Asawang nasa ‘Pinas, balak nang iwan para sa BF na foreigner

ni Sister Isabel del Mundo - @Mga kuwento ng buhay at pag-ibig | April 22, 2021

Dear Sister Isabel,

Nagtatrabaho ako ngayon sa Dubai at may boyfriend akong foreigner dito, pero hindi niya alam na may asawa na ako sa Pilipinas. Gayunman, hindi kami kasal ng asawa ko, pero napamahal na sa akin ang dyowa kong foreigner.

Hindi alam ng asawa ko na may karelasyon ako rito at balak kong huwag nang bumalik sa Pilipinas. Sasama na ako sa BF kong foreigner at maninirahan na sa kanilang bansa dahil wala naman kaming anak ng asawa ko sa Pilipinas. Nawala na nang tuluyan ang pagmamahal ko sa kanya dahil nabaling na ito sa boyfriend ko ngayon.

Masaya ako sa piling niya, ano ang dapat kong gawin? Umaasa akong mabibigyan n’yo ng kaukulang payo ang problemang gumugulo ngayon sa isip ko.

Gumagalang,

Marilou

Sa iyo, Marilou,

‘Yan ang mahirap kapag ang mag-asawa ay nagkalayo o nagtrabaho sa abroad ang isa dahil kadalasan ay kumakaliwa ang isa. Kung hindi ka naman kasal sa asawa mo at pakiramdam mo ay wala ka nang pagmamahal sa kanya, tapatin mo na siya. Sabihin mo ang katotohanan na may karelasyon ka na r’yan sa Dubai. Gayundin, humingi ka ng tawad at ihanda ang iyong sarili sa maaaring kahinatnan ng pagsasabi sa kanya ng katotohanan.

Sa totoo lang ay matutuklasan niya rin ang lihim mo, kaya marapat lamang na sabihin mo sa kanya na hangga’t maaga at buti na lang, wala kayong anak na masasaktan at magdurusa sa mga pangyayari. Sa umpisa ay siguradong makakaramdam siya ng sakit sa kanyang kalooban, subalit paglipas ng mga araw, natitiyak ko na matatanggap niya rin ang mga pangyayari at makaka-move on unti-unti. Ipagdasal mo na lang na sana ay makahanap din siya ng babaeng karapat-dapat sa kanya.

Sa kabilang dako, nawa’y maging maligaya ka sa ipinalit mo sa kanya at sana rin ay huwag ka nang umibig pa sa ibang lalaki. Sa pakiramdam ko ay madali kang mapaibig ng mga lalaki, kaya umiwas ka sa kanila at mamuhay nang maayos sa piling ng karelasyon mo ngayon. Hangad ko ang kaligayahan mo at maayos na pamumuhay sa piling ng dyowa mong foreigner.

Matapat na sumasaiyo,

Sister Isabel del Mundo

Ginawang sex slave ng kuya, na-inlab kaya walang palag kahit bawal

ni Sister Isabel del Mundo - @Mga kuwento ng buhay at pag-ibig | April 19, 2021

Dear Sister Isabel,

Hindi ko na alam ang gagawin ko sa aking problema. Lingid sa kaalaman ng aming mga magulang, may ugnayan kami ng kapatid kong panganay. Ginagalaw niya ako at ginagamit sa gabi kapag tulog na ang lahat. Noong una, tinatakot niya ako para hindi magsumbong sa aming mga magulang, pero nitong huli ay parang nasanay na rin ako at hinahanap-hanap ko ang pagniniig namin. Ingat na ingat kaming malaman ng aming mga magulang na may nangyayari sa aming dalawa at umiinom ako ng gamot para hindi mabuntis. Ano ang dapat kong gawin? Parang napamahal na sa akin ang kuya ko. Sana ay mapayuhan n’yo ako para gumaan ang kalooban ko at hindi palaging balisa at kakaba-kaba. Hihintayin ko ang inyong payo.

Gumagalang,

Aida ng Palawan

Sa iyo, Aida,

Sumaiyo nawa ang kapayapaan.

Napakabigat ng napasukan mong sitwasyon at isang napakalaking kasalanan sa mata ng lipunan, lalo na sa mga mata ng Diyos.

