Panukalang pag-amenda sa SK Reform Law, lusot na sa Senado

ni Sonny Angara - @Agarang Solusyon | May 29, 2021

Lusot na sa ikatlo at huling pagbasa sa Senado ang ating panukalang Senate Bill 2124 o ang proposisyong pag-amenda sa SK Reform Law.

Sa pamamagitan ng panukalang ito, mabibigyang-katarungan ang palasak na kasabihang ‘ang kabataaan ang pag-asa ng bayan’. Nilalayon natin dito na palakasin ang kapangyarihan ng kabataan sa ating komunidad at mabigyang-oportunidad sila na magpahayag ng kanilang tinig at saloobin sa iba’t ibang usapin sa ating bansa.

Sila ang susunod na henerasyon ng mga lider, kaya’t nararapat na ngayon pa lamang ay hinuhulma na natin ang kanilang kaalaman sa mahahalagang aspeto ng lipunan.

Nagpapasalamat tayo sa ating mga kasamahan sa Senado na sumang-ayon sa ating panukala.

Sa Hunyo 30 taong kasalukuyan, paso na ang bisa ng Bayanihan 2 o ang Bayanihan to Recover as One Act, gayundin ang pinalawig na 2020 national budget. Ang nakapanlulumo, mag-e-expire na lang ang bisa ng mga batas na ito, hindi pa rin pala naio-obligate sa mga nauukol na programa ang mga pondo.

Panawagan natin sa concerned government agencies, isang buwan na lang ang natitirang palugit — baka puwedeng gastusin na ang pondo para sa iba’t ibang priorities na inilaan sa inyo sa ilalim ng Bayanihan 2 at ng 2020 GAA.

Huwag sana nating sayangin ang pinagsikapang pagsulat ng batas ng ating mga lehislador na kinabibilangan ng inyong lingkod, masiguro lamang na sa panahon ng pandemya ay may maaasahang tulong ang ating mga kababayan.

Kung hindi magagamit sa tamang panahon ang mga pondong ‘yan, babalik ‘yan sa Bureau of Treasury at masasayang lang ang magandang intensiyon ng batas. Hindi natin puwedeng sabihin na nagahol tayo sa oras kaya hanggang ngayon ay hindi pa rin nai-obligate ang mga pondo. Disyembre pa nang nakaraang taon, expired na dapat ang Bayanihan 2, gayundin ang 2020 GAA. Pero dahil marami pa sa mga pondo ang hindi pa nagamit, pinalawig natin ang bisa ng mga batas na ‘yan hanggang ngayong June 30, 2021.

Ang Department of Agriculture, mayroon pa ring unobligated funds na P1.5 bilyon; tinataya namang P6-B hanggang P7-B pang pondo ang hindi nagagamit ng DOTr; mayroon namang P9-B unobligated fund ang DOH, habang ang Department of Trade and Industry, mayroong P1-B pondo na dapat magamit para pautang sa ating small and medium enterprises na talaga namang hinagupit ng pandemya.

Maging ang Department of Education, mayroon pa ring pondong hindi pa nagagamit na nakalaan sa kanilang digital infrastructures at alternative learning modalities.

Sa kabuuang P4-B ng DepEd, base mismo sa datos ng ahensiya, P2.5-B pa lamang ang naipalalabas nito mula Setyempbre 2020. At sa halagang ‘yan, P32-M ang nai-disburse ngayong Mayo 2021.

Liban sa implementasyon ng digital infrastructures at alternative learning modalities, mayroon pang P300 milyong pondo na inilaan sa DepEd sa ilalim ng Bayanihan 2, para naman ‘yan sa allowances at subsidies para sa qualified students. Pero hanggang ngayon, hindi pa rin ito nao-obligate. Hanggang ngayon, wala pa ring naio-obliga ang DepEd sa aspetong ito.

