SONA… So, ano na!

ni Fr. Robert Reyes @Kapaayapaan / Patakbo-takbo | July 24, 2024

Para saan ba talaga ang State of the Nation Address o SONA ng Pangulo? 

Sa dinami-dami ng mga pangulo na nakilala ko, marami na rin ang ating karanasan sa kani-kanyang SONA. Dahil dito, maaari na rin akong makapagbigay ng tinatawag na “opisyal” na mensahe at ang ‘di opisyal na epekto ng mensahe ng SONA.

Sa nakaraang halos pitong dekada ng ating buhay, naranasan natin at narinig ang ilan sa mga SONA ng 11 presidente. Mula kina Ramon Magsaysay Sr. (1953-1957); Carlos P. Garcia (1957-1961); Diosdado Macapagal (1961-1965); Ferdinand Marcos (1965-1986); Corazon Aquino (1986-1992); Fidel V. Ramos (1992-1998); Joseph E. Estrada (1998-2001); Gloria Macapagal Arroyo (2001-2010); Benigno Aquino (2010-2016); Rodrigo Duterte (2016-2022) at Bongbong Marcos (2022-present).

Isa sa mahalagang papel ng presidente ay ang pamamahayag. Araw-araw maririnig, mapapanood at mababasa ang mga sinasabi, ginagawa at sinusulat ng presidente. Mahalagang pansinin ang mga ito, hindi dahil totoo lahat ito kundi kailangang sinupin, suriin at kilatisin ang lahat ng sinasabi, ginagawa at isinusulat upang malaman kung ano ang totoo at hindi. Maaari bang magsinungaling ang presidente? Ibahin natin ang tanong at baka mas madaling sagutin ito. Lagi bang nagsasabi ng katotohanan ang presidente? O kaya naman, maaari bang magkalat ng kasinungalingan sa halip na magpahayag ng katotohanan para sa kapakanan ng lahat. 

Narinig natin ang SONA ni PBBM nitong Lunes, Hulyo 22, 2024. Ang nilalaman ba ng SONA ng Presidente sa taong ito ay ang gustong marinig ng karamihan ng mga mamamayan? 

Ayon sa mga survey, inaasahan ng marami ang malinaw na paliwanag sa kalagayan ng ating ekonomiya. Ano nga ba ang tunay na kahulugan ng estado ng ating ekonomiya? Lumulubog ba o umaangat tayo? Konektado rito ang pagtaas at pagbaba ng presyo ng lahat ng bilihin. At siyempre may kaugnayan din ang paglikha ng mga iba’t ibang uri ng hanapbuhay.

Batay sa mga eksperto, kabuhayan at ekonomiya pa rin ang higit na mahalaga para sa karamihan. 

Meron tayong nabasang ilang mga pagsusuri na nagbigay ng mataas o pasadong grado sa Presidente. Bumubuti raw ang ekonomiya at bumababa raw ang inflation. Bumaba din daw ang tariff o buwis sa imported na bigas. Maayos daw ang ilang mga bagong appointees tulad nina DepEd Sec. Sonny Angara at DA Sec. Tiu Laurel. Pananaw ito ni Gary Teves, dating Finance secretary sa ilalim ni PGMA. 

Para sa atin, huwag na nating masyadong kumplekahin ang usapan. Balikan na lamang natin ang ipinangako ni Pangulong Bongbong noong bagong halal pa lang siya. Sinabi niyang magiging P29 ang kilo ng bigas. Naipahayag nga niya ito, ngunit merong mga nagsasabi na nagkamali siya ng tunay niyang gustong sabihin. Sa halip na magbawas o bumaba ay tumaas pa ang presyo ng bigas sa ating bansa na umaabot na P60 kada kilo nito. 

Subalit, gaano kahalaga ang mga sumusunod na isyu? Una, ang mga POGO at ang iba’t ibang krimen na nagaganap sa loob ng mga ito. Pangalawa, ang patuloy na panghihimasok ng China sa ating karagatan. Pangatlo, ang paglala ng korupsiyon at pang-apat, ang kapansin-pansin na bangayan ng mga trapo na makikita sa away ng mga Marcos at Duterte.

