SC: Gov't officials at workers, may chance itama ang SALN

ni Madel Moratillo @News | August 11, 2023

Dapat umanong mabigyang pagkakataon ang mga opisyal at empleyado ng gobyerno na maitama ang mga error, omissions at non-submissions sa Statements of assets, liabilities and net worth o SALN.

Ang pagbabago sa interpretasyon ng rules sa submission ng SALN ay nakapaloob sa bagong desisyon ng Korte Suprema patungkol sa kaso ni Jessie Javier Carlos, dating empleyado ng Department of Finance na nasibak matapos maakusahan ng pagtatago ng milyong halaga ng ari-arian at hindi pagdedeklara nang tama sa kanyang SALN.

Pero sa desisyon ng SC, sinabi na nagkamali ang Court of Appeals sa hatol na guilty noong 2016 kay Carlos sa kasong dishonesty.

Kasama sa pinababaliktad ng SC ang parusang dismissal sa serbisyo, kanselasyon ng eligibility, pagbawi sa retirement benefits at habambuhay na diskwalipikasyon sa paghawak ng pwesto sa gobyerno.

Ito ay matapos mapatunayan ng SC na hindi nabigyan ng pagkakataon si Carlos na maitama ang mga pagkakamali at pagkukulang sa kanyang SALN. Sabi ng SC, sa ilalim ng probisyon ng RA 6713 o Code of Conduct and Ethical Standards for Public Officials and Employees dapat tignan ng review and compliance committee kung nakapagsumite ng SALN nang tama sa oras, kumpleto ito at tama.

Kung hindi nai-file nang tama sa oras ang SALN, incomplete at may mali, dapat bigyan ng 5 araw ang opisyal o empleyado para maitama ang pagkakamali sa loob ng 30 araw.

Kung mabibigo, saka lang ito data patawan ng parusa.

Matatandaang si Carlos ang itinurong nagsunog at namaril sa Resorts World Hotel sa Pasay noong 2017 kung saan halos 40 ang nasawi.

PAO Chief, nag-sorry sa SC

ni Madel Moratillo @News | July 15, 2023

Humingi ng paumanhin si Public Attorneys’ Office Chief Persida Rueda-Acosta kaugnay sa kanilang mga naging pagkontra sa probisyon ng bagong Code of Professional Responsibility and Accountability patungkol sa conflict of interest.

Narito ang liham ni Acosta sa Korte Suprema:

Mga minamahal naming mahistrado/justices of the Supreme Court, sa ngalan po ng aming mga abogado sa Public Attorney’s Office at ng inyong hamak na lingkod, ako po ay buong pagpapakumbaba at marespetong humihingi sa inyo ng taos sa pusong paumanhin kung kayo man po ay nasaktan sa mga pangyayari. Humihingi po kami ng inyong lubos na pang-unawa.

Ang amin pong mga sinabing mga argumento ay dala lamang po ng aming lubos na pagnanasa na pagsilbihan nang lubusan ang aming mga kliyente at ang mga mahihirap na nangangailangan, na siya ring aming tinuturo sa aming mga kasamang mga abogado.

Kaya kami po ay nangamba sa maaaring idulot nito sa aming mga kliyente at abogado.

Muli po, lubos po ang aming respeto at pagmamahal sa Korte Suprema na siyang aking naging unang kanlungan at tahanan sa pagseserbisyo sa publiko mula pa noong 1988 o humigit kumulang 35 taon na ang nakakaraan.

Taos sa pusong paumanhin po... makakaasa po kayo na ang mga Public Attorneys ay susunod sa "Section 22 in relation to Sections 13 at 18, Canon 3" ng Code of Professional Responsibility. Maraming salamat po at Mabuhay ang Supreme Court of the Republic of the Philippines.

Una na ring naglabas si Acosta ng kautusan sa kanilang mga abogado na sumunod sa kautusan ng Korte Suprema.

SC, nagdesisyon na sa agawan sa teritoryo.. Mayor Abby, fake news! — Taguig

ni Mylene Alfonso | June 11, 2023

Nagpahayag ng pagkaalarma ang lokal na pamahalaan ng Taguig kaugnay sa ipinalalabas na pagbubukas muli ng Taguig-Makati territorial dispute bagama't pinal na itong nadesisyunan ng Korte Suprema.

Sa isang pahayag na ipinalabas ng Taguig City, sinabi nito na tinuring lamang nila na “fake news” ang mga unang kumakalat na social media posts na nagsasabing nakausap ni Makati City Mayor Abby Binay sina Pangulong Ferdinand Marcos, Jr., First Lady Liza at Chief Justice Alexander Gesmundo para muling buksan ang kaso ng territorial dispute.

Gayunman nang sundan umano ito ng panayam kay Binay noong Hunyo 7, 2023 at sinabi nitong mayroong natanggap na dokumento mula sa Korte Suprema ang Makati City na nagtatakda ng oral argument ay ito na ang nakakaalarma dahil wala umano itong katotohanan, sa katunayan walang natatanggap na kautusan ang Taguig hinggil dito.

Pinunto pa ng Taguig na mismong si SC Spokesman Atty. Brian Keith Hosaka ang naglinaw na walang itinatakdang oral arguments hinggil sa territorial dispute dahil nagkaroon na ng Entry of Judgement sa kaso.

“Mayor Binay’s statement during her interview is unfortunate. Not only is it factually inaccurate, but it likewise tends to tarnish the integrity and independence of the judiciary. We ask the Honorable Supreme Court to take notice of these claims from Makati and consider appropriate action,” giit pa ng Taguig.

Giit pa na mahaba ang tinakbo ng kaso at anumang naging desisyon sa kaso ay dapat na igalang.

Ang final and executory decision sa Makati-Taguig dispute ay ipinalabas ng SC noong Setyembre 28, 2022 matapos nitong ibasura ang Motion for Reconsideration ng Makati City, sa nasabing desisyon, sinabi ng SC na wala nang anumang pleadings, motions, letters o anumang komunikasyon ang tatanggapin na may kaugnayan sa usapin.

Maging ang apela ng Makati na iakyat sa SC en banc ang kaso ay ibinasura rin sa kawalan ng merito at ang tangka nitong paghahain ng ikalawang Motion for Reconsideration ay hindi pinapayagan sa rules of procedure.

Nilinaw ng Taguig na may kumpiyansa ito sa national leadership subalit ang ikinababahala nila ay ang negatibong epekto sa isip ng mga residente sa mga pahayag ng Makati City ukol sa isyu.

Bumuwelta rin ang Taguig sa pahayag ni Binay na hindi kayang ibigay ng lokal na pamahalaan ang mga naibibigay ng lungsod gaya ng Makati sa mga residente nito.

“We assure Mayor Binay and the residents of the concerned barangays that Taguig has its own programs and projects which deliver efficient and timely public services aimed at attaining our vision for a transformative, lively, and caring community."