Russian modern pentathlon coach, nasawi sa COVID-19

Nadagdag ang pangalan ni modern pentathlon coach Valery Ilyin ng Russia sa mahabang listahan ng mga sports guru na pumanaw bunga ng COVID-19. Ang Ruso ay 72-taong-gulang.

Si Ilyin, isang dating disipulo ng fencing, ay laman ng Central Army Club sa Moscow kung saan niya ginagabayan ang mga modern pentathletes. Kasama sa kanila si Svetlana Yakovleva na naging isang world champion (1984) at si Tatyana Chermetskaya na nakasikwat ng ginto sa Goodwill Games (1986).

Kamakailan, binawian na rin ng buhay ang Albanian national boxing coach na si Skender Kurti dahil sa rin sa corona virus sa edad na 61. Pumanaw si Kurti habang nasa Infectious Diseases Hospital matapos itong ma-confine dahil sa hypertension. Buwan pa ng Marso ito nang ipasok ito sa pagamutan. Maliban kay Kurti, isa ring Russian wrestling coach (Magomed Aliomarov) at isang Swiss ski coach (Jaques Reymond) ang binawian din ng buhay dahil sa nakamamatay na virus.

Bukod pa sa kanila, kasama na sa listahan ng mga personalidad sa isports na nabiktima ng virus sina Teruyuki Okazaki, karate, Japan; modern pentathlete Robert Beck, USA; ang dating opisyal ng International Canoe Federation officer na si Marcel Venot (France), dating Japanese Olympic Committee offical (Matsushita Saburo, Japan), Antonio Melo, fencing, Venezuela; unang black boxing referee ng Olympics (Carmen Williamson, USA), Lukman Niode, swimming, Indonesia; at ang mga tracksters na sina Italian runners Donato Sabia at Francesco Perrone.

NBA legend Wes Unseld pumanaw sa edad 74

Sumakabilang-buhay na nitong Martes si Wes Unseld, isa sa itinanghal ng 50 Greatest Players ng NBA, dahil sa sakit na pneumonia sa edad na 74. Nakuha ni Unseld ang dobleng karangalan ng Most Valuable Player at Rookie of the Year noong 1969 bilang bahagi ng Baltimore Bullets na ngayon ay Washington Wizards.

Si Unseld ang Finals MVP sa nag-iisang kampeonato ng prankisa noong 1978 kung saan tinalo ng Washington Bullets ang Seattle Supersonics, 4-3. Matapos ang kampeonato, bumisita sila sa Pilipinas upang maglaro ng exhibition game kontra sa pinagsamang mga bituin at import ng PBA sa Araneta Coliseum.

Sa tangkad na 6’7”, siya na ang pinakamaliit na sentro sa NBA noong panahon na iyon. Subalit nabiyayaan siya ng malapad, malakas na katawan at diskarte upang talunin ang mga bantay niyang higante.

Mas maraming rebound ang nasungkit ni Unseld kaysa puntos sa kanyang buong karera. Nagtapos siya na may average na 10.8 puntos at 14.0 rebound sa 984 na laro mula 1968 hanggang 1981.

Nagtrabaho siya sa opisina ng Bullets hanggang tinalaga siya bilang coach noong 1988, isang posisyon na hinawakan niya hanggang magbitiw noong 1994 na may pangkalahatang kartada na 202-345 panalo-talo. Nanatili siya bilang General Manager ng koponan hanggang 2003.

Pinanganak si Westley Sissel Unseld noong March 14, 1946 sa Louisville, Kentucky at hindi na siya lumayo, nag-aral at naglaro para sa University of Louisville Cardinals sa NCAA. Nahalal siya sa Naismith Basketball Hall of Fame noong 1988 at ang kanyang damit na numero 41 ay retirado ng Wizards.

30 student athletes, inabisuhan na mawawalan ng scholarships

Dahil na rin sa walang kasiguruhang sitwasyon na kinakaharap dulot ng coronavirus pandemic, tatlumpung (30) mga student-athletes ng University of Santo Tomas ang pinagsabihan na mawawalan ng kanilang scholarships sa susunod na term.

Kaugnay naman nito, ang iba pang mga student-athletes ay ibinalik sa training pools kaya't nananatiling kuwalipikado pa rin sa 50-percent tuition discount, ayon sa ulat ng official school paper ng unibersidad na - Varsitarian.

Nauna nang inanunsiyo ni UST Rector Fr. Richard Ang O.P. na itutuloy ang mga scholarships na ibinigay para sa second semester ng academic year 2019-2020 hanggang Disyembre.

Batay sa inilabas sa Office of Admission website ng UST, ang Santo Tomas Academic Scholarship at San Martin de Porres Equity Scholarship na lamang muna ang tanging io-offer para sa Academic Year 2020-2021.

Aalisin pansamantala ang Santo Domingo de Guzman scholarship na para sa mga student-athletes at mga nag-excel sa music and arts gayundin ang San Lorenzo Ruiz scholarship.

Samantala, hindi pa nagbibigay ng pahayag ang pamunuan ng University Athletic Association of the Philippines (UAAP) kung saan kabilang ang UST hinggil sa kanilang plano para sa UAAP Season 83 na nakatakda sanang magbukas sa darating na Setyembre.