Public-private partnership, kailangan sa pagbangon ng ‘tulog’ na gov’t. assets

ni Sonny Angara - @Agarang Solusyon | March 13, 2021

Bago sumambulat ang pandemya sa globa, at humagupit nang husto sa ating bansa, isa ang turismo sa malalakas nating industriya at malaking aspeto sa pagpapalusog ng ating ekonomiya.

Pero sa ngayon, kasabay ng ibang nanamlay na industriya, sadsad din nang husto ang estado ng turismo.

Sa ganitong pagkakataon, tulad ng nakikita nating pagtutulungan ng mga pribado at pampublikong sektor sa pagsusulong ng vaccination program, may maitutulong din ang private sectors para maibangon ang turismo, partikular ang tourism assets ng gobyerno na kung malilinang lamang ay mapakikinabangan nang husto.

Napakaraming ari-arian ng gobyerno na hindi na nabibigyan ng kaukulang atensiyon. Gumagalaw man ang mga ito, hindi naman ito nakadaragdag nang malaki sa kinikita ng pamahalaan.

Nariyan ang Banaue Hotel and Youth Hostel, gayundin ang napakaraming isla sa Visayas na kulang sa promosyon ng gobyerno upang tangkilikin ng publiko. Ang mga ito ay pawang pag-aari ng Tourism Infrastructure and Enterprise Zone Authority na sinasabing prime tourist destinations. Kung mahahawakan lamang ng private enterprises na may malawak na karanasan sa assets development ang mga ito, tiyak ang pag-usbong ng mga ari-ariang ito ng gobyerno.

Tulad ng sistema sa build-operate-transfer, puwedeng pasukan ito ng private sector at pagandahin ang mga nabanggit nating assets. Sa sandaling magawa na nilang profitable ang mga ito, iyon na ang pagkakataon na muli nilang ibalik ang mga ito sa posesyon ng gobyerno.

Umaasa tayong matapos lamang ang pandemyang ito at maging ligtas na ang kalusugan at ang pagbibiyahe ng mga lokal at dayuhang turista, muling aalagwa ang industriya ng turismo, sa tulong ng mga pribadong sektor.

---

May katanungan ka ba, reklamo o nais ihingi ng tulong? Sumulat sa  AGARANG SOLUSYON ni Sonny Angara, BULGAR Bldg., 538 Quezon Ave., Quezon City

o mag-email sa agarangsolusyon.bulgar@gmail.com

Aalagwa na ang ekonomiya, ngayong meron na tayong bakuna!

ni Sonny Angara - @Agarang Solusyon | March 6, 2021

Lumalarga na ang vaccination program ng gobyerno matapos dumating noong Lunes, Marso 1 ang mga donasyong bakuna ng Sinovac. Unang bugso nito ay para sa ating health workers base na rin sa prioritization ng pagbabakuna.

Umaasa rin tayong darating na rin sa lalong madaling panahon ang iba pang bakuna para naman matugunan ang karapatan ng iba pa nating mga kababayan na makapamili ng nais nilang bakuna.

Ngayong tayo ay may COVID vaccines na, wala nang hadlang upang hindi umalagwa ang ating ekonomiya at kalakalan.

At upang mas maisulong natin ito, higit kailangan ang mas maigting na pagtutulungan ng publiko at pribadong sektor, sa pagtutulak ng malawakang vaccination program para sa lahat.

Isang taon na tayong nakikibaka sa COVID — maraming buhay na ang nalagas at nalagay sa alanganin dahil dito — at napakaraming hanapbuhay ang nawala. Ang mga dati na nating naghihirap na kababayan, mas lalo pang nalubog sa kahirapan.

Noong nakaraang taon, nang sumirit nang husto ang kaso ng COVID-19 sa bansa, isa ang mga pribadong sektor sa naging abala upang tumulong sa ating mga kababayan. Walang sawa silang nakiisa sa pamahalaan sa pagbibigay tulong sa publiko, partikular sa ating healthworkers, mga doktor at iba pang mediko.

Naging instrumento ang pribadong sektor sa pagpapalago sa suplay ng personal protective equipment (PPEs), at face masks para tiyaking sapat ang bilang ng mga ito para sa ating health workers.

Kaakibat din sila ng gobyerno sa pagpapadala ng iba’t ibang tulong tulad ng pagkain at ayudang pinansiyal sa mga pamilyang hinagupit nang husto ng pandemya. Malaking tulong din ang naibahagi ng pribadong sektor sa pagpapalawak sa kapasidad ng bansa sa testing, tracing at treatment ng COVID-19.

Ito ang tunay na kahulugan ng Bayanihan. Akbayan, tulungan, pagkakaisa para sa kapakanan nang lahat.

