Ayaw maging kabit kahit nabuntis ng pamilyadong workmate

ni Sister Isabel del Mundo - @Mga kuwento ng buhay at pag-ibig | April 12, 2021

Dear Sister Isabel,

Overseas contract worker ako, biyuda at may tatlong anak. Nabuntis ako ng kasamahan ko sa trabaho, pero may asawa at tatlong anak na siya.

Tama bang umiwas na lang ako sa kanya, magpakalayu-layo at buhayin na lang nang nag-iisa ang anak namin? Ayokong mawasak ang pamilya niya dahil sa akin. Gayundin, ayokong maging kabit niya habambuhay at makihati sa kanyang pagmamahal. Tama ba ang pasya ko?

Gumagalang,

Gertrudes

Sa iyo, Gertrudes,

Sa aking palagay, tama ang iniisip mo. Makabubuting lumayo ka na lamang sa lalaking nakabuntis sa iyo sa dahilang may asawa mga anak na siya. Kung nabuntis ka niya sa kabila ng may pamilya na siya, may posibilidad na makabuntis ulit siya ng iba, kaya huwag mo nang hayaang humantong pa sa ganu’n ang relasyon n’yo.

Lahat tayo ay nagkakamali sa buhay, subalit lahat din ay may pagkakataon na itama ang kanyang pagkakamali at lumagay sa tamang landas ng buhay.

Humingi ka ng tawad sa Diyos at hingin ang kanyang tulong at patnubay. Bumalik ka sa iyong mga magulang at mamuhay nang tahimik. Batid kong walang ibang makakaunawa sa iyo kundi ang mga magulang mo. Huwag kang mag-alala dahil nararamdaman kong makakaraos ka sa problemang napasukan mo.

Paalala, huwag na huwag mong ilalaglag ang bata sa sinapupunan mo dahil regalo ng Diyos sa iyo ang batang ‘yan. ‘Ika nga, every child being born is a gift from God. They are children of God. Instrumento lamang ang sinapupunan mo, kumbaga, ginamit lamang ito upang isilang ang isang bata na nakaprograma na sa mundo ang buhay na sasapitin, kung saan Diyos lamang ang nakaaalam at ito ay para sa sangkatauhan. Sana’y maunawaan mo ang ibig kong sabihin. Sumaiyo nawa ang pagpapala ng Diyos na dakila.

Matapat na sumasaiyo,

Sister Isabel del Mundo

Na-inlab sa dyowa ng BFF, worried mabuking

ni Sister Isabel del Mundo - @Mga kuwento ng buhay at pag-ibig | April 07, 2021

Dear Sister Isabel,

Sana ay matulungan n’yo ko sa idudulog kong problema sa inyo. Umiibig ako sa boyfriend ng bestfriend ko. Noong una, hindi ko naman siya pinapansin, subalit nitong huli, naramdaman ko na umiibig ako sa kanya at siya ay ganundin sa akin.

Madalas, ako ang chaperon ng bestfriend ko kapag kakain kami sa labas dahil gusto niya na palagi akong kasama. Alam niyang bihira akong lumabas ng bahay para makipag-bonding sa kaibigan. Sa dalas ng aming paglabas-labas kasama ang boyfriend niya, parang sa akin nabaling ang pagtingin nito. Selosa ang bestfriend ko at kahit walang kabagay-bagay, sinisita niya ang boyfriend niya hanggang sa tuluyan nang masagad ang pasensya nito.

Ako ang madalas na namamagitan sa tuwing sila ay nag-aaway hanggang napansin kong nabaling sa akin ang pagmamahal ng boyfriend niya habang ako ay ganundin.

Ano ang gagawin ko? Hindi ko na maatim na kimkimin sa aking puso ang aking damdamin. Feeling guilty din ako sa bestfriend ko dahil sa mga nangyayari.

