Michael Regino, bagong pangulo ng SSS — Malacañang

ni Lolet Abania | March 11, 2022

Hinirang ni Pangulong Rodrigo Duterte si Michael Regino bilang pangulo ng Social Security System (SSS), ayon sa Malacañang ngayong Biyernes.

Batay sa kanyang profile sa SSS website, bago ang kanyang appointment, si Regino ay isang commissioner ng Social Security Commission (SSC), na nagsisilbi bilang governing board ng SSS, at director din ng Unionbank of the Philippines at Philex Mining Corporation.

Kinumpirma rin ng Malacañang, ang appointment naman ng abogadong si Dante Vargas bilang Deputy Ombudsman for the Visayas. Ibinigay kay Vargas ang nasabing posisyon, kung saan kabilang sa pinagpilian sina retired Commission on Elections (Comelec) Commissioner Rowena Guanzon at Beda Epres ng Office of the Ombudsman.

Maililipat sa legal na asawa ang pensiyon ng namatay na SSS member

@Buti na lang may SSS | March 7, 2022

Dear SSS,

Nais kong itanong ang SSS death benefit claim ng tatay ko. Namatay siya noong January 19, 2021. Makukuha ba ng Nanay ko ang pensiyon ni Tatay? May una siyang pinakasalan, gayundin si Nanay. Maililipat ba ang pensiyon ni Tatay sa kanya? – Sonia

Sagot

Mabuting araw, Sonia!

Ang pagkakasunud-sunod o order of preference ng mga benepisaryo ng miyembro ng SSS ay ang mga sumusunod: Una, primary beneficiaries o pangunahing benepisaryo na tumutukoy sa legal na asawa at menor-de-edad na anak, kasama ang legal na ampon at incapacitated; ikalawa, secondary beneficiaries na binubuo ng mga magulang ng namayapang miyembro kung siya ay single o walang asawa; ikatlo, designated beneficiaries o ang at itinalaga ng miyembro bilang kanyang benepisaryo sa SS Form E-1/E4; at ikaapat, ang Legal heirs o mga legal na tagapagmana ng namatay na miyembro na naaayon sa Civil Code of the Philippines.

Sa ilalim ng Republic Act 11199 o ang Social Security of 2018, ang may karapatan sa batas na makatanggap ng death benefit ng miyembro ay tanging ang mga legal na benepisaryo ng SSS, tulad ng ating nabanggit.

Kung ang namatay na miyembro ay pensiyunado, ililipat ang pensiyon nito sa kanyang legal na asawa na katumbas ng 100 porsiyento na tinatanggap ng namayapang miyembro. Kung may anak naman siya na wala pang 21 taong gulang, makatatanggap ang kanyang anak ng dependents’ pension. Ito ay katumbas ng P250 kada bata o 10% ng basic monthly pension, alinman ang mas mataas. Samantala, maaari itong ipagkaloob sa limang menor-de-edad na anak, simula sa pinakabata, ngunit walang kaukulang substitution. Matitigil lamang ang benepisyong ito kapag umabot na siya ng sa 21 taong gulang, nakapag-asawa, nakapagtrabaho o kaya ay namatay.

Sa kaso ng iyong namayapang ama, Sonia, hindi maituturing na benepisaryo ang iyong nanay dahil hindi siya ang legal na asawa ng iyong tatay. Idagdag pa rito, may ibang asawa rin ang iyong nanay. Kaya hindi siya kuwalipikadong tumanggap ng pensiyon mula sa SSS.

Kung wala nang menor-de-edad sa inyong magkakapatid, maaari kayong makatanggap ng nalalabing balanse ng inyong tatay na nakapaloob sa five-year guaranteed period kung hindi pa nakalalagpas ng limang taon ang pagtanggap ng pensiyon ng miyembro. Sa ilalim ng five-year guaranteed period, kapag ang miyembro ng SSS na nakatatanggap ng retirement pension o total permanent disability pension ay mamatay bago pa umabot sa limang taon ng kanyang pagtanggap ng pensyon, ang balanse nito ay ibibigay sa mga secondary, designated o legal heirs na babayaran sa pamamagitan ng lumpsum benefit.