Kaawa-awa ang mga guro na dumurukot na ng panggastos sa sariling bulsa para mapondohan ang kanilang internet connection para lang magtuluy-tuloy ang kanilang trabaho. May pondo ang DepEd, kaya’t kung maaari, resolbahin na ang problemang ito ng mga guro sa lalong madaling panahon.

Samantala, gumugulong ngayon sa Kamara ang pagpasa ng Bayanihan 3, at nito ngang nakaraang araw, lumusot na ito sa committee level. Maganda ang intensiyon ng batas, pero ang malaking tanong, saan tayo kukuha ng pondo para rito? Kung uutangin ito ng gobyerno, hindi ito praktikal, dahil parang lumalabas, ‘yung ayudang itinulong natin, parang pababayaran din sa mga benepisaryo.

Isa pa, mahalaga ring makita muna natin ang kinahinatnan ng mga pondo sa ilalim ng Bayanihan 2 at ang extended GAA — kung paano ito inobliga ang mga ahensiya.

---

May katanungan ka ba, reklamo o nais ihingi ng tulong? Sumulat sa  AGARANG SOLUSYON ni Sonny Angara, BULGAR Bldg., 538 Quezon Ave., Quezon City o mag-email sa agarangsolusyon.bulgar@gmail.com

Mahalaga bilang proteksiyon ang bakuna

ni Sonny Angara - @Agarang Solusyon | May 22, 2021

Dalawang linggo na ang nakalilipas nang ang inyong lingkod ay makapagbakuna. Napakahalaga ng bakuna upang mapangalagaan natin ang ating sarili mula sa mga sakit, partikular sa COVID-19.

Lilinawin lang natin, hindi porke nabakunahan na tayo kontra COVID ay hindi na tayo tatablan nito. Maaari pa rin tayong tablan, pero mas may laban ang ating katawan sa posibleng paglala ng karamdamang ito. Base ‘yan sa pahayag ng mga eksperto.

Umabot sa ating kaalaman na hanggang sa kasalukuyan, marami pa sa mga kababayan natin ang parang takot at nagdadalawang-isip na magpabakuna. Ultimong senior citizens na siyang pinaka-nalalagay sa panganib ‘pag tinamaan ng COVID ay ayaw umanong magpabakuna.

Sabi ng mga kababayan natin, dapat maging mabilis ang gobyerno sa pagbabakuna upang ma-achieve ang herd immunity. Pero, paano natin ito mararating kung marami sa atin, ayaw magpabakuna?

Dapat, bago matapos ang taong kasalukuyan, makapagbakuna tayo ng higit kalahating porsiyento ng ating populasyon para marating natin ang herd immunity. Pero kung hindi, masasayang ang mga bakuna, masisira at mapupunta sa wala ang mga ginastos natin.

Sa isang household, kung isa lang ang nakapagbakuna, at lahat ng kasama ay patuloy na tumatanggi, paano nila mapangangalagaan ang kalusugan ng isa’t isa?

Ang pagpapabakuna ay hindi lang para sa ating sarili kundi para na rin sa kapakanan ng mga kasama natin sa bahay, sa trabaho at sa mga taong nakasasalamuha natin sa araw-araw.

Panawagan na lang natin sa gobyerno, partikular sa Interagency Task Force (IATF), pasimulan na ang inoculation para sa A4 group o itong mga kababayan nating essential and frontline workers, at ilang grupo ng pribadong sektor. Gayunman, pagtuunan pa rin natin ng pansin ang pagbabakuna sa ating seniors at sa mga kababayang may comorbidities. Para kasi hindi masayang ang mga bakuna, bakunahan na natin ang mga next in line priorities at ‘yung mga taong willing o gustong magpabakuna. Kung hihintayin natin ‘yung mga naunang priorities na hindi naman mapilit, posibleng mapunta lang sa wala ang mga pinagkagastusan nating vaccines.