Gumagalang,

Jessica ng Kawit Cavite

Sa iyo, Jessica,

Sadyang mapagbiro ang tadhana dahil may mga bagay na hindi natin maiiwasan. Sa nakikita at nararamdaman ko, kayo mismo ng boyfriend niya ang magkapalaran kaya tadhana na mismo ang gumagawa ng paraan para ibaling ng boyfriend niya sa iyo ang pagmamahal niya sa bestfriend mo.

‘Ika nga, walang lihim na hindi nabubunyag. Sa susunod na isama ka ng bestfriend mo na kumain sa labas kasama ang boyfriend niya, unti-unti ka nang umiwas nang sa gayun makapag-isip siya. Sa kabilang dako, kapag napansin niya na matabang na ang pagtingin sa kanya ng boyfriend niya at halos wala nang panahon sa kanya, unti-unting mawawala ang pagmamahal niya rito at tatanggapin niyang hindi sila ang magkapalaran hanggang sa tuluyan na itong makipaghiwalay.

Pana-panahon ang lahat, kaya sa takdang panahon, natitiyak ko na ang itinakda ay itinakda na at kayo ng boyfriend niya ang magkakatuluyan.

Ang bestfriend mo naman ay matatagpuan ang itinakda ng kapalaran sa kanya na magdudulot ng kaligayahang inaasam-asam niya.

Matapat na sumasaiyo,

Sister Isabel del Mundo

Takot mabuking na may iba nang pamilya

ni Sister Isabel del Mundo - @Mga kuwento ng buhay at pag-ibig | April 05, 2021

Dear Sister Isabel,

Matagal nang gumugulo sa aking isipan ang sitwasyong napasukan ko. Hindi alam ng asawa ko na may kinakasama ako sa Visayas at may isa akong anak sa kanya. Nadedestino ako sa malalayong lugar, kaya nagawa kong matukso sa iba. Mabait ang asawa ko at may tatlo kaming anak na puro babae, tapos na sila ng pag-aaral at nasa mabuti nang kalagayan.

Ang pangalawang babae sa buhay ko ay bata pa at may isa kaming anak na 2-anyos. Palagay ko ay nakakahalata na ang misis ko dahil madalang na akong umuwi sa kanya.

Ano ang mabuti kong magagawa, ipagtapat ang lihim ko o hayaan nang siya mismo ang makatuklas nito? Baka magkagulo kung malalaman ng misis ko ang lahat ng ito. Umaasa akong mabibigyan n’yo ng karapat-dapat na payo ang problemang idinudulog ko sa inyo.

Gumagalang,

Rod ng Cebu

Sa iyo, Rod,

Makabubuting sa bibig mo na mismo manggaling ang lahat. Ihanda mo ang iyong sarili sa anumang maaaring maganap kapag ipinagtapat mo na ito sa misis mo. Humingi ka ng tawad at magpakumbaba. Sa umpisa ay talagang masakit kapag nalaman ng misis mo ang iyong sikreto, subalit tulad ng sabi mo, mabait ang asawa mo, kaya sa palagay ko ay mauunawaan niya ang lahat. Makabubuting sabihin mo na rin sa kabit mo na may sarili kang pamilya at mas priority mo sila. Mangako ka na tuloy pa rin ang sustento mo sa kanila, lalo na sa anak n’yo. Bata pa ang kabit mo, kaya marami pa siyang makikilala na papalit sa iyo. Harapin mo nang mahinahon ang mga susunod na mangyayari. Gayundin, manalangin ka nang taimtim sa Diyos na gabayan ka sa napasukan mong sitwasyon dahil natitiyak kong mailalagay mo sa ayos ang lahat at sana ay matuto ka na sa iyong pagkakamali at huwag mo na itong ulitin pa.

Alalahaning sinumang lumalagay sa tamang landas ng buhay ang siyang pagpapalain. Subalit ang mga gumagawa ng labag sa kalooban ng Diyos ay magkakamit ng kaparusahang walang hanggan.

Nawa’y nabigyan ko ng kaliwanagan ang iyong isipan. Hanggang dito na lang, pagpalain ka nawa ng Dakilang Lumikha.

Matapat na sumasaiyo,

Sister Isabel del Mundo