Kumusta naman ang SONA ng kasalukuyang administrasyon para sa publiko? Mahirap na suriin ang mga SONA ng pangulo. Sinisikap nitong maging iba kung hindi kabaligtaran ng pagbibigay ng SONA ng nakaraang administrasyon. Laging mahinahon at hindi pala-away ang tinig ng Presidente. Mahusay ang Ingles nito ngunit, mahirap lang hanapin ang lalim at laman ng kanyang sinasabi.

Sa huli, sa dinami-dami ng mga nagdaang presidente at ang kani-kanilang SONA, ano ang kapansin-pansin? Hindi ba ang “fashion show” ng mga kababaihang naka-terno at ang kalalakihang naka-barong? Meron pang nagsaliksik kung magkano ang ginastos sa pagkain pagkatapos ng SONA. Umuugong ang halagang P20 milyon habang mabilis namang nagpaliwanag ang isang mambabatas na hindi lang pagkain ang nakapaloob dito kundi ang seguridad din na napakahalaga sa anumang SONA.

Ano ba ang mahalaga sa SONA? Damit, pagkain, seguridad, kumpas at hampas ng pananalita. Ano nga ba talaga ang SONA? Sa puntong ito, tanong nga ng marami ang so ano? SONA, ano na? 

Panahon na rin siguro para alamin at bantayan ng mamamayan kung ano ang mangyayari at kung matutupad ang lahat ng ipinangako ng nakaupong presidente.

Mga inaasahan ng Pinoy, natumbok sa SONA

ni Bong Revilla @Anak ng Teteng | July 24, 2024

Umani ng 116 na palakpak ang State of the Nation Address (SONA) ni Pangulong Ferdinand “Bongbong” Marcos (PBBM) noong nakaraang Lunes dahil sa kabuuan ay natumbok niya ang lahat ng inaasahan ng ating mga kababayan na kanyang tutugunan. Humantong pa nga sa pagbibigay ng standing ovation ng lahat ng mga nagsidalo bilang pagpapakita ng positibong pagtanggap.

Nakakahanga ang naging SONA dahil sa pagiging komprehensibo nito sa pag-uulat ng mga nagawa ng pamahalaan, pati na ang mga konkretong plano na sama-sama pa nating tatahakin. Kapuri-puri lalo ang naging panimula ng SONA na nagdiin sa importansya ng presyo ng bigas at pagkain dahil kinikilala nito na hindi magiging lubos ang anumang progreso na ating makakamtan kung kumakalam naman ang sikmura ng ating mga kababayan.

Lahat naman ng mga nabanggit ko na expectations sa SONA, lumabas at nabigyang-diin. Sa pagpapababa ng presyo ng bilihin, food security, pagsasaayos ng sahod at trabaho, pagsusulong ng katarungang panlipunan, at patungkol sa ating pambansang seguridad, lahat ‘yan inilatag ni PBBM.

Binigyang-diin din ni PBBM ang usapin tungkol sa pagtaas ng presyo ng bilihin at ang sektor ng agrikultura. Tiniyak niya sa mamamayang Pilipino na patuloy na nagtatrabaho ng mabuti ang gobyerno para tugunan ang kanilang mga pangangailangan. Inisa-isa ng Pangulo ang mga programa ng pamahalaan para palakasin ang agrikultura at pataasin ang pagiging produktibo nito. 

Masarap pakinggan na alam at dama ng ating Pangulo ang hirap na pinagdaraanan ng ating mga kababayan gaya ng patuloy na hamon sa presyo ng pangunahing bilihin. At alam din natin na pangunahing problema talaga ang nararanasang kagutuman sa marami nating mga kababayan. Kaya nakakapanatag na ipinamalas ni PBBM ang malalim na pag-unawa niya sa isyung ito kung kaya’t alam niya na lunas ang pagpapatibay sa sektor ng agrikultura upang maibsan ang gutom.

Pati ang labor sector natin, wagi sa mga natamasa na tagumpay ng pamahalaan nitong nagdaang taon. Tumaas ang employment rate at bumaba naman sa all time low ang underemployment. Numbers don’t really lie kaya masaya ako sa naabot na ito. Dagdag pa natin ang mga naging umento sa minimum wage sa lahat ng rehiyon sa bansa kasama ang BARMM na binanggit din ng Pangulo. Isinaad sa SONA na tumaas ang employment rate patungong 95.5% at bumaba naman ang underemployment mula 11.7% noong Mayo 2023 patungong 9.9% ngayon. Ito na ang pinakamababa simula taong 2005. 

