Social pension para sa indigent seniors, dinoble!

ni Sonny Angara - @Agarang Solusyon | August 20, 2022

Noong kabataan at kalakasan ng ating mga nakatatanda, tulad ng mga magulang ng inyong lingkod, ang inyong lolo at lola o kung sino pa mang senior members ng pamilya, naging malaking bahagi sila sa pagpapalakas ng ating ekonomiya. Naging malaking ambag sila sa pagpapaunlad ng lipunan.

Ang nakalulungkot — meron tayong indigent senior citizens — mga nakatatandang nagdarahop, walang masandigan o maasahan at walang natatanggap na tulong mula sa mga kaanak o maging sa pamahalaan.

Kamakailan, nag-lapse into law o awtomatiko nang naging batas ang Senate Bill 133 na napagtibay bilang Republic Act 11916 na naglalayong itaas ang social pension ng ating indigent seniors. Ang ibig sabihin, kung dati ay tumatanggap lamang sila ng P500 kada buwan, ito ay itinaas na sa P1,000 o nangangahulugang P12,000 sa buong taon.

Ang social pension for indigent seniors ay bahagi ng Republic Act 9994 o ang Expanded Senior Citizen’s Act of 2010 na amended version naman ng Senior Citizen’s Act o RA 7432. Mas kilala ito sa tawag na Angara Law dahil ang orihinal na awtor ng batas ay ang aking namayapang ama, si dating Senate President Edgardo Angara. Ang dalawang batas na nabanggit ay pawang likha ni dating senador Ed Angara.

Isinasaad ng RA 9994 na mabigyan ng diskwento ang ating seniors sa kanilang mga pangunahing pangangailangan tulad ng gamot at exempted din sa mga ipinapataw ng value-added tax o VAT.

Masasabing indigent ang senior citizen kung siya ay iginugupo na ng karamdaman, napakahina na ng pangangatawan at wala nang kakayahang makapagtrabaho; kung sila ay may kapansanan, walang anumang pension mula sa SSS o GSIS, walang natatanggap na tulong-pinansyal mula sa gobyerno o sa mga pribadong ahensya, walang pinagkakakitaan, walang kompensasyon at walang anumang tulong na natatanggap sa mga kaanak nito. Base ito sa paliwanag ng Department of Social Welfare and Development na siyang mangangasiwa sa guidelines o sa pagpapatupad ng RA 11916.

Maging ang Department of Trade and Industries, may hakbang ding palawigin hanggang sa online stores ang ipinatutupad na discounts para sa ating seniors.

***

At napag-uusapan na rin lang natin ang pangangalaga sa ating senior citizens, may karampatang parusa, tulad ng pagkakulong ng ilang buwan ang mga mapatutunayang nagpabaya, nang-abuso at nagkakait ng suportang-pinansyal sa ating mga nakatatanda.

'Yan ang nilalaman ng isinusulong nating panukala sa Senado, ang Anti-Senior Citizens Abuse Act na naglalayong protektahan ang ating mga lolo at lola.

Sa ating panukala, ituturing na isang uri ng pang-aabuso ang pagpapabaya sa kanilang sitwasyon, tulad ng pagkakait sa kanila ng pagkain, tirahan, healthcare at anumang uri ng proteksyon.

Ituturing namang economic abuse sa senior citizens ang pagbawi sa kanilang financial support, ang pagkontrol, ang hindi awtorisado at maling paggamit ng kanilang pera at ari-arian.

Psychological abuse naman ang pagbibitaw sa kanila ng masasakit na salita, tulad ng pagmumura, pang-iinsulto, pananakot, pamamahiya, harassment at social isolation o ang pagkakait sa kanila ng kalayaang makalabas at makipag-usap sa ibang tao. Ang mga kaanak na mapatutunayang gumagawa ng mga naturang pang-aabuso sa senior citizen ay maaaring makulong nang mula isa hanggang anim na buwan. Ang hindi kaanak na mang-aabuso sa nakatatanda ay papatawan ng maximum penalty.

Hindi kikilalanin ang mga rason na lasing o naka-droga ang isang taong mang-aabusong pisikal at seksuwal sa senior citizen at maaaring makasuhan nang naaayon sa batas.

---

May katanungan ka ba, reklamo o nais ihingi ng tulong? Sumulat sa  AGARANG SOLUSYON ni Sonny Angara, BULGAR Bldg., 538 Quezon Ave., Quezon City o mag-email sa agarangsolusyon.bulgar@gmail.com

3 Panukalang nakatuon sa pagpapalakas sa sektor kabataan, ganap nang batas!

ni Sonny Angara - @Agarang Solusyon | August 6, 2022

Isang malaking karangalan para sa inyong lingkod na maging ganap na batas ang tatlo sa ating mga panukala na nagsusulong sa kapakanan ng mga kabataan.

Ito ay matapos mag-lapse into law ang mga ito na ang isinulong bilang chairman ng Senate Committee on Youth. Ang mga ito ay pawang nakatuon sa pagpapalakas sa sektor ng kabataan na sa mga darating na panahon ay maaaring maging lider ng ating lipunan.

Kabilang sa mga naisabatas ang National Youth Day (RA 11913); National Music Competitions for Young Artists (RA 11915) na kapwa nag-lapse into law nitong July 30, 2022, habang ang Summer Youth Camp (RA 11910) ay nag-lapse into law noong July 28, 2022.

Sa ilalim ng RA 11913, isinasaad na tuwing ika-12 ng buwan ng Agosto taun-taon, ipagdiriwang ang National Youth Day, kasabay ng International Youth Day na idineklara naman ng United Nations sa parehong petsa.

