na si Christian Joseph Floralde sa ospital sa Mandaluyong matapos na ma-hit and run ng isang SUV habang nagdi-direct ito ng trapiko.

Unang sinabi ng Mandaluyong Police na isang White Toyota RAV 4 na may plate number NCO 3781 ang sangkot sa insidente ng hit-and-run, na naganap bandang alas-4:00 ng hapon nitong Linggo sa intersection ng Julio Vargas Avenue at St. Francis St. sa Mandaluyong, at subject para sa validation ng LTO.

Hindi naman pinangalanan ni Guinto ang suspek na driver ng SUV dahil aniya sa Data Privacy Law, subalit sinabi niyang isa itong Pilipino. Gayundin, dinedetermina pa ng LTO kung ang driver ay siya ring may-ari ng sasakyan.

Pinasalamatan naman ni Guinto, ang mga netizens na nag-upload ng video ng naturang insidente. Ayon kay Guinto, ang pinakamataas na penalty na maaaring maibigay ng LTO laban sa suspek na driver ay revocation ng driver’s license nito.

“May isang high resolution video cam na na-identify ‘yung plate number so we were able to get the details in our system ng kung sino ang may-ari ng motor vehicle na ‘yun,” sabi ni Guinto.

Ayon naman kay Mandaluyong Police chief Col. Gauvin Unos, ang driver ng SUV na bumundol at sumagasa pa sa guwardiya ng mall, kung saan nakuhanan din ng video ang insidente at nag-viral sa social media ay posibleng sampahan umano ng kasong frustrated murder.

Samantala, sinabi ng partner ni Floralde na si Arceli Flores, nahihirapan umano ang biktima na huminga dahil sa tinamong pinsala sa gitnang bahagi ng kanyang katawan.

Kasalukuyang binigyan ang biktima ng oxygen support, habang nagtamo rin ng mga sugat sa kanyang ulo.

SUV, inararo papasok ang bangko, empleyado sugatan

ni Lolet Abania | March 17, 2021

Inararo ng sports utility vehicle (SUV) ang isang bangko sa Quezon City na nagresulta sa pagkakasugat ng isang empleyado nito ngayong Miyerkules.

Sa ulat ng Quezon City Police District, kinilala ang driver na si Esther Peralta, 64-anyos, isang doktor, na aksidenteng naapakan ang accelerator kesa ang brake ng kanyang kotse habang paalis na mula sa parking space ng bangko sa may Congressional Avenue sa kahabaan ng EDSA Northbound sa Barangay Ramon Magsaysay, Quezon City kaya dire-diretsong sinuyod nito ang loob ng bangko bandang alas-8:00 ng umaga.

Umabot ang SUV hanggang sa counter ng bangko dahilan kaya nasira ang ilang gamit sa loob nito gaya ng ATM at mga computers.

"Nag-withdraw siya sa ATM. When she left around 7:30 AM, paalis na siya, eh, paatras po siya, naramdaman niya po 'yung sasakyan niya na pasulong," ayon sa imbestigador na si Police Staff Sgt. Ruel Ang. "Pinatay niya po ang engine niya, then tinry niyang ikambiyo sa park.

She started again, then the vehicle moved forward. Bumulusok na po siya tuluy-tuloy," sabi pa ni Ang. Kinilala ang biktimang si Aileen Marco, 44-anyos, bank employee, na nasugatan sa insidente at agad ding dinala sa East Avenue Medical Center habang hindi naman nasaktan ang driver na doktor.

Ayon pa sa mga awtoridad, maaaring maharap sa reklamong reckless imprudence resulting in damage to property with slight physical injury ang babaeng driver. Inaalam na rin ng pulisya ang sanhi ng pagbulusok ng sasakyan.