Nat’l athletes, naunawaan ang 50% nilang allowances

Positibo ang naging reaksyon ng ilang mga atleta hinggil sa usapin ng pagbabawas ng kanilang mga allowances ngayong darating na Hulyo na naging resulta ng krisis na kinakaharap ng bansa.

Unang sinabi ng PSC na babawasan ng 50% ang monthly allowances ng national athletes at coaches dahil sa walang maireremita na pondo ang PAGCOR sa mgayon. Karamihan sa mga national athletes ay umaasa sa kanilang mga monthly allowance upang ipantulong sa mga pamilya.

"Nakakalungkot po ma'am, siyempre lalo na't halos yung ibang atleta d'yan sa allowance na yan po umaasa para masuportahan pamilya nila. Pero may malaking reason naman po kaya babawasan nila for now. Di lang din naman po kami mga atleta yung apektado po sa pagbawas ng allowance halos lahat po. Malilit o malalaking company man po yan," pahayag ni 2019 AIBA World Boxing Champion na si Nesthy Petecio sa panayam ng BULGAR.

Ayon sa 28-anyos na si Petecio, ibayong pag-uunawa lamang ang kailangan sa ganitong sitwasyon na kung saan lahat ay dumaranas ng hirap.

"Ang kelangan po namin, nating lahat ngayon yung malawakang pag intindi po sa sitwasyon at nangyayari po. Apektado din po ako sa sitwasyon dahil ako po sumusuporta sa family ko simula nong naging national team ako. Masuwerte lang po ako dahil kahit papaano nakapag-ipon po at may nahuhugot sa ganitong sitwasyon," ani Petecio.

Ganito rin ang naging reaksyon ni Tokyo Olympics bound athlete na si Irish Magno.

"Nakakalungkot ma'am kasi maraming atleta na umaasa lang sa allowance, pero naiitindihan ko naman po, kasi sa panahon ngayon kailangan po talaga namin na magtiis muna at magkaroon ng malawak na pang-unawa. At maghintay na lang po na bumalik sa normal ang lahat. At nagpapasalamat rin po ako na kahit papaano may 50% pa kami na matatanggap malaking tulong na rin po yun saming mga atleta," ani Magno.

Gayunman ay siniguro naman ni PSC Chairman William Ramirez na ibabalik nila agad sa mga atleta ang kabuuan ng nasabing allowance sakaling bumalik sa normal ang pagbibigay ng PAGCOR sa nasabing ahensiya.

PHL Azkals, lalagare ng laro para sa Asian at World Cup Qatar

Magbabalik aksyon ang Philippine Azkals ngayong Oktubre. Iniutos kahapon ng Asian Football Confederation (AFC) na itutuloy na ang qualification para sa 2022 FIFA World Cup Qatar at 2023 Asian Cup sa Tsina matapos itong ipatigil noong Marso dahil sa krisis ng COVID-19.

Unang haharapin ng Azkals ang mga bisita mula sa Guam sa Oktubre 8. Tinalo ng Pilipinas ang Guam, 4-1, noong una nilang pagharap noong Setyembre 10, 2019 sa Dededo, Guam.

Susundan ito ng rebanse kontra Tsina sa Nobyembre 12. Nagtapos sa 0-0 na tabla ang una nilang pagkikita noong Oktubre 15, 2019 sa Panaad Stadium ng Bacolod City.

Ang Maldives ang huling makakalaro ng Azkals sa Nobyembre 17. Paborito ang mga Pinoy na ulitin sa sariling tahanan ang kanilang 2-1 na tagumpay noong Nobyembre 14, 2019 sa Male, Maldives.

Wala pang katiyakan kung saan gaganapin ang mga laro kontra Guam at Maldives dahil ang Rizal Memorial Stadium at Ninoy Aquino Stadium ay parehong ginawang pansamantalang quarantine facility habang inaayos naman ang Panaad para sa 2021 Palarong Pambansa. Ang laro laban sa Tsina ay unang itinakda na gawin sa Thailand pero titingnan kung babaguhin ito at ibabalik sa Tsina mismo.

Sa hiwalay na pahayag, kung papayag ang AFC ay isusulong ng Philippine Football Federation (PFF) na gawin ang mga laro sa PFF National Training Center sa Carmona, Cavite.