---

May katanungan ka ba, reklamo o nais ihingi ng tulong? Sumulat sa  AGARANG SOLUSYON ni Sonny Angara, BULGAR Bldg., 538 Quezon Ave., Quezon City o mag-email sa agarangsolusyon.bulgar@gmail.com

Gutom, kahirapan, nagpapabagsak sa dignidad at yumuyurak sa pagkatao

ni Sonny Angara - @Agarang Solusyon | May 08, 2021

Bago ang lahat, nais muna nating kumustahin ang ating mga kababayan. Sana’y patuloy tayong nasa maayos na kalagayan, malusog at walang anumang malaking suliranin.

Tayong mga Pinoy, karamihan sa atin, kahit gaano kalaki ang problema, natural ang palaging may ngiti sa mga labi. Hilig natin ang mga tsikahan, pakikipag-tropa — ‘yung tipong kapag nakasalubong natin ang kaibigan sa kalye, may beso-beso na, may payakap-yakap pa. ‘Yun nga lang, sa panahong ito ng pandemya, hindi muna ito puwede.

Kilala rin tayo sa pagiging pusong-mamon: maawain, madaling maiyak sa malungkot na sitwasyon at malambot ang puso sa pakikisimpatya. Siguro, dahil sa mga katangian nating ito, nagagawa nating magpaabot ng tulong sa ating kapwa sa anumang paraan.

Siguro naman, lahat tayo ay pamilyar na sa pagsulpot ng mga community pantry. Ang iba nga, nakatutuwa at may kani-kanya pang diskarte para dumugin. Paalala lang sana natin, maging maingat at palaging isaisip ang kalusugan kapag tayo ay nasa labas ng ating tahanan.

Mula nang humambalos ang COVID-19 sa iba’t ibang panig ng mundo, talagang dumami ang bilang ng nagugutom at naghihirap. Hindi lang sa atin kundi maging sa iba pang sulok ng daigdig.

Ayon sa Food and Agriculture Organization o FAO, humigit-kumulang 690 milyong indibidwal (katumbas ng 8.9 porsiyentong kabuuang global population) ngayon ang dumaranas ng matinding gutom at paghihirap.

Sa report ng FAO sa State of Food Security and Nutrition in World 2020, sinabi nilang maaaring pagdating ng 2023 ay posibleng umabot pa sa 840 milyon ang bilang ng mga ito.

Ang pandemya ng COVID-19 din ang sinasabi nilang dahilan ng lalo pang paglaganap ng malnutrisyon, partikular sa mga sektor na dati nang naghihirap.

Sa isinagawa namang survey ng Social Weather Stations (SWS) sa fourth quarter ng 2020, nakumpirma ang paglala ng taggutom sa bansa.

Kung noong 2019, naitalang 9.3 porsiyento ng kabuuang populasyon ng Pilipinas ang nagugutom, dumoble ang bilang ng mga ito nitong 2020 na umabot sa 21.1 percent o mahigit 5 milyong pamilya. Mas mataas pa sa naitalang hunger rates noong 2010 at 2011 na 19.9 percent.

Bagama’t bumaba ang total hunger rates sa 16 percent noong Nobyembre mula sa record high na 30.7 percent noong Setyembre 2020, hindi mapasusubaliang 4 na milyong pamilyang Pilipino ang nagdurusa mula sa matinding gutom.

Isinulong natin ang Right to Adequate Food Framework Act o ang Senate Bill 138 na nagpapatibay na hindi lamang para sa charity ang pagbibigay ng pagkain sa mga nangangailagan kundi legal entitlement. Dapat itong mabura sa ating lipunan dahil isa ito sa mga nagpapababa sa dignidad at yumuyurak sa karapatang-pantao ng ating mga kababayan.

Sa pamamagitan ng mga nagsulputang community party, maaaring matunton natin ang inaasam-asam nating Zero Hunger plan na pangunahing layunin natin sa ating panukala.

---

May katanungan ka ba, reklamo o nais ihingi ng tulong? Sumulat sa  AGARANG SOLUSYON ni Sonny Angara, BULGAR Bldg., 538 Quezon Ave., Quezon City o mag-email sa agarangsolusyon.bulgar@gmail.com