Itigil mo na ang kahibangan mo. Gumising ka at huwag maging bulag sa nangyayari sa buhay mo. Ngayon din ay umiwas ka na sa kuya mo at ipaliwanag mo ang hindi magandang kahahantungan ng relasyon n’yo. Ipaunawa mo na kayo ay magkapatid at hindi mag-asawa. Idilat n’yo ang inyong mga mata sa katotohanan. Gayundin, makabubuting lumayo o magtrabaho ka sa ibayong-dagat o malayong lugar kung saan hindi alam ng kuya mo.

Kumbaga, tuluyan ka nang umiwas sa kanya dahil maling-mali ang ginagawa n’yo. Isa pa, matinding parusa ang kapalit niyan na habambuhay n’yong pagdurusahan. Ang magiging anak n’yo ay siguradong hindi magiging normal sa dahilang iisang dugo ang nananalantay sa inyo bilang magkapatid na iisang magulang ang pinagmulan.

Samantala, ang sabi mo ay umiinom ka ng gamot para hindi mabuntis. Naku, lalong masama ‘yan sa iyong kalusugan dahil may side effect ito na posibleng pagdusahan mo habambuhay.

Alam na alam n’yo na mali ang ginagawa n’yo. Ikaw na ang umiwas at lumayo ka. Putulin mo na ang relasyon n’yo ng kuya mo at matakot ka sa parusang kapalit nito. Sa totoo lang, matindi magparusa ang tadhana sa mga maling gawa, kaya gumising ka na. Huwag mo nang hayaang gamitin ka ng kuya mo. Umiwas ka na upang huwag na muling magkasala.

Matapat na sumasaiyo,

Sister Isabel del Mundo

Pamilyadong BF, gusto nang hiwalayan dahil takot mabuking na kabit

ni Sister Isabel del Mundo - @Mga kuwento ng buhay at pag-ibig | April 14, 2021

Dear Sister Isabel,

Matagal nang gumugulo sa aking isipan ang problemang dinadala ko sa kasalukuyan.

Umiibig ako sa isang tao na alam kong may asawa at mga anak na. Nagmamahalan kami at lihim na nagkikita. Gayundin, masaya kami kapag magkasama at halos hindi namin pansin ang mga problemang sasapitin sa sandaling mabulgar ang aming lihim.

Minsan ay naiisip kong huwag nang ipagpatuloy ang aming relasyon dahil may pagkakataong inuusig ako ng aking konsensya. Alam kong kasalanan ito at alam ko ring walang lihim na hindi nabubunyag. Ano ang maaari kong gawin?

Noong mga nakaraang araw, napag-isip-isip ko na lumagay na sa tamang landas ng buhay. Batid ko na makakatagpo ako ng lalaking walang sabit at mamahalin ako kahit malaman niya ang aking nakaraan. Sana ay matulungan n’yo ako at magabayan kung ano ang dapat kong gawin.

Gumagalang,

Arlene ng Roxas City

Sa iyo, Arlene,

Mabuti naman at napag-isip-isip mo na mali ang napasukan mong relasyon. Huwag mo nang hayaan pang lumala ito at mataranta ka sa dapat gawin. Ngayon pa lang, unti-unti mo nang sanayin at pigilan ang sarili mo sa pakikipagkita sa karelasyon mo na may pamilya na. Wala itong mabuting maidudulot sa buhay mo kundi pansamantalang kaligayahan lamang.

Gayundin, mahirap mabuhay nang nakikihati lang sa pagmamahal ng taong iyong minamahal.

Bukod sa katotohanang ito ay mortal na kasalanan, hindi tanggap sa lipunan at lalong hindi tanggap sa mga mata ng Diyos.

Sa simula ay mahirap gawin, subalit sa pagdaan ng mga araw, malalagpasan mo rin ang lungkot na maidudulot nito sa puso mo. Kumilos ka na ngayon at lumagay ka na sa tamang landas bago pa mahuli ang lahat. Alalahaning ang pagsisisi ay palaging nasa huli. Layuan mo na ang karelasyon mo at mamuhay nang naaayon sa tamang landas ng buhay at natitiyak ko na kapag nagawa mo ito, mapasasaiyo ang mga pagpapala ng Dakilang Lumikha.

Matapat na sumasaiyo,

Sister Isabel del Mundo