NLEX Road Warriors members, nag-negatibo sa coronavirus

Nagnegatibo ang mga manlalaro, coaches, opisyal, at staff ng NLEX Road Warriors sa COVID-19 tests. Ito ay ayon sa team manager ng Road Warriors na si Roland Dulatre sa kanyang Twitter account.

Kamakailan ay sumailalim sa COVID-19 test ang mga kasapi ng Road Warriors sa utos na rin ng team owner na si Manny V. Pangilinan.

Ang COVID-19 test ay isa sa mga rekisito ng PBA upang makabalik sa ensayo na siyang inaasam na ng liga pagkaraang gumawa ng sulat sa Inter-Agency Task Force on Emerging Infectious Disease (IATF).

Ayon kay PBA Commissioner Willie Marcial, istrikto ang health protocols na balak ipatupad ng liga kung papayagan ng IATF na mag-ensayo na ang mga koponan sa liga. Ayon sa isa sa mga protocols, anim lamang ang makakapag-ensayo sa bawat koponan, apat dito ay manlalaro, isang trainer, at isang health officer.

Samantala, kamakailan din ay nagbigay ng donasyon ang NLEX Road Warriors ng face masks at face shields kay Defense secretary Delfin Lorenzana para sa We Heal As One na pasilidad sa Philippine Arena sa Bocaue, Bulacan.

Kabilang sumama sa turnover ay sina NLEX coach Yeng Guiao, Asi Taulava, Cyrus Baguio, Jr., Quinahan, Kyles Lao at Kevin Alas.

Tuloy ang ayuda sa CeSAFI, pero sa 2021 na uli ang liga

Patuloy ang pagbuhos ng tulong para sa mga lahat na apektado ng ipinagpaliban na 20th Cebu Schools Athletic Foundation Inc. (CeSAFI) ngayong taon. Isama na ang Bounty Agro sa listahan matapos mag-alay sila ng 5,000 piraso ng hilaw na manok sa mga opisyal at manggagawa ng liga at mga kasapi nitong mga paaralan.

Ang mga paaralang kasapi ng CeSAFI ay ang Southwestern University-Phinma na defending champion sa Seniors Basketball at Men’s Volleyball, University of the Visayas, University of San Jose-Recoletos, University of Cebu, University of Cebu-Lapulapu at Mandaue Campus, University of San Carlos, University of Southern Philippines Foundation, Cebu Institute of Technology University. Kasama rin ang mga Juniors ng Sacred Heart School-Ateneo de Cebu, Cebu Eastern College at Don Bosco Technical College.

“Humanga kami kung paano inalagaan ng CeSAFI ang mga tauhan nila kaya naisip namin na tulungan at dagdagan ito,” wika ni Ronald Mascarinas ng BAVI at tubong Butuan City.

Agad nagpasalamat si CeSAFI Commissioner Felix Tiukinhoy. Malaking bagay ito dahil maaring dumaan sa isang taon na walang kikitain ang mga opisyal, coach, reperi at staff dahil wala munang laro.

Ang CeSAFI ang unang malaking liga ng mga paaralan sa bansa na nagpasya na huwag muna maglaro ngayong 2020-2021 sa gitna ng krisis ng COVID-19. Ilang araw matapos ibaba ang desisyon noong Mayo ay nagpalabas ang pamunuan ng liga at Commissioner ng tig-10 kilong bigas, spaghetti at de lata para sa 495 na tauhan nito.

Naglabas din ng kasabay na pahayag ang liga na tuloy pa rin ang mga scholarships ng mga atleta at panahon na para tutukan muna nila ang pag-aaral. Umaasa na babalik ang aksyon sa CeSAFI sa 2021-2022.

Ardina at Tabuena, matapang ang kampanya sa Asian at Aussie Golf tour

Pinangungunahan ni Dottie Ardina ang mga professional parbusters ng Pilipinas na nasa magandang puwesto para patuloy na mapakinang ang kani-kanyang mga kampanya ngayong 2020 sa panahong unti-unti nang lumuluwag ang mga panuntunan laban sa COVID-19.

Si Ardina, na muling sumisigla ang professional career, ay kasalukuyang nasa pangwalong puwesto sa Australian Ladies Professional Golf (ALPG) Order of Merit OOM dahil sa napagwagiang $33,005. Malaking tulong sa kanya ang pagiging reyna ng Ballarat Icons Pro-Am Tournament at ang pagiging segunda sa Aoyuan International Moss Vale Pro-Am.

Sa Asian Golf Tour OOM naman, si Miguel Tabuena ay nasa top 20 dahil sa naibulsa niyang $34,316. Naging tulay niya rito ang isang 8th place finish sa prestihiyosong SMBC Singapore Open. Nakabuntot naman sa kanya ang kababayang si Angelo Que na nakaupo sa pang-25 posisyon ($28,864).

Nasa eksena rin sina Ardina at Tabuena sa karera para makakuha ng isa sa tig-60 upuan sa men's at women's golf events ng Tokyo Olympics na gaganapin na sa 2021.

Si Ardina, dating premyadong jungolfer ng bansa, ay nasa pang 51 na baytang sa kababaihan habang si Tabuena ay nakakapit sa panghuling upuan (60th) sa kalalakihan. Isa pang pambato ng bansa ay nasa pang-50 puwesto sa harap ni Ardina. Siya ay si double Asian Games gold medalist Yuka Saso.