South Cotabato, niyanig ng magnitude 5

ni Mai Ancheta @News | August 27, 2023

Nakaranas ng malakas na pagyanig ang mga mamamayan ng South Cotabato na umabot sa magnitude 5 na lindol nitong Sabado ng madaling-araw.

Batay sa report ng Phivolcs, naitala ang pagyanig na tectonic origin alas-3:13 ng madaling-araw, dalawang kilometro ang layo sa bayan ng Surallah.

Naunang ini-report ng Phivolcs sa lakas na 5.5 magnitude ang lindol subalit kalaunan ay ibinaba ito sa 5.0 magnitude.

Dahil sa lakas ng pagyanig, naramdaman ito sa mga bayan ng Tupi, Banga, Polomolok, General Santos City, Kiamba at Maasim sa Sarangani sa lakas na intensity 4.

Naitala naman sa lakas na intensity 3 ang lindol sa mga bayan ng Alabel, Malungon, Malapatan, at Maitum sa Sarangani.

Wala pang ulat kung nagdulot ng pinsala sa South Cotabato ang malakas na pagyanig.

Nagbabala ang Phivolcs ng posibleng aftershocks sanhi ng malakas na paglindol.

South Cotabato, nasa ‘red zone’ status na dahil sa ASF

ni Lolet Abania | June 22, 2022

Sanhi ng mabilis na pagkalat ng African swine fever (ASF), mas hihigpitan ang border security sa mga bayan ng Banga at Surallah ng provincial government ng South Cotabato.

Ayon kay South Cotabato Gov. Reynaldo Tamayo, Jr., nagdeklara na ang Bureau of Quarantine at Department of Agriculture (DA) Region 12 ng “red zone” status sa South Cotabato, kung saan aniya, magpapatupad ng ‘restriksyon sa pagpapalabas ng mga baboy’ sa ilang lugar, kabilang na rito ang Banga at Surallah.

Hinimok naman ni Tamayo ang mga residente na agad na i-report ang posibleng insidente ng ASF upang hindi na kumalat pa ang impeksyon sa mga baboy.

“Titiyakin pa natin, kakausapin ang lahat ng mga backyard farmers natin ng baboy at ‘yung mga large farms na kung mayroon silang nakikita ay talagang gagawa ng paraan na ire-report,” saad ni Tamayo.

“Ang problema ay hindi talaga maiiwasan na mayroon talagang nanghihinayang sa kanilang mga baboy at pilit na tinatago, kinakatay at ibinibenta ang mga karne,” pahayag ng gobernador.

Ayon kay Tamayo, maglalaan umano ang provincial government ng pondo mula sa Provincial Disaster Risk Reduction and Management Office (PDRRMO) para sa kinakailangang gastusin o bayarin ng mga hog growers na naapektuhan ng ASF.

Nababahala naman si Tamayo sa idudulot na epekto ng ASF sa ekonomiya ng lalawigan sakaling hindi pa rin masolusyunan sa mga susunod na buwan.

“Kaya’t kinakailangan ko na magtulungan tayo, ‘wag kayong basta-bastang bumili ng mga baboy na hindi na-check o hindi sa tamang lugar na pinagbibilhan dahil hindi ninyo alam baka kayo ang magdadala ng ASF mismo sa inyong mga palibot,” giit pa ni Tamayo.

200 kaso ng tuberculosis, naitala sa South Cotabato

ni Lolet Abania | June 2, 2022

Nasa tinatayang 200 kaso ng tuberculosis (TB) ang nai-record ng mga health officials sa lalawigan ng South Cotabato.

Ayon kay John Codilla ng integrated health office ng probinsiya, ang mga kasong ito ay na-detect matapos na magsagawa sila ng active case finding sa lugar.

“Ang direction kasi ng Department of Health is hanapin lahat ‘yung ating mga pasyenteng nagkaroon po ng tuberculosis,” ani Codilla.

“So sa first quarter po ‘yan. ‘Yung 200 po na nai-declare or nai-report po natin nu’ng, ngayong buwan lang po ‘yan, ay gawa po ng ating active case finding o pagbibigay po ng mga libreng x-ray doon sa ating mga geographically isolated and depressed areas,” sabi ni Codilla.

Sa ngayon aniya, nagbibigay sila ng libreng gamut sa mga bagong natukoy na tuberculosis patients.

“Libre po ‘yan na binibigay. ‘Yung lahat po ng ating munisipyo ay meron ng TB-DOTS facility, na may kakayahan din po na mag-detect ng iba’t ibang klaseng tuberculosis, hindi lang po doon sa baga kundi sa iba-ibang bahagi rin po ng kanilang mga katawan,”

pahayag ng opisyal.

Gayunman, sinabi ni Codilla na nahaharap sila sa problema kaugnay sa supply ng ilang mga medisina.

Ayon kay ni Codilla, may pondo ang provincial government para bumili ng mga gamot, subalit kailangan nila ng tulong ng national government para makuha ang mga ito ng probinsiya.

“Isa din natin hinihingi ‘no sa Department of Health sa central office, na kung pwede din natin matulungan din kami sa pagbaba din po ng supply galing diyan po sa Maynila,” paliwanag pa niya.