Naanakan ng ka-work sa abroad, gustong bawiin ang anak sa guy

ni Sister Isabel del Mundo - @Mga kuwento ng buhay at pag-ibig | May 03, 2021

Dear Sister Isabel,

Binabagabag ako ng aking konsensiya dahil sa isang lihim na ako at ang aking pamilya ang nakakaalam. Naanakan ako ng kasamahan ko sa trabaho at naganap ito sa abroad kung saan kami nagkaibigan. Mabait siya at mahal na mahal ako sa kabila ng katotohanang may asawa at dalawang anak siya sa Pilipinas. Na-terminate kami at pinauwi, kaya isinama niya ako sa probinsiya niya sa Mindanao at doon ko isinilang ang anak namin. Hindi ko akalain na nananakit pala siya, lalo na ‘pag alipin ng bawal na gamot.

Dahil dito, nagbalak akong takasan siya at umuwi sa probinsiya namin. Nahuli niya ako kaya hindi natuloy ang pagtakas ko. Kalaunan ay pumayag na siya na umuwi ako kasama siya at ang anak namin. Nagkasundo kami na magsama nang maayos alang-alang sa aming anak, subalit umiral ang masama niyang ugali.

Hindi niya napipigilan na bugbugin ako dahil patuloy pa rin pala siyang tumitikim ng bawal na gamot. Nang malaman ng mga magulang ko, itinago nila ako at inilayo sa kanya. At para tuluyan nang makaiwas, nag-apply ako ulit sa abroad. Biglang dumating sa bahay ang asawa ko at nagmamakaawa at gustong makita ang anak namin, kasabay ng pangako na magbabago siya. Katunayan nga, kalalabas niya lang daw sa rehabilitation center, naniwala naman ako at sinabi ang plano kong pag-a-abroad. Pumayag siya sa kondisyong sa kanya iiwanan ang aming anak at pumayag din ako.

Hindi nagtagal, natanggap ako sa abroad. Palagi akong nagpapadala ng pera sa anak ko, ngunit kalaunan ay naputol ang contact namin. Inilayo niya ang anak ko at nag-migrate sila ng dati niyang asawa sa ibang bansa. Tanggap ng asawa niya ang anak namin at itinuring na parang tunay niyang anak.

Ano ang gagawin ko para mabawi ang anak namin? Nag-research ako sa Facebook upang mahanap ang anak ko, subalit nabigo ako at hindi ko matagpuan ang kinaroroonan nila. Ayokong lumaki ang bata na hindi ako ang kinikilalang ina.

Gumagalang,

Elsa ng UAE

Sa iyo, Elsa,

Sa aking palagay ay makabubuting hayaan mo na muna ang iyong anak sa ama niya. Tutal tanggap naman pala ng asawa niya ang bata at itinuturing na tunay na anak, natitiyak kong maganda ang magiging kinabukasan niya sa piling ng kanyang ama at kinikilalang pamilya. Sa kabilang dako, kung kukunin mo ang bata ay baka mapabayaan mo siya at hindi magabayan dahil nagtatrabaho ka sa abroad.

Isa pa, tiyak na iiwan mo lang ang anak mo sa pamilya mo na hindi ka naman nakakasiguro na hindi nila ito mapapabayaan. Sa katunayan nga, dapat kang magpasalamat dahil sarili niyang ama ang nag-aalaga sa kanya. Nakasisiguro ka na hindi pababayaan ang bata at mabibigyan ito ng magandang kinabukasan. Ipagpasa-Diyos mo na lang ang lahat dahil sa takdang panahon, hahanapin ka rin ng anak mo at mauunawaan niya ang mga pangyayari.

Matapat na sumasaiyo,

Sister Isbel del Mundo

Ipon ng mister na OFW na pang-negosyo, naubos sa scam

ni Sister Isabel del Mundo - @Mga kuwento ng buhay at pag-ibig | April 28, 2021

Dear Sister Isabel,

Ang asawa ko ay isang OFW at sa akin niya ipinadadala ang lahat ng suweldo niya. Matagal na siya sa abroad kaya umaasa siyang pag-uwi nya, marami na kaming ipon para makapagsimula ng bagong negosyo. Ang problema ay nabiktima ako ng budol-budol. Nagtiwala ako dahil kasama niya ang hipag ko nang pumunta sila sa bahay para mag-alok ng negosyo. Naengganyo ako sa matatamis niyang pangungusap at agad na naniwala, kaya nagbigay ako ng malaking halaga bilang puhunan.

Sa umpisa ay kumikita ang negosyong sinimulan namin, kaya naman nang humingi pa ng karagdagang puhunan para mas mapalawak ang negosyo, agad naman akong nagbigay. Hindi ko akalain na biktima na pala ako ng pyramiding, isang ilegal na gawain kung saan ang nakikinabang lang ay ‘yung taong pumunta sa bahay upang kumbinsihin akong sumali sa negosyo niya. Huli na nang matuklssan ko at ubos na ang naiipon ko sa kakadagdag tuwing hihingi ‘yung taong nambiktima sa akin.

Malapit nang umuwi ang asawa ko at hindi ko alam ang gagawin dahil tiyak na magagalit siya ‘pag nalaman niyang wala na kaming ipon para gawing puhunan kahit para sa isang maliit na negosyo lamang. Natatakot akong ipagtapat sa kanya ang nagawa ko dahil tiyak na magagalit siya. Hirap na hirap na ang kalooban ko, gayundin, hindi ako makatulog sa kaiisip kung ano ang gagawin para mabalik sa akin ang perang naipon namin.

