14 million doses ng COVID-19 vaccines, parating na

ni Mary Gutierrez Almirañez | April 20, 2021

Labing-apat na milyong doses ng bakuna kontra COVID-19 mula sa 4 na pharmaceutical companies ang inaasahang darating sa ‘Pinas sa ikalawang quarter ng taon, ayon kay Vaccine Czar Secretary Carlito Galvez, Jr. kagabi, Abril 19.

Batay sa ulat, tinatayang 1.5 million doses ng Sinovac ang maide-deliver sa bansa ngayong buwan, kabilang ang 500,000 doses na naunang dumating nitong April 11 at inaasahang masusundan pa iyon ng tig-kalahating milyong doses sa ika-22 at ika-29 ng Abril.

Inaasahang darating din ang mga bakuna ng AstraZeneca kapag natapos na ang vaccine-sharing scheme ng COVAX facility ngayong buwan.

Dagdag nito, darating na rin ngayong linggo ang paunang 20,000 doses ng Sputnik V mula sa Gamaleya Institute ng Russia at inaasahang masusundan ng 480,000 doses sa katapusan ng Abril.

Samantala, mahigit 195,000 doses ng Pfizer din ang inaasahang darating sa katapusan o sa unang linggo ng Mayo.

Pagsapit ng Mayo, magpapadala muli ang China ng karagdagang 2 million doses ng Sinovac, at susundan iyon ng 1 hanggang 2 million doses na bakuna galing sa Sputnik V. Magpapadala rin ang Moderna ng paunang 194,000 doses.

Sa Hunyo, mahigit 7 hanggang 8 million doses ang inaasahang darating sa bansa, kabilang ang 4.5 million doses ng Sinovac, 2 million doses ng Sputnik V at 1.3 million doses ng AstraZeneca.

Sa ngayon ay halos 1.4 milyong indibidwal na ang nabakunahan kontra COVID-19 na pinangunahan ng mga healthcare workers, pulis, senior citizen, may comorbidities, mga mayor at governor na nasa high risk areas.

Matatandaang inilabas na rin ang listahan ng A4 Priority Group na inaasahang mababakunahan sa kalagitnaan ng Mayo o Hunyo. Patuloy din ang online pre-registration para sa mga nais magpabakuna.

Janssen at Covaxin COVID-19 vaccines, aprub sa FDA

ni Mary Gutierrez Almirañez | April 20, 2021

Inaprubahan na ng Food and Drug Administration (FDA) ang emergency use authorization (EUA) ng mga bakunang Janssen at Covaxin kontra COVID-19, batay sa inanunsiyo ni Vaccine Czar Secretary Carlito Galvez, Jr. sa ginanap na public briefing kagabi.

Nauna na ring nag-tweet si Indian Ambassador Shambhu Kumaran upang pasalamatan ang ‘Pinas sa iginawad na EUA sa bakuna nilang Covaxin na mula sa Bharat Biotech manufacturer.

Ayon sa tweet ni Kumaran, “Another decisive step in the long battle together against Covid-19.”

Batay sa pag-aaral, ang Covaxin ay nagtataglay ng 92% hanggang 95% na efficacy rate.

Samantala, ang Janssen COVID-19 vaccines nama’y gawa ng Johnson and Johnson, kung saan mahigit 6 milyong doses nito ang binili ng ‘Pinas.

Matatandaang inirekomenda ng U.S Food and Drug Administration (FDA) at Centers for Disease Control and Prevention (CDC) na ihinto muna ang pagbabakuna ng Janssen dahil sa iniulat na blood clot sa 6 na nabakunahan nito.

Sa ngayon, ang may emergency use authorization (EUA) pa lang na bakuna ay ang Pfizer-BioNTech, AstraZeneca, CoronaVac ng Sinovac, ang Sputnik V ng Gamaleya Institute at kabilang ang dalawang nadagdag na bakuna.

500,000 doses ng Sputnik V, parating na sa 'Pinas

ni Mary Gutierrez Almirañez | April 13, 2021

Dalawampung milyong doses ng Sputnik V COVID-19 vaccines ang binili ng ‘Pinas sa Russia Gamaleya Institute at inaasahang darating na sa bansa ngayong Abril ang paunang 500,000 doses na nakalaan para sa mga senior citizens, ayon kay Vaccine Czar Carlito Galvez, Jr..

Aniya, "Puwede po siyang gamitin po sa elderly, so from 18 and above. So 'yun po ang gagamitin namin at 'yun po ang maganda dahil at least in the absence of AstraZeneca… Considering na ang nakikita natin na maganda ang production ng Russia and at the same time, they are supporting only the developing countries.”

Sa kabuuang bilang ay 3,025,600 doses ng bakuna na ang dumating sa bansa, kung saan 2,500,000 ay mula sa Sinovac at ang 525,600 ay galing sa AstraZeneca.

Tiniyak naman ni Galvez na darating ‘on time’ ang 20 million doses ng Sputnik V sa loob lamang ng apat na buwan. Nilinaw din niyang mapipirmahan na ngayong linggo ang supply agreement upang masimulan ang distribusyon.

Sa ngayon ay 1,007,356 indibidwal na ang nabakunahan ng unang dose kontra-COVID-19, habang 132,288 naman ang nakatanggap na ng second dose.

Sa kabuuan, tinatayang umabot na sa 1,139,644 ang lahat ng nabakunahan sa bansa o mahigit 0.19% na target mabakunahan ng Department of Health (DOH).