Ipinakikita lang ng mga pangyayaring ito kung ano ang mabuting nagagawa kung may pagkakaisa at pagtutulungan lalo na sa mga panahong tulad nito — panahon ng krisis at anumang trahedya.

Matagal na nanamlay ang ating ekonomiya dahil sa COVID. At ngayong mayroon na tayong mga bakuna, at dahil sa maigting na koordinasyon ng gobyerno at ng mga pribadong sektor sa kritikal na pagsusulong ng immunization para sa publiko, asahan natin ang muling paglusog ng ating kalakalan at kabuhayan.

Kahit sa ano’ng aspeto, napakahalaga ng pagtutulungan. Kailangan ng Pilipino ang kapwa Pilipino, hindi lamang para makaligtas sa dinaranas na hirap, kundi para umunlad.

Umaasa tayong ang solidong koordinasyong ito ng gobyerno at ng mga pribadong sektor ay hindi lamang ngayong pandemya kundi hanggang sa tayo ay makabalik sa ating normal na pamumuhay.

---

May katanungan ka ba, reklamo o nais ihingi ng tulong? Sumulat sa  AGARANG SOLUSYON ni Sonny Angara, BULGAR Bldg., 538 Quezon Ave., Quezon City

o mag-email sa agarangsolusyon.bulgar@gmail.com

COVID-19 Vaccination Program Act, lusot na sa dalawang sangay ng Kongreso

ni Sonny Angara - @Agarang Solusyon | February 27, 2021

Nito lang Miyerkules, ika-24 ng Pebrero, ipinasa ng dalawang sangay ng Kongreso (Senado at ng Mababang Kapulungan) ang National COVID-19 Vaccination Program Act— isang panukala na ating isinulong sa Mataas na Kapulungan matapos sertipikahan ni Pangulong Rodrigo Duterte bilang urgent bill.

Nilalayon ng panukala na resolbahin ang samu’t saring usapin tungkol sa problema ng bansa sa bakuna kontra COVID-19.

Ilan sa mahahalagang nilalaman ng batas ang magbigay ng legal cover sa ating mga pamahalaang lokal o LGUs at sa mga pribadong sektor na nagnanais bumili ng sarili nilang suplay ng bakuna. Sa kabila nito, sasailalim pa rin ang LGUs at ang private entities sa ilang kondisyon, tulad ng pakikipag-ugnayan sa DOH at sa National Task Force Against COVID-19 sa kanilang vaccine procurement process.

Kaugnay naman sa pondo, bagaman may nakalaan nang P82.5 bilyon sa ilalim ng 2021 national budget para sa bakuna, maaari ring gamitin ng LGUs at ng iba’t ibang kompanya ang kanilang budget resources para sa pagbili ng bakuna at iba pang suplay para rito.

Nabatid natin mula sa mga kaibigan natin sa League of Provinces of the Philippines na sa kasalukuyan, 70 LGUs na ang ngayon ay handa nang bumili ng bakuna at handang gumastos nang hanggang P13-B para rito, kasama na ang mga gastusin sa pagbabakuna ng kanilang constituents.

Sa bahagi naman ng mga pribadong sektor, tinatayang 17 milyong dosis na ang kanilang naisuguro nitong nakalipas na Disyembre.

At upang masagot ang pangamba ng nakararami sa epekto ng bakuna sa publiko, nilalayon din ng batas na magkaroon ng indemnification fund o bayad-pinsala sa mga posibleng makaranas ng negatibong epekto ng COVID vaccine o kaya naman, maging dahilan ng pagkasawi ng tao.

Umaabot naman sa P500-M ang inilaan ng gobyerno para sa nabanggit na pondo, na pangangasiwaan ng Philippine Health Insurance o PhilHealth.

Isa rin sa magandang layunin ng batas ay ilibre sa anumang uri ng tax o fees ang importasyon at donasyon ng COVID-19 vaccines. Ibig sabihin, walang anumang ipapataw na customs duties, VAT, excise tax at donor’s tax ang gobyerno sa mga darating o papasok na COVID vaccines sa bansa na pawang aprubado ng Food and Drugs Administration.

Tayo ay nagpapasalamat sa ating magigiting na kasamahan sa Senado at sa Kamara na nagkaisa upang mabilis na maipasa ang batas na ito na anumang araw mula ngayon ay lalagdaan at pagtitibayin na ni Pangulong Duterte.

---

May katanungan ka ba, reklamo o nais ihingi ng tulong? Sumulat sa  AGARANG SOLUSYON ni Sonny Angara, BULGAR Bldg., 538 Quezon Ave., Quezon City

o mag-email sa agarangsolusyon.bulgar@gmail.com