Phl mixed curling team wagi vs. SoKor at Kyrgyzstan sa AWG

ni MC @Sports News | Feb. 5, 2025

Photo: Inaaasintang mabuti ni Fil-Am Kathleen Dubberstein ang sulong ng curling habang nakamasid ang kakamping si Filipino-Swedish Marc Pfister sa isang aksiyon na ito ng laban sa 9th Asian Winter Games sa Harbin, China. Tinalo ng 'Pinas ang South Korea at Kyrgyzstan. (pocpix)

Maagang nagpakitang-gilas ang Pilipinas sa Ninth Asian Winter Games sa Harbin sa bisa ng 12-6 na panalo kontra South Korea at Kyrgyzstan, 10-2 sa mixed doubles team event ng curling kahapon sa Pingfang Curling Arena.

Binigyan ng bangungot ng unranked pair nina Filipino-Swedish Marc Pfister at Fil-Am Kathleen Dubberstein ang mga world’s No. 13 at Asia’s top-seeded South Korean tandem nina Jihoon Seong at Kim Kyeongae sa simula ng round robin games sa Group A.

Pagdating ng hapon ay tinalo rin ang tambalan nina Keremet Asanbaeva at Iskhak Abykeev sa 2-0 start. “It’s indeed a delightful news and a great start for Team Philippines,” ayon kay Philippine Olympic Committee (POC) president Abraham “Bambol” Tolentino bago magtungo sa Harbin.

“It’s morale boosting ahead of this Friday’s opening ceremony and I hope we stay this way,” dagdag niya na sasamahan si chef de mission Ricky Lim at mag-aasikaso sa hapunan ng 20-athlete Team Philippines sa Huwebes.

“We are definitely the underdog team here but our athletes are here to compete and they are proud to represent the country,” saad ni Curling Pilipinas secretary-general Jarryd Bello. “We have a chance to secure a medal we beat one of the top teams already.”

May 11 bansa ang aaksiyon sa mixed doubles event at nahahati sa 2 grupo. Sunod na makakalaban nina Pfister at Dubberstein ang Qatar ng 10 a.m. at China ng 6 p.m. para sa round-robin stage ngayong Miyerkules.

Sina short track speed skater Peter Groseclose at coach John Henry Krueger ay sasabak sa men’s 1,500 meters quarterfinal at 500 at 1,000 meters heats sa Biyernes.

Babanat sa Sabado ang figure skaters na sina Cathryn Limketkai at Sofia Frank habang sina Paolo Borromeo, Isabella Gamez at Alexandr Korovin ay sa Linggo.

Centeno at Amit sasargo sa Kamui Las Vegas Open

ni Eddie M. Paez, Jr. @Sports News | Jan. 4, 2025

Photo: CENTENO AT AMIT (amitfbpix)

Magtitipun-tipon ang 64 sa mga pinakamababangis na mga bilyaristang kababaihan sa pagsargo ng Kamui Las Vegas Women's Open sa Nevada ngayong Pebrero 25.

Umaasa ang mga miron sa Pilipinas na alinman sa mga pambatong sina Chezka Centeno at Rubilen Amit ang aakyat sa trono para bigyan ang bansa ng karangalan sa tunggaliang masasaksihan sa Rio All Suite Hotel ng Las Vegas.

Malupit ang baong armas ng dalawang Pinay sa kompetisyon. Si "The Flash" Centeno ang nagtatanggol na kampeon sa paligsahan.

Ang 25-taong-gulang na cue artist ay dating world 9-ball junior champion at 2024 World 10-Ball Championships winner din.

Sa kabilang dako, bagamat 43-anyos na ang pambato ng Mandaue, Cebu, tatlong beses naman nang naging reyna ng pagtumbok si "Bingkay" Amit sa globo (dalawang beses sa 10-ball at kasalukuyang kampeon sa 9-ball).

Tiyak namang magpipilit na pigilan sa nabanggit na 10-ball event na may basbas ng World Pool Billiards Association ang mga bigating karibal mula sa iba't-ibang parte ng daigdig. Ang cash pot ay sumampa sa US$ 75,000.

Kasama sa listahan sina Han Yu (China), Jasmin Ouschan (Austria), Yuki Hiraguchi (Japan), Allison Fisher (Great Britain), Kelly Fisher (Great Britain), Kristina Tkach (Russia), Pia Filler (Germany), Seo Seoa (South Korea), Sylviana Lu (Indonesia) at Chou Chieh Yu (Taiwan).

Romero at Globalport kuwalipikado sa US Open Polo Championship

ni MC @Sports News | Feb. 3, 2025

Photo: Nagpakitang-gilas sa kanyang polo training session si Mikee Romero kasama ang kanyang local team sa Miguel Romero Polo Field sa Calatagan, Batangas. (fbpix)

Sa unang pagkakataon iwawagayway ng Pilipinas ang bandila sa 2025 US Open Polo Championship sa pagsabak ni Mikee Romero at ng kanyang Globalport Polo team laban sa pinakamahuhusay sa mundo sa Wellington, Florida.

Kasaysayan naman ang iuukit ng Globalport bilang unang team ng Asya na sasabak sa kampeonato ng torneo na idaraos sa Marso 24-Abril 20,2025. First time na itatampok ng torneo ang koponan ng mga Filipino.

Ang kuwalipikasyon ng team ay senyales ng impluwensiya ng bansa sa international polo at aasahang maghahatid ng bagong inspirasyon na sport sa bansa maging sa Southeast Asian region.

Hindi lang ito ang unang beses na si Romero na nasa ikatlong termino bilang mambabatas at isa sa pinaka-prominenteng sportsmen at SEA Games bronze medalist na kakatawan para sa bansa.

Kakatawan din siya sa ilang international polo competitions pero ito ang unang pinakamalaking torneo. “It’s a big honor for me to represent the country in this US Open,” ani Romero, na magsisilbi sa ikatlong taon ng 1Pacman party list.

“While qualifying for the US Open is accomplishment enough, we hope to make an impact on the competition as we mount a challenge on the dominance of the established powers of the polo world.”

Pasok din ang Globalport Polo sa 2025 competition kung saan makasasagupa ng team ang world's no. 1 polo player na si Barto Castagnola ng Argentina.

Ang US Polo Open na inorganisa ng United States Polo Association (USPA) ang pinaka-prestihiyosong polo tournament sa mundo sa loob ng 120-year.

Taunan itong ginagawa sa Wellington at ang 22-goal competition ay nilalahukan ng pinaka-astig na polo players sa mundo. Aabangan naman ang Globalport Polo na naghahanda para sa debut game sa kompetisyon.