Hunyo 30, special non-working holiday, idineklara ng Pasay, San Juan at Navotas gov’ts

ni Lolet Abania | June 29, 2022

Idineklara ng mga lokal na pamahalaan ng Pasay, San Juan at Navotas ang Hunyo 30, Huwebes, bilang special non-working holiday sa kanilang lugar para sa inagurasyon ni President-elect Ferdinand “Bongbong” Marcos Jr.

Nilagdaan ni Pasay City Mayor Imelda Calixto-Rubiano ang Executive Order No. 38, na nagdedeklara ng special non-working holiday para “matiyak ang kaligtasan ng mga residente” sa lungsod dahil sa mga road closures at mga protest rallies sa inagurasyon ni Marcos.

Gayunman ayon sa alkalde, ang Pasay City Treasurer’s Office ay bukas mula alas-8:00 ng umaga hanggang alas-5:00 ng hapon upang tumanggap ng payments para sa huling araw ng kanilang pag-avail ng tax amnesty.

Nag-isyu naman si San Juan City Mayor Francis Zamora ng Executive Order No. 125, na nagdedeklara ng special non-working holiday sa Huwebes para “makatulong na masiguro ang kaligtasan ng lahat ng mamamayan at maayos na daloy ng trapiko” sa lungsod.

Naglabas din si Navotas City Mayor Toby Tiangco ng Executive Order No. 67, na nagdedeklara ng special non-working holiday sa buong lungsod sa nasabing araw.

Una nang lumagda noong Hunyo 24 si Manila Mayor Isko Moreno ng Executive Order No. 53, na nagdedeklara ng special non-working holiday sa Manila City “para matiyak ang kaligtasan, seguridad, at proteksyon ang mga partisipante” sa inagurasyon ni Marcos.

Manunumpa si Marcos bilang ika-17 pangulo ng Pilipinas sa Hunyo 30 sa National Museum of the Philippines sa Manila.

Mayo 9-Election Day, idineklarang special non-working holiday ni P-Du30

ni Lolet Abania | May 5, 2022

Idineklara ni Pangulong Rodrigo Duterte ngayong Huwebes, ang Mayo 9, 2022 na special non-working holiday kaugnay sa gaganaping 2022 national at local elections.

“Therefore, I, Rodrigo Roa Duterte, President of the Philippines, by the virtue of the powers vested in me by law, do hereby declare Monday, 09 May 2022, a special (non-working) holiday throughout the country for the National and Local elections,” pahayag ni Pangulong Duterte sa Proclamation 1357 na may petsang Mayo 5.

Giit ng Pangulo, kinakailangan ng mga mamamayan na i-exercise ang kanilang karapatan na bumoto.

“There is a need to declare Monday, 09 May 2022, a special (non-working) holiday to enable the people to properly exercise their right to vote, subject to the public health measures of the national government,” dagdag ng Pangulo.

Nakatakda ang mga Pilipinong bumoto ng bagong pangulo, pangalawang pangulo, 12 senador, mga congressmen, local government officials, at party-list representatives sa Mayo 9 o sa ikalawang Lunes ng Mayo, na nakasaad sa Constitution.

Hirit kay P-Du30... May 9, ideklarang special non-working holiday

ni Lolet Abania | April 28, 2022

Hiniling ng Commission on Elections (Comelec) kay Pangulong Rodrigo Duterte na ideklara ang Mayo 9, 2022, bilang isang special non-working holiday dahil sa nakatakdang national at local elections.

Sa isang media briefing, sinabi ni Comelec Chairperson Saidamen Pangarungan na nilagdaan ng Comelec en banc ang Resolution No. 10784, na humihiling sa Pangulo para ideklara ang Mayo 9 na gawing special non-working holiday sa buong bansa.

“We signed resolution no. 10784 requesting President Rodrigo Roa Duterte to declare May 9, 2022 a special non-working holiday all throughout the country in connection with the national and local elections,” saad ni Pangarungan.

Kaugnay nito, nauna nang isinagawa ang local absentee voting (LAV) para sa mga indibidwal na naka-duty sa Mayo 9, simula nitong Miyerkules, Abril 27 at tatagal hanggang Biyernes, Abril 29.

Ayon sa Comelec, may kabuuang 84,357 botante ang pinayagang mag-avail ng local absentee voting na tatagal hanggang bukas, Abril 29.