Donaire, praktisado at umaasang makababawi sa susunod na laban

Inihahanda ni dating Five-division world champion Nonito “The Filipino Flash” Donaire ang sarili niya sakaling dumating na ang pagkakataon na muling makasabak sa ibabaw ng ring matapos ang mahabang pagkaka-antala ng boksing at ng maraming sports dulot ng pandemic.

Ilan sa mga masusing pag-aaralang pasuking laban ng 37-anyos na Filipino-American ay ang rematch kay dating super bantamweight champion Guillermo Rigondeaux ng Cuba at World Boxing Council (WBC) bantamweight titlist Nordine Oubaali ng France.

Natikman ni Donaire ang kanyang ikalawang talo at pagkawala ng kanyang World Boxing Organization (WBO) at The Ring 122-lbs title belt sa kamay ni Rigondeaux para sa unification bout noong Abril 13, 2013 sa pamamagitan ng unanimous decision sa Radio City Music Hall sa New York City.

Kung papalaring manaig sa susunod na laban sa pagbabang muli sa bantamweight division ay maaaring magkaroon na ito ng pagkakataon na maipaghiganti ang kanyang pagkatalo sa dating two-time Olympic gold medalist na nagawa niyang mapabagsak sa 10th round ng kanilang laban.

“You know me, man. I’m a fighter. I’ll fight anybody,” saad ni Donaire sa panayam sa kanya nina Kenneth Bouhairie at Michael Rosenthal sa “The PBC Podcast” sa premierboxingchampions.com. “But mainly, [bantamweight] is my territory. So, I’m excited with that one as well, the thought of it.”

Kasabay ng pagbaba ni Donaire ay nagpamalas din ang 39-anyos na Cubano sa kanyang 118-lb debut ng pabagsakin si Liborio Solis sa 7th round para sa bakanteng WBA world bantamweight title noong Pebrero 8 sa PPL Center sa Allentown, Pennyslvania.

Hindi naman pinalad sa kanyang huling laban ang Talibon, Bohol-native kay Japanese star at multiple-bantamweight titlist na si Naoya Inoue (19-0, 16KOs) sa pinale ng World Boxing Super Series sa pamamagitan ng 12-round unanimous decision victory sa Saitama Japan noong Nobyembre 7 ng nakaraang taon.

UAAP athletic calendar pang-2021 event ang aayusin

Iurong ang pagbubukas ng kanilang susunod na season sa first quarter ng susunod na taon (2021)bilang pag-aadjust sa inaasahang mga magiging epekto ng COVID-19 pandemic ang isa sa mga pinagpipiliang isagawa ng pamunuan ng UAAP.

Pero sa kasalukuyan ay wala pa namang napagkakasunduan ang Board of Managing Directors (BMD) hinggil sa pagdaraos ng kanilang susunod na athletic calendar ayon kay UAAP executive director Rebo Saguisag.

Sa katunayan, ayon kay Saguisag una sa inaasahang unang tatalakayin sa susunod na pagpupulong ng UAAP board ay ang mangyayari sa nahintong Season 82 bago ang plano para sa susunod na Season 83 na nakatakdang i- host ng De La Salle gayundin ang eligibility ng lahat ng mga student-athletes.

Hindi rin aniya basta-basta makakapagdesisyon ang BMD dahil isinasa-alang-alang nila ang maraming mga bagay gaya ng patuloy na pagbabawal ng pagdaraos ng mga mass gatherings, ang PSC statement na 'no vaccine, no sports' at ang sinasabi ng DepEd na magsisimula ang face-to-face o in-person classes sa Agosto 24 at Setyembre 1 naman sa CHEd.

“Again, nothing is final as the goalposts keep shifting. Everything is on the table and the Board of Managing Directors is carefully preparing for many different scenarios which will be presented to the Board of Trustees for approval," wika pa ni Sagisag.

Zero case COVID sa Vietnam, hosting ng 2021 SEAG, tuloy

Umaasa ang pamunuan ng Philippine Olympic Committee (POC) na maidedepensa ng Pilipinas ang titulo nito sa 2021 Southeast Asian Games sa Vietnam sakaling matuloy ito sa kabila ng coronavirus disease pandemic.

Inihayag ni POC president Abraham “Bambol” Tolentino na malaki ang tsansa na matuloy ang biennial meet sa susunod na taon dahil sa maayos na paghawak ng pamahalaan ng Vietnam sa kaso ng COVID-19 sa kanilang bansa, kung saan sinabi ni Tolentino na na-blangko na nila ang bilang na ito sa ngayon.

Gayunman, inamin din ng pinuno ng Integrated Cycling Federation of the Philippines (Philcycling) na pinangangambahang mabawasan ang mga sports event sa susunod na stage na hindi pa rin napag-uusapan dahil hindi pa naite-turnover ng opisyal sa Vietnam ang SEA Games flag na naudlot nitong Abril o Mayo dahil sa COVID-19.

“Definitely matutuloy iyong (SEAG) sa Vietnam, kase zero ang case nila,” pahayag ni Tolentino. “Na-islash ng 50% ang budget ng Vietnam, so ang epekto nu'n mababawasan 'yung events sa SEAG,” dagdag nito.

Inaasahan na ni Tolentino na pipiliting makuha ng Vietnam ang overall na kampeonato sa kanilang muhon, lalo pa’t karaniwang nagwawagi bilang kampeon ang host country sa regional meet. Sa kasaysayan ng SEAG simula noong 1959, 13 beses na naagaw ng katunggaling bansa sa host country ang titulo, kung saan 13 ulit na nagkampeon ang powerhouse na Thailand na sinundan ng Indonesia sa top 10.

Idinagdag pa niya na marami ang mawawala sa mga events na malakas ang Pilipinas hindi tulad sa nagdaang 30th edisyon na may 56 sports events na ginanap noong Nobyembre-Disyembre sa iba’t ibang parte ng Luzon.

Noong 2003 Vietnam Games ay napagwagian ng host country ang biennial games sa pamamagitan ng kabuuang 346 medalya sa 158 golds, 97 silvers at 91 bronze medals, na may 442 events sa 32 sports na nagawang hatiin ang mga laro sa Hanoi at Ho Chi Minh City.

Sa pagkakataong ito ay malaki ang posibilidad na ilagay ng Vietnam ang mga paborito nitong sports na Shuttlecock at Martial Arts na Vovinam, habang, nanganganib ang bansa na maisama ang mga pampalakasan na walang nakuhang ginto ang Pilipinas sa badminton, bowling, chess, football, handbell, netball, table tennis at volleyball.

“Lalaban tayo siyempre, pero panigurado hindi papayag ang Vietnam na matalo,” aniya, na nangakong gagawin niya ang lahat para mai-lobby ang Dancesports, Arnis, Kickboxing at Obstacle course kung saan humakot ang Pilipinas ng sangkaterbang gintong medalya para makuha ang ikalawang overall title nito sa kabuuang 149 gold, 117 silver at 121 bronze medals.

“Basta kung kaya nating ipadala, susubukan kong i-lobby ‘yung mga malakas tayo o 'di kaya ay hanggang kaya natin salihan, salihan natin lahat, kahit pa 'di natin masyadong nilalaro,” dagdag nito.