Kasalukuyang patas ang Pilipinas at Tsina para sa ikalawang puwesto ng Grupo A na parehong may pitong puntos. Numero uno ang Syria na may malinis na 15 puntos buhat sa limang panalo, kasama ang dalawa kontra sa Azkals.

Patuloy pa ring pag-aaralan ng AFC at FIFA ang sitwasyon para sa kalusugan at kaligtasan ng lahat. Malaking bagay din ang magiging patakaran ng mga pamahalaan ng mga kalahok na bansa tungkol sa paglakbay at malakihang pagtitipon.

PHL Baseball hihiling sa IATF-EID na payagang makapag-ensayo pa-World Cup

Susubukang hilingin ng coaches ng Women’s Baseball World Cup-bound na makausap ang pamunuan ng Philippine Amateur Baseball Association (PABA) upang humingi ng approval sa Inter-Agency Task Force on Emerging Infectious Disease (IATF-EID) na makapag-ensayo bilang paghahanda sa torneo na nakatakda simula Nobyembre 12-21 sa Tijuana, Mexico.

Dahil sa mga paghihigpit ng bansa at pagpapatigil ng Philippine Sports Commission (PSC) sa mga pagsasanay ng aktuwal at pisikal sa lahat ng national sports association (NSAs) bunsod ng pandemic; marami ang nahihirapang maipagpatuloy ang mga ensayo at paghahanda, partikular na ang ‘Team Sports.’

“We will suggest PABA to ask or make a proposal letter to the IATF para makapag-ensayo kami kahit papaano. Of course, the move should come from PABA first before anything else,” pahayag ni pitcher/assistant coach ng national women’s baseball team na si Jeffrey Santiago sa panayam ng BULGAR sa telepono. “Magkakaroon kami ng meeting ng coaches through Zoom with our PABA officials and we’re hoping na mapapayag sila (PSC at IATF) dahil minsan lang itong pangyayari ito para sa ating bansa,” dagdag ni Santiago na paniguradong mabigat ang laban sa mga bansang Japan, Chinese-Taipei mula sa Asya; Canada, Mexico, USA at Venezuela sa Americas; France mula sa Europa; Australia sa Oceania at Cuba, Dominican Republic at the Netherlands bilang mga wildcards. Ang Mexico, France at Pilipinas ay sasabak sa unang pagkakataon.

Nauna nang nagpahiwatig ang mga sports na basketball, volleyball, football, athletics, gymnastics, karate at rugby na nais na nilang ipagpatuloy ang mga training sessions.

Irerekomenda rin ni PSC chairman William “Butch” Ramirez sa IATF at sa Department of Health (DOH) ang mga dokumentong ipapasa ng pitong sports, ngunit hindi nangangakong mapapayagan dahil maraming proseso at hinihinging protocols at pag-iingat ang task force.

“Mahihirapan tayong mag-prepare dahil parang maghuhulaan lang tayo kung anong mga gagawin at plano. Sana naman matuloy ang laro natin kase opportunity ito sa Pilipinas, mahirap makapasok sa World Cup,” saad ni Santiago na siya ring head coach ng UST Golden Sox sa UAAP. “Sa ngayon puro lang tayo online training sa kani-kanilang mga lugar. Hindi naman pupuwedeng puro ganun lang ang ensayo natin tapos sasabak tayo sa World stage,” dagdag ng pitcher ng national team noong 1982-86 na naglaro sa Southeast Asian Games at Asian Games.

“Sana lang ay may makita kaming mga private sectors o sponsors na tutulong sa amin para maipakita natin sa buong mundo iyong galing ng mga Filipino,” wika ni Santiago.

Ang mga manlalaro ay binubuo nina Clariz Palma, Whell Camral, Elaine at Wenchie Bacarisas, Diana Balderama, Christine Bautista, Camral, Ivy Capistrano, Mhamie de la Cruz, Nicole Estante, Lealyn Guevara, Jojielyn Lim, Erika Olfato, Palma, Mery Ann Ramos, Edna Severino, Alaiza Talisik, Esmeralda Tayag, Jennifer Singh, Sheirylou Valenzuela, Veronica Velasco at Charlotte Sales, na mamanduhan nina head coach Egay de los Reyes, Tata Empasis at Santiago.