EUA ng Sinopharm COVID-19 vaccines, DOH ang mag-a-apply

ni Mary Gutierrez Almirañez | May 10, 2021

Nilinaw ng Department of Health na sila ang magsusumite ng application para sa emergency use authorization (EUA) ng Sinopharm COVID-19 vaccines at hindi ang Chinese manufacturer nito, batay sa naging panayam kay DOH Secretary Francisco Duque III ngayong umaga, Mayo 10.

Aniya, “Mag-a-apply tayo. Iyan ang proseso. Iyan ang kailangang sundin na proseso, batay sa komunikasyon sa ating FDA Director General Eric Domingo.”

Sabi pa niya, "Ngayong umaga, ang DOH, mag-a-apply ng emergency use authorization sa FDA para sa Sinopharm dahil meron na tayong emergency use listing na inilabas ng WHO nu’ng Sabado.”

Sa ngayon, ang mga bakunang may EUA pa lamang ay ang Pfizer, AstraZeneca, Sputnik V, Sinovac, Johnson & Johnson, Bharat Biotech at Moderna.

Matatandaan namang nagpabakuna kamakailan si Pangulong Rodrigo Duterte at ang Presidential Security Group (PSG) gamit ang Sinopharm ng China, kahit na hindi pa iyon nagagawaran ng EUA.

'Yung aprub daw ng FDA... VP Robredo, magpapabakuna na kontra COVID-19

ni Mary Gutierrez Almirañez | May 09, 2021

Nakahanda nang magpaturok kontra-COVID-19 si Vice-President Leni Robredo gamit ang bakunang may emergency use authorization (EUA) mula sa Food and Drug Administration (FDA), batay sa naging pahayag niya sa kanyang weekly radio program.

Aniya, “'Pag hindi natin tangkilikin ‘yung may EUA, parang walang saysay tuloy ang FDA. Kaya tayo may regulatory agencies kasi sila ang experts. Sila ang may capacity na mag-assess, may obligasyon na siguruhin ang makakapasok sa bansa ay dumaan sa rigorous na assessment."

Matatandaan namang nagpabakuna kamakailan si Pangulong Rodrigo Duterte gamit ang Sinopharm ng China, kahit na hindi pa iyon nagagawaran ng EUA.

Pagpaparinig pa ni VP Robredo, "Kung public official ako, nagpaturok ako, tapos ipinahayag ko in public, in a way ipino-promote mo ‘yung klase ng bakunang itinurok sa 'yo. Tapos, kung ang ipino-promote mo, walang EUA, mahirap ‘yun kasi parang mockery ‘yun ng existing regulatory agencies natin."

Sa ngayon, ang mga bakunang may EUA pa lamang ay ang Pfizer, AstraZeneca, Sputnik V, Sinovac, Johnson & Johnson, Bharat Biotech at Moderna.

Nilinaw pa ni VP Robredo na hinihintay na lamang niya ang kanyang ‘turn’ upang mabakunahan sa hanay ng mga may comorbidity.

"Alam ko naman na puwede na akong magpabakuna. Pero gusto ko lang siguruhin na wala akong maagawan na iba na dapat mas nauna sa 'kin," dagdag niya.

Sputnik Light, isang turok na lang kontra COVID-19

ni Mary Gutierrez Almirañez | May 7, 2021

Pinahihintulutan na ng Russian Health Officials na iturok ang single-dose version ng Sputnik Light COVID-19 vaccines, ayon sa Gamaleya Research Institute nitong Huwebes, Mayo 6.

Ayon sa ulat, ang bagong version ng Sputnik V ay nagtataglay ng 79.4% efficacy rate, kung saan sapat na ang isang turok upang malabanan ang banta ng virus.

Samantala, nagtataglay naman ng 91.6% efficacy rate ang orihinal na version nito, kung saan nire-require ang dalawang dose upang ganap na ma-develop ang proteksiyon.

Sa ngayon ay mahigit 20 million indibidwal na ang nabakunahan ng unang dose ng Sputnik V mula sa halos 60 na mga bansa.

Kamakailan naman nang dumating sa ‘Pinas ang initial 15,000 doses nito na nangangailangan ng negative 18 degree Celsius na cold storage facility.