◘◘◘

Nais naming ipaalam sa ating mga miyembro na noong Nobyembre 15, 2021 ay binuksan na ang aplikasyon para sa Short-Term Member Loan Penalty Condonation Program o ang Pandemic Relief and Restructuring Program 5. Sa ilalim nito, hindi na kailangang bayaran ng miyembro ang mga naipong multa o penalties sa hindi niya nabayarang utang sa SSS tulad ng salary loan, Calamity loan, Salary Loan Early Renewal Program (SLERP), Emergency loan at restructured loans sa ilalim ng Loan Restructuring Program (LRP) na ipinatupad noong 2016 hanggang 2019.

Maaaring mag-apply ang interesadong miyembro hanggang Pebrero 14, 2022 at mag-file ng application gamit ang kanilang My.SSS account.

Bukod dito, binuksan din ng SSS ang Housing Loan Restructuring and Penalty Condonation Program o ang Pandemic Relief and Restructuring Program 4 noong Nobyembre 22, 2021. Sa ilalim nito, hindi na kailangang bayaran ng miyembro o mga tagapagmana nito ang mga naipong multa o penalties sa hindi nabayarang housing loan. Maaari silang mag-file ng aplikasyon sa SSS Housing and Acquired Asset Management Department na nasa SSS Main Office sa Quezon City at sa Housing and Acquired Asset Management Section ng piling sangay ng SSS sa labas ng Metro Manila. Tatagal ang pagtanggap ng aplikasyon hanggang Pebrero 21, 2022.

---

Para sa tamang impormasyon at updates sa mga programa at benepisyo ng SSS, bisitahin at i-follow ang opisyal na Facebook page ng SSS sa “Philippine Social Security System” o sa Twitter account sa @PHLSSS. Maaari ding mag-subscribe sa YouTube channel sa “Philippine Social Security System” at sumali sa SSS Viber Community, “MYSSSPH Updates.”

Kung mayroon kayong katanungan tungkol sa SSS o kaya ay mayroon kayong paksa na nais talakayin sa pitak na ito, maaari kayong magpadala ng e-mail sa mediaaffairs@sss.gov.ph.

Deadline ng pagtanggap ng aplikasyon para sa Condonation of Penalties on SS Contributions

@Buti na lang may SSS | March 6, 2022

Dear SSS,

Ako ay business owner sa Quezon City. Nabasa ko sa post sa inyong Facebook mayroon kayong condonation ng penalties para sa kontribusyon na hindi nahulugan bunsod ng krisis sa ekonomiya dahil sa kasalukuyang pandemya. Nais kong itanong kung paano ang aplikasyon para rito? - Shawn

Sagot

Mabuting araw sa iyo, Shawn!

Para sa iyong kaalaman, naglunsad ang SSS ng mga programa sa ilalim ng Pandemic Relief and Restructuring Programs (PRRP) upang matulungan ang mga miyembro at employer na may pagkakautang sa SSS na higit na naapektuhan ng pandemya.

Isa nga rito ang Condonation of Penalties on Social Security Contributions o PRRP 2. Sa ilalim ng nasabing programa, tatanggalin ang penalties o multa na ipinapataw sa isang delingkuwenteng employer. Ang tinutukoy natin ay mga employer na hindi nakakpaagbayad ng kanilang SSS contributions para sa mga empleyado nito sa mismong araw o bago ang takdang petsang ng pagbabayad nito. Kabilang din sa kategoryang ito ang mga employer na nakapagbayad na ng kontribusyon, ngunit hindi nabayaran ang naiwang penalties. Pati ang mga household employers na hindi nakapagbayad ng kontribusyon kanilang mga kasambahay.

