Huling SONA ni P-Du30, bantay-sarado sa mga pulis

ni Ronalyn Seminiano Reonico | July 26, 2021

Nakaalerto ang Philippine National Police (PNP) ngayong Lunes para sa huling State of the Nation Address (SONA) ni Pangulong Rodrigo Duterte at ayon kay Chief Police General Guillermo Eleazar, nagdagdag pa ng mga security task groups.

Saad ni Eleazar, “‘Yung ating sinasabing SSTG or security sub-task group, naka-deploy siya. In fact, nag-realign tayo ng kaunti, nag-adjust. From 13, naging 15 na SSTG ‘yan.”

Nakaantabay umano ang mga security task groups sa St. Peter Memorial Chapel kung saan nakatakdang magtungo ang mga raliyista at mga magsasagawa ng kilos protesta mula sa University of the Philippines, gayundin sa National Housing Authority, at Commission on Human Rights.

Samantala, bago mag alas-8 nang umaga ay nagtipun-tipon na ang mga raliyista sa Diliman campus at lahat naman ay sumusunod sa ipinatutupad na mga health protocols.

8 senador sure na sa huling SONA ni P-Duterte

ni Lolet Abania | July 22, 2021

Walong senador ang personal na dadalo sa ikaanim at huling State of the Nation Address (SONA) ni Pangulong Rodrigo Duterte sa Lunes, Hulyo 26 sa Batasang Pambansa Complex sa Quezon City, ayon kay Senate President Vicente Sotto III.

“Only eight manifested their intention to attend the SONA physically. The rest will be virtual,” ani Sotto sa isang virtual interview ngayong Huwebes. Bukod kay Sotto, ang mga senador na personal na makikinig sa SONA ni Pangulong Duterte ay sina Senate Majority Leader Juan Miguel Zubiri, Senator Ronald dela Rosa, Senator Sherwin Gatchalian, Senator Christopher Lawrence Go, Senator Imee Marcos, Senator Ramon Revilla Jr., Senator Francis Tolentino.

Ang mga mambabatas at mga staff members na dadalo sa event ay kinakailangang mag-present ng kanilang vaccination cards, kung saan nakasaad dito na sila ay nabakunahan na dalawang linggo bago pa ang SONA ng Pangulo.

Maliban dito, kailangan din silang sumailalim sa RT-PCR swab test dalawang araw bago ang araw ng SONA. Kapag lumabas na negatibo ang resulta sa RT-PCR test, ang mga lawmakers ay kailangang sumailalim sa isa pang antigen COVID-19 test sa Lunes, Hulyo 26, na isasagawa ng Presidential Security Group sa loob ng Batasang Pambansa Complex. Ang mga mambabatas ay bibigyan ng PSG-prescribed face masks at face shields na may nakalagay na QR codes.

'Di nagpabakuna, bawal sa SONA!

ni Lolet Abania | July 19, 2021

Fully vaccinated na indibidwal lang ang papayagang pisikal na makadalo sa huling State of the Nation Address (SONA) ni Pangulong Rodrigo Duterte sa Hulyo 26, ayon kay House Secretary General Mark Llandro Mendoza.

Sa isang virtual interview kay Mendoza, sinabi nitong tinatayang nasa 350 katao ang maaaring dumalo sa SONA. “As of now, ang papayagan sa loob, around mga 350 na tao... magkakasama na lahat, senators, congressmen, mga ibang government officials saka ibang guests,” ani Mendoza ngayong Lunes.

“Ang ginawa natin kasi, ‘yung mag-a-attend nang physically sa SONA, ‘yung papasok, fully-vaccinated actually. ‘Yun ang isa sa requirements na inano ng PSG, ini-require ng House,” sabi ng opisyal.

“Kaya naman dinamihan natin ngayon, karamihan naman kasi is fully-vaccinated na. At the same time, nagluwag na rin ‘yung IATF so 30% ng capacity ng plenary ay puwedeng gamitin. Pero piling-pili rin talaga ang inano namin, ni-require na talagang fully-vaccinated ka,” sabi pa ni Mendoza.

Ayon kay Mendoza, ang mga dadalo sa SONA ay kailangang sumailalim sa RT-PCR at antigen testing. Aniya, ang RT-PCR test ay para sa mga papasok sa plenary habang ang antigen test ay para sa mga hindi kailangan sa loob ng plenary.

“Hindi naman natin pupunuin ‘yung plenary, eh. Plenary siguro, mga around 60... The rest kasi, nasa first and second gallery siya,” saad ni Mendoza. Dagdag niya, ang nasa guest list ay mga dating pangulo, mga bise-presidente, Speakers of the House, at iba pang mahahalagang personalidad na naimbitahan.

Binanggit din niya si dating Pangulong Gloria Macapagal-Arroyo na nagkumpirmang dadalo sa SONA. Gayundin, si VP Leni Robredo ay naimbitahang dumalo subalit wala pang kumpirmasyon mula rito.

Magkakaroon din aniya ng Zoom links para sa mga hindi makaka-attend sa SONA. Samantala, ayon kay Mendoza, ang director ng SONA ngayong taon ni Pangulong Duterte ay mula sa government channel na PTV4.

Isasailalim din sa lockdown simula sa Biyernes, Hulyo 23, ang Batasang Pambansa. “Ginagawa naman talaga ‘yun. Normally by Friday, lockdown na talaga, wala na talagang puwedeng pumasok sa Batasan starting Friday,” ani pa ni Mendoza.