OFWs at tourism frontliners, prayoridad na rin sa bakuna

ni Mary Gutierrez Almirañez | May 28, 2021

Prayoridad na ring mabakunahan kontra COVID-19 ang mga empleyadong naka-assign sa isolation facilities at quarantine hotels o maituturing na tourism frontliners sa ilalim ng A1 priority group, batay sa Department of Tourism (DOT) ngayong araw, May 28.

Ayon kay DOT Secretary Bernadette Romulo-Puyat, inaprubahan ng Inter-Agency Task Force for the Management of the Emerging Infectious Diseases (IATF-EID) ang rekomendasyon nila na itaas ang pagiging prayoridad ng mga nasabing empleyado dahil araw-araw nilang nakakasalamuha ang mga naka-quarantine na posibleng positive sa COVID-19.

Aniya, "It is high time that we protect our tourism frontliners knowing that they are risking their lives each time they show up in the designated quarantine and isolation hotels."

Dagdag niya, "This move shows the government's commitment to protect them. Not only will this decision help ensure the survival of the tourism industry, this will also hasten the country’s economic recovery.”

Maliban naman sa tourism frontliners ay prayoridad na rin sa bakuna ang mga paalis na Pinoy papuntang abroad para magtrabaho o ang mga outbound overseas Filipino workers (OFW).

"The IATF moved to Priority Group A1 the outbound overseas Filipino workers for deployment within the next four months from the intended date of vaccination," sabi pa ni Presidential Spokesperson Harry Roque.

Sa ngayon ay tinatayang 2,507 tourism frontliners na ang nabakunahan kontra COVID-19. Samantala, umakyat na sa mahigit 4.7 million ang kabuuang bilang ng mga nabakunahan sa ‘Pinas.

Giit ni Department of Health (DOH) Undersecretary Maria Rosario Vergeire, "We were able to vaccinate already almost 4.7 million individuals. We are averaging 100,000 jabs per day.”

Public address ni P-Duterte, 2 beses na-postpone dahil sa puyat

ni Lolet Abania | May 25, 2021

Muling ipagpapaliban sa ikalawang beses ngayong Martes ang regular public address ni Pangulong Rodrigo Duterte, ayon sa Malacañang.

Paliwanag ni Presidential Spokesperson Harry Roque, si Pangulong Duterte at kanyang delegasyon ay kababalik lamang sa Manila mula sa isang Regional Peace Council meeting sa Dumaguete City na ginanap nu'ng Lunes nang hapon.

“Talk to the People will be moved tomorrow. Nakauwi na kami galing Dumaguete, ala-una na. Medyo puyat po lahat, including ang mga tao sa OP [Office of the President],” ani Roque sa isang Palace briefing ngayong Martes.

“Kaya sa Wednesday ang Talk to the People,” dagdag ni Roque.

Karaniwan nang isinasagawa ang public address ni P-Duterte tuwing Lunes ng gabi, subalit ito ay na-postpone dahil sa pulong nito sa Dumaguete.

Matatandaang noong May 17 sa naganap na Talk to the People, nakasama ni Pangulong Duterte si Senate President Juan Ponce Enrile na 97-anyos na, bilang kanyang guest upang talakayin ang isyu sa West Philippine Sea.

Dahil sa naging mga pag-uusap at mahabang paliwanag ni Enrile, tumagal ang taped address ng Pangulo kung saan ipinalabas ito at hinati sa dalawang bahagi.

Ang part 1 ay noong May 17 ng gabi at ang part 2 ay May 18 naman ng tanghali.

Sa kabila ng patuloy na pananatili ng mga Chinese sa paligid ng Exclusive Economic Zone (EEZ) ng Pilipinas na nasa West Philippine Sea, sinusuportahan ni Enrile ang posisyon ni P-Duterte na hindi dapat kalabanin ang China.

Pfizer COVID-19 vaccine, sa mahihirap iturok — P-Du30

ni Lolet Abania | May 20, 2021

Iniutos na ni Pangulong Rodrigo Duterte ang pagbabakuna ng donasyong Pfizer-BioNTech COVID-19 vaccines sa indigent population, ayon kay Presidential Spokesperson Harry Roque.

Ayon kay Roque, ibinaba ng Pangulo ang direktiba batay sa kondisyon na ibinigay ng global aid na COVAX Facility na nag-donate ng 193,050 doses ng Pfizer-BioNTech vaccines na nai-deliver na sa bansa.

“Ipinag-utos ni Presidente na ibigay ang Pfizer sa mahihirap at indigent population. Under COVAX guidelines, it is A1, A2, A3 and A5,” ani Roque sa press briefing ngayong Huwebes.

Sa ilalim ng vaccination program ng gobyerno, ang A1 ay mga health workers, A2 ay mga senior citizens, A3 ay mga taong may comorbidities habang ang A5 ay mga mahihirap at indigents.

Ang A4 naman ay mga essential workers o mga kinakailangang mag-report physically sa trabaho sa kabila ng umiiral na quarantine restrictions.

“Iyong Pfizer, hindi po ‘yan ilalagay sa mall. Ilalagay ‘yan sa barangays na mababa ang uptake ng vaccine,” diin ni Roque.

“On A4, we will use the ones (vaccines) paid for by the government,” dagdag ng kalihim.

Batay sa naging evaluation ng Food and Drug Administration (FDA) ng bansa, ang Pfizer-BioNTech ay may efficacy rate na 95% sa isinagawang study population habang may 92% naman na angkop para sa lahat ng lahi.