​Checkmate Coronavirus Online Tournament: 2 Pinoy nagwagi

Naambunan ng suwerte ang mga ordinaryong apisyonado ng ahedres mula sa Pilipinas nang mapili ang kanilang mga pangalan sa pa-raffle ng programa ng FIDE na puntiryang daigin ang coronavirus at tinatawag na "Checkmate Coronavirus".

Dalawang chessers ng bansa ang napagkalooban ng dalawang upuan sa sampung "mini-matches with Top GMs" na bahagi ng paripa sa proyektong nagsasagawa ng 80 online tournaments kada araw na nagsimula noong Mayo 18 hanggang Hunyo 16.

Sa programa, ang mga online tournaments ay puwedeng salihan ng kahit na sino (bata o matanda, masters o non-masters) mula sa kahit saang bahagi ng mundo. Bitbit ang paniniwalang nakahanay sa Olympic motto na "not to win but to take part", itinataguyod ng kaganapan ang pananatili sa loob ng mga tahanan ng lahat ng tao sa panahon ng pandemic habang pinapasigla ang international online chess.

"Ramon palatan" at "Simounn" ang ginamit na online chess names ng dalawang chessers mula sa Pilipinas na nagwagi. KInakailangan pa nilang makipag-ugnayan sa FIDE, ihayag ang kanilang tunay na mga pangalan para sa pagkuha ng kanilang mga gantimpala. Bukod sa kanila, may mga manlalaro rin ng Nepal, Cyprus, Brazil, Singapore, Serbia, Australia, Kenya at Greece ang haharap sa "top GMs".

Isang dosenang kalahok din mula sa raffle ang naimbitahang manood ng prestihiyosong Chess Olympiad 2021 na nakatakdang ganapin sa Russia. Sila ay galing sa South Africa, Netherlands, India, Canada, Brazil, Bolivia, Algeria, Azerbaijan, Serbia, Great Britain at Spain.

Health safety and security ng boxers atbp. hihigpitan ng GAB

May pag-iingat at batay sa panuntunan na ipinatutupad ng pamahalaan para sa paglaban sa COVID-19, unti-unti na ring bumabangon ang professional sports at dahan-dahan na ring binubuksan ng Games and Amusement Board (GAB) ang pintuan para matugunan ang pangangailangan ng mga atletang Pinoy.

Bilang panimula, pinangunahan ni GAB Chairman Abraham ‘Baham’ Mitra, kasama sina Commissioners Eduard Trinidad at Mat Masanguid, ang konsultasyon at pakikipagpulong sa mga Division heads ng piling empleyado.

“Kailangan ang mahigpit na pag-iingat. While the government already imposed General Community Quarantine (GCQ) in Metro Manila, focus pa rin tayo sa safety and security ng ating mga kababayan, including our workforce, athletes, and stakeholders,” pahayag ni Mitra.

“We have to strictly managed a number of health protocols, including those affecting workplace and professional athletes' license application procedures, to fight the spread of the Coronavirus disease,” sambit ni Mitra.

Tulad ng iba pang sector na nagsimula na ring magbalik sa gawain, handa na rin ang GAB para paglingkuran ang mga atleta sa kanilang pagbabalik sa normal na pamumuhay.

“So far, may may request na kaming natatanggap para sa pagbabalik ng pro football, gayundin sa basketball at combat sports tulad ng boxing, muay thai at mixed martial arts. Sa ngayon, patuloy ang aming monitoring at pakikipag-ugnayan sa Inter-Agency Task Force, para maisakatuparan ang pagbabalik ng sports sa tamang pagkakataon,” aniya.

Humingi rin si Mitra ng pang-unawa sa lahat, higit sa mga boxers na nabinbin ang mga laban bunsod ng COVID-19 na manatiling mahinahon at ipagpatuloy ang pagsasanay para masigurong handa ang kanilang mga pangangatawan at kaisipan.

Sa kasagsagan ng Enhanced Community Quarantine (ECQ), nakipag-ugnayan ang GAB sa Department of Social Welfare and Development (DSWD) para maisama sa mabibigyan ng social amelioration ang mga boxers, trainers, at coach.

“Nabigyan po natin ng ayuda ang ating mga kasama, sa pamamagitan ng DSWD cash assistance para po sa mga licensed boxers, mma, muay thai fighters, trainers, matchmakers, at iba pang qualified beneficiaries na nasa labas ng NCR,” pahayag ni Mitra.

PHL Swimming, nagpalabas ng susunding health protocol guidelines

Matapos na payagan ng Inter-Agency Task Force on Emerging Infectious Diseases (IATF) ang swimming na isa sa mga sports na maaari nang maisagawa ay agad na nagpalabas ng kanilang guidelines ang Philippine Swimming Inc. (PSI) sa pamamagitan ng Presidente nito na si Lailani Velasco.

Ito ay upang masiguro na makaiwas ang mga atleta at mga miyembro nito sa banta ng nakamamatay na COVID-19 lalo na nga at naibaba na sa General Community Quarantine (GCQ) ang Metro Manila, ay mas posible ang panganib na hatid ng nasabing virus.

Bukod pa rito ay naniniguro lamang ang PSI gayung wala pang gamot na maaring magamit upang makaiwas sa naturang sakit na kumakalat.

“The fact remains that a vaccine or cure is yet to be found. Thus, we enjoin all the clubs to observe the minimum health standards provided by the DOH (Department of Health) and undertake the best practices to ensure the health and safety of everyone,’’ ayon sa PSI.

Isa ang swimming sa mga may pinakamaraming bilang ng atleta at mga events na sinasalihan kaya naman kinailangan nila na magsagawa ng mga alituntunin na tutulong sa mga ito na makaiwas sa pagkakaroon ng Coronavirus.

Alam din ng PSI na responsibilidad nila sakaling may mangyaring hindi maganda sa isa sa mga atleta nito o miyembro na ngayon nga at pinayagan na silang muling lumangoy.

Kasama sa mga alituntuning ipinapatupad ngayon ng PSI ay ang ay pagdaragdag ng level ng sanitation sa mismong swimming pool at komportableng pasilidad.

Samantala, ang mga sports na pinayagan ng IATF sa ilalim ng GCQ ay ang golf, biking, running, tennis, badminton, equestrian at skateboarding basta masisiguro na ang mga atleta ay susunod sa alituntunin gaya ng pagsusuot ng face masks, maisasagawa ang physical distancing at hindi maghihiraman g mga kagamitan.