Donasyon ng Russia... Unang batch ng Sputnik Light COVID-19 vaccines, dumating na

ni Lolet Abania | November 19, 2021

Dumating na ang unang 5,000 doses ng single-shot Sputnik Light COVID-19 vaccine na donasyon ng Russian government sa Pilipinas ngayong Biyernes.

Ayon sa National Task Force Against COVID-19, lumapag ang pinaka-latest batch ng vaccine doses, kung saan kabilang din ang 2,805,000 Sputnik V shots sa Ninoy Aquino International Airport Terminal 2, pasado alas-2:00 ng hapon.

Ang delivery ay dumating ilang oras matapos na salubungin naman ng pamahalaan ang 1,306,000 doses ng Moderna COVID-19 vaccine sa NAIA.

Ang Food and Drug Administration (FDA) ay nag-isyu ng emergency use authorization (EUA) para sa Sputnik Light noong Agosto 20.

Ayon sa Russian Direct Investment Fund (RDIF), nakapagtala ang Sputnik Light ng 79.4% efficacy kumpara sa 91.6% para sa two-shot ng Sputnik V.

Pinasalamatan ni vaccine czar Secretary Carlito Galvez Jr. ang gobyerno ng Russia para mapadali ang delivery ng mga bakuna.

Ayon kay Galvez, ang 5,000 doses ng Sputnik Light ay nakatakdang i-deliver sa Bangsamoro Autonomous Region in Muslim Mindanao (BARMM).

“Nakita natin ‘yung BARMM ang medyo pinakababa almost 11% pa lang siya and tutukan natin ‘yung BARMM this coming vaccination day,” sabi ni Galvez.

Batay sa datos ng gobyerno hanggang nitong Huwebes, aabot na sa 33 milyong Pilipino ang fully vaccinated na kontra-COVID-19, kung saan nakapag-administer na ng 1,154,131 COVID-19 doses nitong Nobyembre 18.

Magsasagawa naman ang gobyerno ng simultaneous vaccination activities mula Nobyembre 29 hanggang Disyembre 1.

Clinical trial sa paghahalo sa AstraZeneca at Sputnik V, aprub sa Russia

ni Ronalyn Seminiano Reonico | July 27, 2021

Inaprubahan na ng Russia ang pagsasagawa ng clinical trials para sa pinaghalong AstraZeneca at Sputnik V COVID-19 vaccines.

Noong Mayo, sinuspinde ng health ministry ng Russia ang pagsisimula ng pagsasagawa ng clinical trials para sa mga naturang bakuna ngunit matapos ang ilang pag-aaral ay itinuloy na ito.

Ayon sa awtoridad, limang Russian clinics ang magsasagawa ng naturang clinical trials at inaasahang matatapos ito sa Mayo, 2022.

Pahayag pa ng Russian Direct Investment Fund (RDIF), "Currently, RDIF is conducting joint clinical trials to combine the first component of Sputnik V - the Sputnik Light vaccine - with vaccines from other foreign manufacturers.

"In particular, the Sputnik Light vaccine can be used in combination with other vaccine to increase their effectiveness including against new variants appearing as a result of the mutation of the virus."

Karagdagang 37,800 Sputnik V, dumating na

ni Ronalyn Seminiano Reonico | July 11, 2021

Dumating na kagabi sa Ninoy Aquino International Airport (NAIA) Terminal 1 ang Korean Air flight KE623 na lulan ang karagdagang 37,800 doses ng Sputnik V vaccine mula sa Russia.

Ang mga opisyal ng Department of Health Bureau of International Health Cooperation na sina Dir. Maria Soledad Antonio at Dr. Arthur Dominic Amansec ang sumalubong sa pagdating ng naturang bakuna.

Samantala, ayon kay Vaccine Czar Sec. Carlito Galvez Jr., ang ilang lugar sa Metro Manila, CALABARZON, Central Luzon, Ilocos Region, Cagayan Valley, Visayas at Mindanao ang target na makatanggap ng Sputnik V vaccines.