@Buti na lang may SSS | September 13, 2020
Dear SSS,
Kung nawala o hindi na matandaan ng miyembro ang kanyang SS number, dapat ba siyang kumuha ng bagong SS number? Salamat! – Ricky
Sagot
Mabuting araw sa iyo, Ricky!
Hindi na dapat kumuha ng bagong SS number ang miyembro kung nakalimutan o kahit nawala pa niya ito. Ang inisyung SS number sa miyembro ay panghabambuhay at ito lang ang dapat niyang gamitin sa lahat ng magiging transaksiyon niya sa SSS. Kung hindi na niya matandaan o kaya’y nawala niya ang kopya ng kanyang E1 o Personal Record Form kung saan nakasaad ang SS number, pinapayuhan namin siya na magtungo sa pinakamalapit na sangay ng SSS upang ipaberipika ang kanyang SS number.
Mahalaga na iisa lamang ang SS number ng miyembro sapagkat ang pagkakaroon ng higit sa isang SS number ay magdudulot lamang ng pagkaantala sa pagpoproseso ng kanyang benepisyo o pautang sa hinaharap.
Gayunman, kung nasumpungan na higit sa isa ang SS number ng miyembro, dapat niyang hilingin sa SSS na kanselahin ang sobrang SS number. Upang maisaayos ang kanyang rekord, ang lahat ng kanyang kontribusyon mula sa mga kinanselang SS number ay pagsasamahin sa SS number o retained SS number. Ililipat din sa retained SS number ang lahat mga rekord ng miyembro tulad ng employment history, monthly salary credit, benefit claim, talaan ng utang at date of coverage.
Natutukoy ang retained SS number batay sa sumusunod: naisyuhan ng SS ID/Unified Multi-purpose Identification (UMID), o may nakabinbing application para sa UMID card; may pinakamaraming bilang ng nai-post na kontribusyon; may pinakabagong nai-post na kontribusyon, o SS number na pinakaunang naisyu.
Kapag nabigyan ka na ng SS number, hindi na nila maaaring maitama ang nailagay mong datos gamit ang online system. Maaari lamang itong baguhin gamit ang Member’s Data Change Request kalakip ang mga kaukulang dokumento at isumite ito sa alinmang sangay ng SSS.
Hinihikayat namin ang aming mga miyembro na magrehistro sa My.SSS upang masubaybayan nilang mabuti ang kanilang rekord kabilang na ang pagpo-post ng mga naihulog na kontribusyon. Maaari ring silang makipagtransaksiyon sa SSS gamit ang My.SSS tungkol sa kanilang benepisyo. Ito ay matatagpuan sa SSS website, www.sss.gov.ph.
Dagdag pa dito, maaari ring i-download ang SSS Mobile App sa Play Store gamit ang Android Phone o App Store para sa mga may iPhone. Mula sa app na ito, maaaring makuha ng miyembro ang Payment Reference Number o PRN na kailangan sa paghuhulog ng kontribusyon. Ang ilan pa sa mga transaksiyon na maaaring gawin gamit ang mobile app ay ang pagpa-file ng salary loan, pagsumite ng maternity notification, at pag-update ng contact information ng miyembro tulad ng landline, mobile number, email address at mailing address.
Ito ay bahagi ng programang ExpreSSS Service ng SSS na naglalayong maging mas simple, mas pinadali at mas pinabilis ang transaksiyon ng mga miyembro sa SSS. Sa tulong nito mabibigyan ng SSS ng 24/7 na serbisyo ang mga miyembro nito sa gitna ng COVID-19 pandemic.
◘◘◘
Para sa tamang impormasyon at updates sa mga programa at benepisyo ng SSS, hinihikayat namin ang mga miyembro at employer na bisitahin at i-follow ang opisyal na Facebook page ng SSS sa “Philippine Social Security System” o sa aming Twitter account sa @PHLSSS. Maaari ding mag-subscribe sa aming YouTube channel sa “Philippine Social Security System.”
◘◘◘
Kung mayroon kayong mga katanungan ukol sa SSS o kaya ay mayroon kayong paksa na nais talakayin sa pitak na ito, maaari kayong magpadala ng e-mail sa mediaaffairs@sss.gov.ph.