Chua at Raga, nanaig kina 'Bata' at 'Django' sa Scotch Doubles

ni Eddie M. Paez Jr. - @Sports | April 12, 2021

Tila nagpapahiwatig ang tambalan nina Johann “Bad Koi” Chua at Anton “The Dragon” Raga na panahon na para akuin nila ang pagdadala ng sulo ng Philippine billiards matapos nilang daigin noong Sabado ang mga alamat na sina Efren “Bata” Reyes at Francisco “Django” Bustamante sa dalawang araw na Sharks 9-Ball Showdown: Scoth Doubles na ginanap sa Quezon City.

Sa umpisa ng salpukang may tuntuning unahan sa 50 panalo, tila hindi kumukupas ang makinang na rekord nina Reyes at Bustamante. Ang dalawang cue artists mula sa Gitnang Luzon ay parehong dating world 9-ball champions. Nagsanib-puwersa rin ang dalawa para ibigay sa Pilipinas ang isang World Cup of Pool na titulo. Umusad sila sa 25-20 at 30-25 na kalamangan kontra kina Chua at Raga.

Pero nakaratsada ang mga mas nakababatang pares at dumikit, 32-33, hanggang sa makalamang na sila, 45-40, 48-42. Ipinako nina Chua, dalawang beses na naghari sa Japan Open, at Raga, runner-up ng malupit na China Open, ang panalo laban sa mga Billiards Congress of America Hall of Famers sa iskor na 50-43.

Samantala, nararamdaman ang husay sa pagtumbok ni Jeffrey "The Bull" De Luna matapos makuha ng Pinoy ang kampeonato ng March leg ng Predator Sunshine State Tournament sa Okala, Florida.

Ito na ang pangalawang korona ni De Luna ngayong taong ito dahil siya rin ang nagwagi sa February stop ng torneo sa North Lakeland, Florida. Pang-apat na rin ito sa mga podium finishes na naiposte ng 37-taong-gulang na Pinoy ngayong 2021 sa panahon ng pandemya. Kamakailan ay pumangatlo siya sa Michael Montgomery Memorial 10-Ball Mini (Frisco, Texas) gayundin sa Rack N Grill 9-Ball Shootout (Augusta, Georgia).

Sa pinakahuling salang ni "The Bull" sa kompetisyon, sinagasaan niya sina Jodi Rubin, Francisco Serrano, Benjie Estor at CJ Wiley upang makasampa sa semifinals ng winners' bracket kung saan naghihintay sa kanya si David Singleton. Isang 7-4 na panalo ang nasaksihan para sa kanya kaya nakausad siya sa hotseat match laban kay Anthony Meglino. Dito, magaang idinispatsa ni De Luna si Meglino, 7-3, kaya nasementuhan niya ang kanyang upuan sa finals.

Beal ng Wizards, namayani vs. Warriors; Zion, halimaw

ni Anthony E. Servinio - @Sports | April 11, 2021

Nagsilbing bayani si Bradley Beal sa malupit na 110-107 panalo ng bisitang Washington Wizards sa Golden State Warriors sa NBA kahapon sa Chase Center. Kinumpleto ni Beal ang bihirang four-point play na may 6.1 segundo sa orasan para maagaw ang lamang, 108-107, at sinundan ito ng dalawa pang free throw matapos itapon ng Warriors ang bola.

Nagtapos si Beal na may 20 puntos. Bumida rin sa Wizards (19-32) sina Rui Hachimura na may 22 puntos at Russell Westbrook na may triple double na 19 puntos, 14 rebound at 14 assist.

Binigo ng New Orleans Pelicans ang pangarap ng Philadelphia 76ers na bumalik sa taas ng Eastern Conference, 101-94. Halimaw si All-Star Zion Williamson sa kanyang 37 puntos at 15 rebound at sinuportahan ni Brandon Ingram na may 17 puntos.

Hindi rin nakalapit sa nangungunang Brooklyn Nets ang Milwaukee Bucks matapos ipatikim ng bisitang Charlotte Hornets ang 127-119 na talo. Tumira ng 26 puntos si Miles Bridges at sinundan nina Terry Rozier at Devonte Graham na may tig-20 puntos.

Isinalba ng kanilang depensa sa huling 10 segundo ang Denver Nuggets para takasan ang San Antonio Spurs, 121-119. Triple double si Nikola Jokic na 26 puntos, 13 rebound at 14 assist habang may 22 puntos at 10 rebound si Michael Porter Jr. kasama ang mahalagang free throw na tumakda sa huling talaan.

Nanatili ang agwat ng humahabol na Los Angeles sa liderato ng Western Conference matapos iligpit ang Houston Rockets, 126-109. Namuno sa panalo si Kawhi Leonard na may 31 puntos habang dumagdag ng 26 si Reggie Jackson sa gitna ng pagliban ni Paul George.

Matindi ang naging palitan ng puntos nina Trae Young at Zach LaVine subalit nanaig sa huli si Young at ang Atlanta Hawks sa Chicago Bulls ni LaVine, 120-108. Tinapos ni Young ang laro na may 42 puntos.

Nagtrabaho ang mga bituin sa overtime para maiwasan mapahiya ang Boston Celtics sa kulelat na Minnesota Timberwolves, 145-136. Umapoy para sa 53 puntos at 10 rebound si Jayson Tatum.

Diaz, pa-Uzbekistan na para sa Asian Weightlifting C'ships

ni VA - @Sports | April 11, 2021

Umalis kahapon ng madaling araw mula Kuala Lumpur kung saan may ilang buwan na rin silang nakabase patungong Uzbekistan ang team ni weightlifter Hidilyn Diaz para sa gagawin nitong paglahok sa 2021 Asian Weightlifting Championships.

Ang pagsabak sa nasabing torneo sa Tashkent ang magsisilbing final step upang opisyal na maging qualified ang Pinay weightlifter sa darating na Tokyo Olympics. Pinili nina Diaz, ng kanyang Chinese Coach na si Kaiwan Gao at strength and conditioning coach na si Julius Naranjo ang magtungo sa kapitolyo ng Uzbekistan, isang linggo bago idaos ang kompetisyon upang makapagpahinga mula sa mahaba at nakakapagod na biyahe.

Umalis sila sa Kuala Lumpur ganap na alas- 2:00 ng umaga lulan ng United Emirates Airlines ay inaasahang darating ng Dubai makaraan ang pitong oras na paglalakbay sa himpapawid. At matapos ang 17 oras na layover kinakailangan nilang muling maglakbay ng tatlong oras patungong Tashkent. Ang nabanggit na continental championships na gaganapin sa Abril 15 - 25 ay isang qualifier para sa Tokyo Games at ang pang-anim at huling International Weightlifting Federation-sanctioned tournament na kailangang salihan ni Diaz para makalahok sa Olympics sa ikatlong sunod na pagkakataon.

Kinakailangan lamang ni Diaz na bumuhat doon at kahit hindi siya manalo ng medalya ay uusad siya sa Tokyo Olympics. “Ang Olympics ang pinaka- importanteng competition sa akin. Parang last tune up ko na ito bago 'yung Tokyo Olympics, " ayon sa 2016 Rio Olympics silver medalist sa women’s 53 kgs. Nakatakdang sumabak si Diaz sa 55 kgs category sa Tokyo.