Ikinatuwa rin natin ang pagbanggit ni PBBM sa Kabalikat sa Pagtuturo (KaP) Act na ako mismo ang may-akda at nag-sponsor. Ang nasabing batas na nagtaas at nag-institutionalize ng teaching allowance ng mga guro sa pampublikong paaralan ang naging bandera ng mga programa ni PBBM para sa mga guro sa kanyang SONA.

Siyempre, napag-usapan na rin lang ang mga dagdag benepisyo, bilang chairperson ng Senate Committee on Civil Service, Government Reorganization and Professional Regulation, labis kong pinasasalamatan si PBBM sa kanyang anunsiyo para itaas ang suweldo ng mga kawani ng ating gobyerno. Government workers deserve this very much. Sila ang backbone ng pamahalaan. At personal kong sisikapin na agaran itong maisabatas.

Humanga naman tayo sa naging postura at naging mga pahayag ni PBBM patungkol sa West Philippine Sea at sa tuluyan ng pagbabawal sa Philippine Offshore Gaming Operators (POGOs) sa bansa.

You always save the best for last. Kaya sobrang palakpakan ang mga tao kahapon at nagsitayuan pa. Napakatapang ng sinabi ng Pangulo at walang Pilipinong nagmamahal sa bayan ang hindi madadala, “The Philippines cannot yield. The Philippines cannot waiver”. Sapat ang mga salitang ito para madamang ipaglalaban natin ang West Philippine Sea dahil atin ito.

And the grandest of it all, total ban on POGO. The President knows what is best for the Filipino people. He knows how to protect the country. And we applaud him for leading our nation. Mapalad tayo at mayroon tayong pangulong tulad ni PBBM. Panalo ang sambayanang Pilipino.

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com

Mga sangkot sa droga.. 3 Generals at 15 Colonels, out na — P-BBM

ni Mylene Alfonso @News | July 26, 2023

Tinaggap na ni Pangulong Ferdinand Marcos, Jr., ang resignasyon ng 18 opisyal ng Philippine National Police (PNP) na umano'y sangkot sa illegal drug activities base sa rekomendasyon ng National Police Commission Ad Hoc Advisory Group na nag-imbestiga sa integridad ng mga Third Level Officers.

Una nang inanunsyo ng Pangulo sa kanyang State of the Nation Address na tatanggapin niya ang resignasyon ng mga sangkot sa kapulisan sa ilegal na droga.

Base sa isang liham, ipinaalam ni PNP Chief Benjamin Acorda, Jr., na nagsagawa ng masusing imbestigasyon ang Ad Hoc Advisory Group sa umano'y pagkakasangkot ng 953 Third Level Officers hinggil sa aktibidad ng ilegal na droga.

Matatandaang nagsumite ng kanilang courtesy resignation ang 953 opisyal kung saan 935 naman ang hindi tinanggap ang resignasyon.

Kabilang sa 18 opisyal sina PBGen. Remus Balingasa Medina, PBGen. Randy Quines Peralta, PBGen. Pablo Gacayan Labra II, PCol. Rogarth Bulalacao Campo, PCol. Rommel Javier Ochave, PCol. Rommel Allaga Velasco, PCol. Robin King Sarmiento, PCol. Fernando Reyes Ortega, PCol. Rex Ordoño Derilo, PCol. Julian Tesorero Olonan, PCol. Rolando Tapon Portera, PCol. Lawrence Bonifacio Cajipe, PCol. Dario Milagrosa Menor, PCol. Joel Kagayed Tampis, PCol. Michael Arcillas David, PCol. Igmedio Belonio Bernaldez, PCol. Rodolfo Calope Albotra, Jr., at PCol. Marvin Barba Sanchez.

Nabatid na patuloy na binabantayan ang 18 opisyal at tiniyak na may relief orders ang mga ito at ililipat sa Personnel Holding and Accounting Unit, DPRM (Directorate for Personnel and Records Management).

“In their stead, we will install individuals with unquestionable integrity, who will be effective and trustworthy in handling the task of eliminating this dreaded and corrosive social curse. We cannot tolerate corruption or incompetence in government,” banggit ni Pangulong Marcos.