Pagba-bike, ‘di lang ehersisyo, nakakadagdag pa sa haba ng buhay

Aarangkada na ngayon ang lahat ng bikers sa Kamaynilaan para makasunod sa social distancing at makaiwas na rin na mag-commute. Malaking bagay ang pagbibisikleta sa kalusugan ng tao bukod sa paglalakad at iba pang uri ng mobility ng tao. Ngayong panahon ng pandemic, importanteng mapalakas ang ating katawan laban sa anumang sakit. Samantalahin na guys, na makapagpedal papunta sa inyong mga trabaho kung wala pang 5 kilometro ang layo ng patutunguhan upang walang hassle. Kahit noong unang panahon pa ay fashionable na ito at all-time favorite na ngayon ay magagawa mo na. Malaki pa ang pakinabang nito sa personal na lakad bukod sa naeehersisyo ang iyong katawan. Ayon sa pagsasaliksik, ang pagkakaroon ng intense at regular na ehersisyo sa pamamagitan ng pagba-bike ay limang beses na nakadaragdag o nakapagpapahaba ito ng buhay.

Base sa pag-aaral sa lifestyle ng cyclist ay humaba o nadagdagan ng pataas pang taon ang edad ng mga ito kumpara sa hindi nagbibisikleta. Mas importante rin ang bilis ng pagpepedal. Sa 20 taon na pag-aaral kasama rito ang pagmomonitor sa kalusugan ng 5,000 malusog na tao. Malaking porsiyento sa kanila ay nagba-bike bawat araw kasunod ng runners at mga naglalakad tuwing umaga kasama ang mga alagang aso. Ang lalaking cyclist ay nakaka-survived ng 5 taon kung mabilis pumedal. Habang may 3 taon naman ang kababaihan. Ang mga naglalakad naman ay 2 taon.

Malaki naman ang tsansa ng professional cyclist na tumibay ang resistensiya kahit sa kanilang pagtanda ay madali lang silang gumaling bagamat may matinding karamdaman. Ang naturang pag-aaral ay mula sa European Society of Cardiology Congress sa Paris kung saan hinihikayat ang marami na magkaroon ng regular na ehersisyo lalo na kung lifestyle na ang pagba-bike.

Pagbabalik ng football game dadahan-dahanin muna ang laro

Unti-unti nang bumabalik ang Football bilang patunay ng tagumpay ng mga bansa kontra COVID-19 at hindi malayo na sumama ang Pilipinas sa selebrasyon. Pinag-aaralan ng mabuti ng Philippine Football Federation na buksan ang 2020 Qatar Airways Philippines Football League (PFL) ngayong Hulyo.

Ayon kay Mariano Araneta, ang presidente ng PFF, isa sa kanilang panukala ay gawin ang lahat ng mga laro sa National Football Training Center sa Carmona, Cavite.

Ang mga karaniwang ginaganapan ng mga laro tulad ng Rizal Memorial Stadium at Binan Football Stadium ay nasa tabi ng mga gym na ginawang mga quarantine facility kaya delikado ito.

Bilang paghahanda, titingnan ng PFF at PFL ang mga modelo o karanasan ng ibang liga sa ibayong dagat. Subalit ang huling pasya ay nasa pambansa at lokal na pamahalaan kung papayagan silang maglaro.

Dahil gahol sa panahon, maaring paiigsian ang liga. Maaring hindi rin muna matuloy ang 2020 Copa Paulino Alcantara Cup.

Sa mga kapitbahay sa Timog Silangang Asya, nagsimula na ngayong linggo ang aksyon sa Bamboo Airways National Cup sa Vietnam at susundan ito ng V League One sa Hunyo.

Sa mga darating na linggo ay sisimulan muli ang naudlot na Metfone C League One ng Cambodia, Toyota Thai League One at CIMB Bank Liga Super Malaysia.

Anim na koponan ang kalahok sa PFL sa pangunguna ng defending champion Ceres Negros, Kaya Iloilo, Stallion Laguna, Global, Mendiola 1991 at Azkals Development Team.

Ang kampeon ay tutuloy agad sa group stages ng 2021 AFC Champions League laban sa mga bigating koponan ng Asya.

Dumaan sa depresyon, Woodley hindi nakaporma kay Burns sa UFC fight

Dinomina ni submission specialist Gilbert Burns si dating UFC welterweight champion Tyron Woodley mula simula hanggang makuha nito ang unanimous decision victory sa pagbabalik kahapon sa Las Vegas, Nevada ng UFC Fight Night nang iilan lang ang audience na nanood dahil sa umiiral na health protocol.

Ipinaramdam ng 33-anyos na Brazilian-American ang malulupit na galawan sa loob ng octagon para hindi bigyan ng pagkakataon ang dating kampeon na makabawi sa bawat round, sa harap ng bakanteng UFC APEX facility sa pinal na iskor ng mga hurado na 50-45, 50-44 at 50-44.

Dahil sa panalong nakuha ng dating 3-time jujitsu World Champion at World Cup gold medalist, nagkaroon ito ng tsansa na mapalapit sa titulo ni welterweight titlist Kamaru Usman, na noong isang taon ay inagaw naman ang belt kay Woodley sa isang unanimous decision victory sa UFC 235.

Sunod-sunod na patama ang binira ni Burns sa unang round pa lamang dahilan upang mahilo si Woodley at magbukas ang depensa nito. Napanatili rin ni Burns ang ground game kahit makailang ulit na nakakatakas ang 38-anyos na tubong Ferguson, Missouri, gayunpaman ay isang malalim na hiwa ang natamo ng tinaguriang “The Chosen One” sa kaliwang parte ng mukha nito, na lubhang nagbigay sa kanya ng kahirapan sa mga unang tagpo pa lang.

Wala pa rin sa tamang laro ang dating kampeon na inaming dumaan sa matinding depresyon sapol ng makuha ang one-sided loss kay Usman. Sinabi nitong kahit makailang ulit at sanay na itong lumaban sa loob ng octagon ay hindi niya natanggap ng maayos ang pagkatalo

“I went into a state of depression for a while. I got to the point where I felt like I faced it head-on. I felt [the loss] was necessary for my journey,” paglalahad nito na inaming malaki ang naging kawalan sa diyeta at buhay niya kasunod ng pagkatalo.

Sa ibang mga laban sa main card ay tinalo ni Augusto Sakai si Blagoy Ivanov via split decision (27-30, 29-28, 29-28); nakuha ni Billy Quarantillo ang UD kay Spike Carlyle (29-28, 29-28, 29-28); pinatapik ni Roosevelt Roberts si Brok Weaver sa pamamagitan ng rear-naked choke sa 2nd round; pinasuko rin ni Mackenzie Dern si Hannah Cifers sa ginawang kneebar sa women’s strawweight.

Nitong nagdaang Huwebes ay inilabas ng Nevada State Athletic Commission (NSAC) ang kanilang desisyon na payagang muling makapagtampok ang combat sports gaya ng MMA at boxing events sa Las Vegas sapol ng ipagbawal nila ang lahat na magpalaro noong Marso 14.