Inilunsad ang PRRP 2 upang matulungan ang mga employer na makabangon at tuparin ang kanilang mga obligasyon sa kabila ng ating kinahaharap na pandemya. Sa ilalim nito, bibigyan sila ng pagkakataong mabayaran ang kontribusyon ng kanilang manggagawa ng hindi kinakailangang bayaran ang mga naipong multa.

Sakop ng nasabing programa ang mga employer na hindi nakababayad ng kontribusyon sa SSS at penalties simula noong Marso 2020 hanggang sa kasalukuyang mga buwan.

Shawn, may dalawang paraan ng pagbabayad ng delinquency, tulad ng sumusunod:

1. Maaaring bayaran ang kabuuang halaga ng contribution delinquency sa opisina ng SSS o awtorisadong collection agent ng SSS tulad ng accredited banks, payment centers/partners sa loob ng 15 araw mula nang matanggap ang Notice of Approval galling sa Social Security Commission (SSC). Halimbawa, kung ang Notice of Approval na galing sa SSC ay natanggap mo noong Marso 4, 2022 at ang kabuuang halaga ng iyong delinquency base sa pagtutuos ng SSS ay P100,000 kinakailangan mong bayaran ang kabuuang halagang ito hanggang Marso 19, 2022.

2. Maaari ring bayaran ang contribution delinquency sa pamamagitan ng approved installment. Kinakailangan lamang na magbigay ka ng paunang bayad na hindi bababa sa 5% ng halaga ng iyong principal na delinquency. Ang naiwang balanse ay babayaran mo naman sa loob ng 24 buwan o katumbas ng dalawang taon batay sa halaga ng iyong delinquency. Ito ay papatawan ng 6% interes kada taon.

Maaaring magsumite ng iyong aplikasyon sa alinmang sangay ng SSS o sa Large Accounts Department (LAD)na matatagpuan sa 10/F, SSS Building, East Avenue, Diliman, Quezon City na may hawak ng iyong account hanggang Mayo 14, 2022.

***

Nais nating ipaalam sa ating mga miyembro na pinalawig ang application period ng Short-Term Member Loan Penalty Condonation Program o ang Pandemic Relief and Restructuring Program 5 hanggang May 14, 2022. Sa ilalim nito, hindi na kailangang bayaran ng miyembro ang mga naipong multa o penalties sa hindi niya nabayarang utang sa SSS gaya ng salary loan, Calamity loan, Salary Loan Early Renewal Program (SLERP), Emergency loan at restructured loans sa ilalim ng Loan Restructuring Program (LRP) na ipinatupad noong 2016 hanggang 2019.

Bukod dito, pinalawig din ang application period para sa Housing Loan Restructuring and Penalty Condonation Program o ang Pandemic Relief and Restructuring Program 4.

Tatanggap ang SSS ng aplikasyon para dito hanggang Mayo 21, 2022. Sa ilalim nito, hindi na kailangang bayaran ng miyembro o mga tagapagmana nito ang mga naipong multa o penalties sa hindi nabayarang housing loan. Maaari silang mag-file ng aplikasyon sa SSS Housing and Acquired Asset Management Department na nasa SSS Main Office sa Quezon City at sa Housing and Acquired Asset Management Section ng piling sangay ng SSS sa labas ng Metro Manila.

---

Para sa tamang impormasyon at updates sa mga programa at benepisyo ng SSS, bisitahin at i-follow ang opisyal na Facebook page ng SSS sa “Philippine Social Security System” o sa Twitter account sa @PHLSSS. Maaari ding mag-subscribe sa YouTube channel sa “Philippine Social Security System” at sumali sa SSS Viber Community, “MYSSSPH Updates.”

Kung mayroon kayong katanungan tungkol sa SSS o kaya ay mayroon kayong paksa na nais talakayin sa pitak na ito, maaari kayong magpadala ng e-mail sa mediaaffairs@sss.gov.ph.