Inaatasan, sa ilalim ng batas na ito, ang National Youth Commission, ang Department of Education, Commission on Higher Education at ang Technical Education and Skills Development Authority na ibilang sa talakayan sa pagdiriwang ng National Youth Day ang career paths, sustainable Development Goals, ang pangangalaga sa kalikasan, patas na pagtrato sa kasarian at pangangalaga sa kalusugang pangkaisipan.

Sa pamamagitan ng mga aktibidad na ito, mahuhulma natin ang disiplina, talino, talento at leadership prowess ng kabataan. Maihahanda natin sila sa mas produktibong pamumuhay at bilang pinuno ng mga susunod na henerasyon.

Ang National Music Competitions for Young Artists (NAMCYA) naman na pinagtibay sa ilalim ng RA 11915 ay inaatasan ng batas na maging tulay para makadiskubre ng mgabagong music talents; pagpapalakas sa industriya ng musika; ang preservation, development and promotion ng musikang Pinoy bilang bahagi ng ating sining at pagpapatuloy ng iba’t ibang programang may kinalaman sa research, documentation at paglilimbag ng musikang Pilipino na ipalalaganap sa mga paaralan at sa publiko.

Ang ating panukalang nagsusulong ng Summer Youth Camp na ipinagtibay bilang Republic Act 11910 ay taunang isasagawa upang maibahagi sa kabataan ang pagpapahalaga sa responsibilidad, pagkamakabayan, pagsisilbi sa kapwa at kaalaman sa pamumuno.

Mangunguna sa pagsasagawa ng Summer Youth Camp ang Sangguniang Kabataan upang ma-monitor at ma-evaluate ang implementasyon nito sa kani-kanilang nasasakupan.

---

May katanungan ka ba, reklamo o nais ihingi ng tulong? Sumulat sa  AGARANG SOLUSYON ni Sonny Angara, BULGAR Bldg., 538 Quezon Ave., Quezon City o mag-email sa agarangsolusyon.bulgar@gmail.com

Hirit kay P-BBM sa SONA… Solusyon sa pang-araw-araw na kalbaryo ng mga komyuter

ni Sonny Angara - @Agarang Solusyon | July 23, 2022

Sa Lunes, July 25, gaganapin ang kauna-unahang State of the Nation Address (SONA) ni Pangulong Ferdinand Marcos, Jr. na posibleng personal na daluhan at saksihan ng mga imbitadong personalidad at mambabatas.

Maraming ekspektasyon sa kanyang magiging pahayag — ekspektasyon sa mga programang nakatakdang ipatupad ng kanyang liderato na sana’y makatulong nang malaki sa ating bansa at sa ating mga kababayan.

Isa sa mga problema sa kasalukuyan ay ang transportasyon. Kaya’t sana’y mailatag ng Pangulo sa kanyang SONA ang mga detalye kung paano ito reresolbahin ng kanyang pamunuan.

Hanggang sa kasalukuyan, hindi pa natatapos ang malalaking proyektong pang-transportasyon na iniwan ng administrasyong Duterte, tulad ng MRT-7 kaya’t nananatiling hirap na hirap ang mga komyuter sa kanilang pang-araw-araw na pagbibiyahe. Posibleng lumala pa ang problemang ito, lalo na’t nalalapit na ang Nobyembre, kung saan ipatutupad ang face-to-face classes.

Nabanggit ni Pangulong Marcos sa kanyang inauguration speech ang pakikipagtulungan sa pribadong sektor. Isa ito sa ating mga inaasahang tatalakayin ng Punung-Ehekutibo sa kanyang pag-uulat sa bayan sapagkat magandahang hakbang ang pakikipag-partner ng gobyerno sa mga pribadong sektor.

◘◘◘

Putok na putok din ngayon ang binabalak na ‘rightsizing’ ng administrasyong Marcos sa mga ahensya ng gobyerno. Dahil dito, marami ang nag-aalala na madaragdagan ang mga magsasarang departamento at darami ang mga manggagawa sa gobyerno na mawawalan ng trabaho.

Pero ano nga ba talaga ang kahulugan nito?

Sa totoo lang, hindi ito direktang nangangahulugan ng sibakan sa gobyerno pero madalas, ganyan ang kapupuntahan. Puwede nating sabihin na dahil sa pulitika, minsa’y nagdodoble-doble ang mga tanggapan sa pamahalaan dahilan para maging bloated ang government agencies. Ang trabaho ng mga kawani, halos pare-pareho lang.

Sabi nga natin, maaari namang simulan ng administrasyong Marcos ang ‘rightsizing’ sa lalong madaling panahon at puwede nila itong umpisahan sa mga government-owned and-controlled corporations or GOCCs.

Matatandaan nating sa mga nagdaang panahon, mayroong 12 GOCCs ang na-abolish dahil sa kawalan ng kita at siyam na GOCCs naman ang ipinasara dahil sa overlapping functions.

Kung ito ang sa tingin ng gobyerno ay hindi magiging balakid sa pag-abante ng kabuhayan at tiyak na makatutulong, gawin nila ang mga nararapat na hakbang.

Wala mang batas na nag-aatas sa rightsizing, may kaukulang kapangyarihan ang Ehekutibo na magre-organize ng GOCCs, base sa isinasaad ng Governance Act of 2011 na iniakda ni dating senador Franklin Drilon.

---

May katanungan ka ba, reklamo o nais ihingi ng tulong? Sumulat sa  AGARANG SOLUSYON ni Sonny Angara, BULGAR Bldg., 538 Quezon Ave., Quezon City o mag-email sa agarangsolusyon.bulgar@gmail.com