Hintayin ang pagbabalik sa SEAG long jump ni Khay Santos

ni Gerard Peter - @Sports | April 13, 2021

Minsan nang pinagreynahan nina Elma Muros-Posadas, Lerma Bulauitan-Gabito at Marestella Torres- Sunang ang athletics event na long jump sa Pilipinas; ngunit sa kasalukuyang panahon, tila nagkukulang ang susunod sa yapak ng tatlong legendary champion – isang pagkakataon na nais makamit ni dating national team member Katherine “Khay” Santos.

Makailang ulit ng nagningning sa ilang mga international tournaments ang 30-anyos na Baguio City long jumper kabilang ang Asian Grand Prix at Southeast Asian Games – subalit minsan na ring tinalukuran ni Santos ang pampalakasang maaaring pangibabawan niya ng mga panahong nakalipas.

“Noong 2019 SEA Games, although wala ako sa stadium, pero based on the results, di tayo nakapasok sa 2019 SEAG. So parang sa akin, nalungkot talaga ako dun. Dumating ang point na sana andun ako. Yun ang moment na sabi ko dapat nandoon pa rin ako, pero dahil nag-stop ako so choice ko yun,” pahayag ni Santos sa weekly TOPS: Usapang Sports nitong nagdaang Huwebes sa Sports on Air webcast.

Ngunit sa pagkakataong ito, muling susubok ang 2011 SEA Games bronze medalist na makamtan ang naipagpalibang pangarap. “Ngayong 2021, talagang finalize na ang comeback ko kasi nakakalungkot na wala nang long jumper for the next SEA Games in Vietnam. And with my preparations, one day at the time ang ginagawa ko kasi mom ako, may baby ako na inaalagaan and I wanted to make sure na ang preparations sa training ko, hindi ako mai-injure. For now, I do strength & conditioning and more on endurance training ang ginagawa ko,” paliwanag ng 2014 PSC-POC Philippine National Gmes champion sa programang suportado ng Philippine Sports Commission (PSC). Games and Amusement Board (GAB) at Philippine Amusement and Gaming Corp. (PAGCOR).

Napagtanto ni Santos na tila mayroon pa siyang misyong hindi pa napagtatagumpayan at naudlot na pangarap na nais patunayan para sa kanyang bansa. “’Yung reason ko bakit ako makaka-comeback is to prove myself and also the countrymen natin na kaya ko pa na hindi reason for me to stop na dahil mom ka,” eksplika ni Santos.

Drummond, angat ang laro; Embiid, tinambakan ang OKC

ni Anthony E. Servinio - @Sports | April 12, 2021

Pinaalala ng Los Angeles Lakers na sila ang defending champion ng NBA at tinalo ang numero uno sa Eastern Conference na Brooklyn Nets, 126-101, kahapon sa Barclays Center. Umangat ang laro ng bagong pirmang si Andre Drummond sa kanyang 20 puntos at 11 rebound para umakyat sa kartadang 33-20 panalo-talo.

Sumunod si Dennis Schroder na may 19 puntos kahit pinalabas siya at si Kyrie Irving ng Nets ng reperi matapos magtalo ang 2 guwardiya na may 9:41 ang nalalabi sa 3rd quarter. Kumuha rin ng lakas ang Lakers sa isa pang bagong lipat na si Ben McLemore galing Houston Rockets na nag-ambag ng 17 puntos.

Kinuha ng Philadelphia 76ers ang pagkakataon at tumabla muli sa Nets sa 36-17 para sa liderato ng East sa bisa ng kanilang 117-93 paglampaso sa Oklahoma City Thunder. Namuno si Joel Embiid sa kanyang 27 puntos at kumuha ng suporta kay Furkan Korkmaz na may 20 puntos.

Nanatili sa tuktok ng buong NBA ang Utah Jazz at pinaluhod ang bisitang Sacramento Kings, 128-112. Talagang hari ang Jazz (40-13) sa sariling tahanan sa likod nina Donovan Mitchell na may 42 puntos at Mike Conley Jr. na may 24 habang lumiban ng pangalawang sunod na laro si Jordan Clarkson bunga ng pilay sa bukung-bukong.

Pangalawa pa rin sa West ang Phoenix Suns matapos nila sunugin ang Washington Wizards, 134-106. Bumanat para sa 27 puntos si Devin Booker habang nag-ambag ng 15 si Mikal Bridges para sa kartadang 37-15.

Double-double si Damian Lillard na 27 puntos at 10 assist sa pagwagi ng Portland Trail Blazers sa kulelat ng East Detroit Pistons, 118-103. Hindi malayo ang mga kakamping sina CJ McCollum na may 26 puntos at Enes Kanter na may 24 puntos at 30 rebound.

PBA vs. China friendly match aprub bago ang 46th season

ni MC - @Sports | April 12, 2021

Suportado ni Philippine Basketball Association (PBA) team owner at businessman Manuel V. Pangilinan ang suhestiyon ni PBA chairman Ricky Vargas na magkaroon ng friendly match sa pagitan ng PBA players at China bago simulan ang 46th season ng liga.

Ibinigay ni Pangilinan, may-ari ng MVP Group — TNT, Meralco at NLEX teams sa PBA – ang kanyang suporta sa rekomendasyon ni Vargas sa pamamagitan ng tweet. “Yes to Ricky Vargas’s China friendly – hhmmm a bit of an oxymoron nowadays. But hey, if it helps break the pressure and provide relief to our people – lllleeeeezzz ggggoooo PBA!” tweeted ni MVP.

Iminungkahi ni Vargas ang friendly match sa pagitan ng China at select PBA players na tatawaging ‘PBA Warriors’ at iko-coach ni Yeng Guiao na ang layunin ay magbigay ng inspirasyon at pag-asa sa mga tao ngayon panahon ng pandemic.

Nanawagan din ang chairman ng liga ng pagkakaisa sa pagbubukas ng 46th year ng liga. Nabuo ni Vargas ang ideyang friendly match ngayong panahong tumataas ang tensiyon sa pagitan ng Pilipinas at China dahil sa iligal na pagpasok ng China sa teritoryo ng Pilipinas sa West Philippine Sea.