'Pinas, nasa State of Calamity dahil sa ASF

ni Lolet Abania | May 11, 2021

Isinailalim ngayon ni Pangulong Rodrigo Duterte ang buong bansa sa state of calamity dahil sa matinding krisis na nararanasan ng bansa sa African swine fever (ASF), partikular na sa hog industry.

Ito ang kinumpirma ni Presidential Spokesperson Harry Roque sa ilalim ng Presidential Proclamation 1143 na inisyu nitong Lunes at inilabas ngayong Martes.

Nakasaad sa Proclamation 1143, na simula nang unang naiulat ito sa bansa noong 2019, ang ASF ay labis na nakaapekto sa 12 rehiyon, habang nagdulot ito ng matinding pagbaba ng populasyon ng tinatayang tatlong milyong baboy na nagresulta rin sa mahigit P100 bilyong halaga ng pagkalugi sa mga local hog sectors at allied industries at pagtaas ng bentahan ng mga pork products.

“There is hereby declared a State of Calamity throughout the Philippines on account of the ASF outbreak, for a period of one year beginning this date, unless earlier lifted or extended as circumstances may warrant,” ayon sa proclamation.

Dagdag pa rito, ang pagdedeklara nito sa bansa ay makapagbibigay sa pamahalaan at sa mga local government units (LGUs) ng panahon para magkaroon ng kaukulang pondo, kabilang na ang Quick Response Fund at upang matugunan ang problema sa patuloy na pagkalat ng ASF at para maibalik sa normal ang mga lugar na apektado ng ASF.

“There is an urgent need to address the continued spread of ASF and its adverse impacts, to jumpstart the rehabilitation of the local hog industry, and to ensure the availability, adequacy and affordability of pork products, all for the purpose of attaining food security,” nakapaloob sa proclamation.

“All government agencies and LGUs are enjoined to render full assistance to and cooperation with each other , and mobilize the necessary resources to undertake critical, urgent and appropriate measures in a timely manner to curtail the further spread of ASF, address the supply deficit in pork products, reduce retail prices, and jumpstart the rehabilitation of the local hog industry,” pahayag sa proclamation.

206 cases ng COVID… Isabela, state of calamity na, humirit pa ng mas mahigpit na lockdown

ni Mary Gutierrez Almirañez | March 27, 2021

Umapela si Mayor Jonathan Calderon upang ilagay sa mas mahigpit na lockdown ang bayan ng Roxas, Isabela na kasalukuyang nasa state of calamity matapos makapagtala ng 206 na kumpirmadong kaso ng COVID-19, batay sa naging panayam sa alkalde kaninang umaga, Marso 27.

Aniya, “Inaapela na po namin ito kung puwedeng maitaas ang kategorya ng quarantine status ng ating munisipalidad. Kailangan ito ng provincial at regional IATF para po sa concurrence.”

Sa ngayon ay nasa ilalim ng general community quarantine (GCQ) ang munisipalidad at nagdeklara sila ng state of calamity, kung saan 5 sa pribadong ospital, 20 clinics at isang district hospital ay napuno na ng mga pasyenteng may virus.

Paliwanag ng alkalde, “Alam natin na meron tayong pondo na hindi basta-basta puwedeng gamitin.

Sa katunayan, sa lokal na pamahalaan ng Roxas, meron lang po kaming maliit na pondo na maaaring hindi sapat ‘yung aming in-allot para sa COVID.”

Dagdag pa niya, “Ang aming bayan o public market ay hindi lamang kine-cater itong bayan ng Roxas kundi as many as 8 municipalities ang aming sine-serve dito at merong mga probinsiya gaya ng Kalinga, Mountain Province at part of Ifugao na bumababa sa aming bayan.”

Sa huling tala ay mahigit 71 ang nadagdag na nagpositibo sa virus, habang 21 ang gumaling at 2 ang pumanaw. Umaasa si Mayor Calderon na mare-reclassify ang kanilang lockdown status upang mapigilan ang pagkalat ng COVID-19 sa kanilang lugar.

162 COVID positive, Roxas, Isabela, nasa state of calamity

ni Ronalyn Seminiano Reonico | March 25, 2021

Idineklara ang state of calamity sa bayan ng Roxas, Isabela ngayong Huwebes dahil sa paglobo ng kaso ng COVID-19. Nakapagtala ang munisipalidad ng 162 kumpirmadong kaso ng COVID-19 at 83 pa ang hinihinalang positive cases.

Pahayag naman ng Sangguniang Bayan, “[T]he declaration of a state of calamity will afford this local government unit (LGU) the necessary resources to undertake critical appropriate disaster responses and measures in a timely manner, or utilize appropriate funds.”

Ayon sa Sangguniang Bayan, kritikal na ang risk classification sa Roxas dahil sa naiulat na 441.70% pagtaas ng kaso simula noong February 18 hanggang March 18.

Saad naman ng munisipalidad ng naturang lugar, “[C]ases are expected to increase in the coming days upon completion of the ongoing contract tracing, surveillance, and antigen testing.”

Samantala, ngayong araw ay nakapagtala ang Department of Health (DOH) ng pinakamataas na bilang ng kaso ng COVID-19 na 8,773. Sa kabuuan, pumalo na sa 693,048 ang naitalang kaso ng COVID-19 sa Pilipinas kung saan 99,891 ang active cases.