Sana ay mapayuhan n’yo ako kung ano ang dapat kong gawin. Nawawala ‘yung taong nambiktima sa akin at hindi ko na siya makita. Hihintayin ko ang inyong kasagutan sa lalong madaling panahon.

Gumagalang,

Edna ng Valenzuela

Sa iyo, Edna,

Sa panahon ngayon ay sadyang marami ang tinatawag na budol-budol, lalo na sa pagnenegosyo at nakakalungkot lang na isa ka sa nabiktima. Gayunman, makabubuting ipagtapat mo na sa asawa mo ang nangyari kaysa naman pag-uwi pa lang niya ito matuklasan.

Natitiyak kong sa umpisa lang ang galit niya at huhupa rin ito at maiisip na biktima ka lang ng mga taong manloloko at mapagsamantala sa kapwa. Isa pa, maiisip niya na gusto mo lang madagdagan pa ang inyong puhunan kaya mo nagawang magtiwala sa taong nag-alok sa iyo ng negosyo. Sa susunod ay huwag ka basta-bastang magtitiwala kahit pa sabihing hipag o kamag-anak ang back up ng lumalapit sa iyo.

Maging matalino ka at huwag agad papatol at maniniwala. Makabubuting kayo na lang mismo ng asawa mo ang magtulungan sa negosyong inyong bubuksan. Humingi kayo ng payo sa dati nang eksperto sa pagnenegosyo para magabayan kayo.

Iwasang magtiwala sa iba na hindi n’yo naman lubusang kilala. Magsilbing leksiyon nawa sa iyo ang mga pangyayari. Gayundin, huwag mo nang hayaang masundan pa ito, bagkus, maging alerto at mapagmatyag ka sa iyong kapaligiran at kapwa. Talasan mo ang iyong pakiramdam at mag-ingat palagi. Naniniwala ako na malalagpasan mo ang iyong problema at mauunawaan ka ng asawa mo pagdating niya sa Pilipinas.

Matapat na sumasaiyo,

Sister Isabel del Mundo

OFW na mister, dapat nang hiwalayan dahil wa’ ‘wenta ang pagsasama kung pareho nang may iba

ni Sister Isabel del Mundo - @Mga kuwento ng buhay at pag-ibig | April 26, 2021

Dear Sister Isabel,

Bagong kasal kami ng asawa ko at masayang namumuhay kahit kami ay mahirap lang. Mataas ang pangarap namin kaya napagkasunduan naming isa sa amin ang mag-abroad upang makaahon sa hirap at matupad ang aming mga pangarap. Sabay kaming nag-apply sa abroad at kung sino ang maunang matanggap, siya ang unang aalis.

Mabilis ang mga pangyayari, tinawagan agad ang asawa ko sa ina-apply-an niya at hindi nagtagal, tuluyan na siyang umalis upang magtrabaho sa abroad. Sa umpisa ay walang tigil ang aming communication, subalit dumating sa punto na bihira na siyang mag-video call o mag-chat at napag-alaman ko na mayroon na pala siyang kinakasama sa abroad at labis akong nasaktan, pero tiniis ko na lang ang sakit na nadama ko hanggang sa tuluyan na siyang hindi nakipag-usap sa akin.

Naputol na ang aming communication hanggang isang araw ay dumating bigla ang kanyang ina sa bahay namin at gustong papirmahan ang divorce paper na ipinadala ng asawa kong nasa abroad. Hindi ko pinirmahan kahit ako ay mayroon na ring iba. Nagmamahalan kami at namumuhay nang maligaya sa kasalukuyan.

Ano sa palagay n’yo, pipirmahan ko na ba divorce paper namin? Hihintayin ko ang inyong kasagutan.

Gumagalang,

Julie ng Batangas

Sa iyo, Julie,

Sa totoo lang, napakadaling pagpasyahan ang problema mo. Ngayong may kani-kanya na kayong mahal ng asawa mo, marapat lamang na ibigay mo na ang kalayaan niya upang ikaw ay mapanatag na rin. Tulad ng sabi mo, maligaya ka naman sa piling ng bago mong mahal, habang ang asawa mo naman ay nakatagpo na rin ng katapat niya, makabubuting pirmahan mo na ang divorce paper n’yo nang sa gayun ay makapagpakasal na rin kayo ng dyowa mo. Pakawalan n’yo na ang isa’t isa upang pareho kayong lumigaya.

Huwag kang manghinayang sa nakasanayang dapat siyang mapasaiyo dahil ikaw ang legal na asawa. Pabayaan mo na ‘yun dahil materyal na bagay lang ‘yun na madali ring maglalaho at mawawala. At sabi mo nga, mahirap lang kayo kaya siya nag-abroad. Samakatuwid, wala ka namang malaking kabuhayan na dapat panghinayangan. Ang mahalaga ay ang kapanatagan ng isipan at kaligayahan sa buhay na mahirap makamtan kung ganyang ayaw mo pa siyang bigyan ng kalayaan. Pirmahan mo na ang divorce paper n’yo at magpakasal na kayo ng karelasyon mo

ngayon.

Natitiyak kong kapwa kayo liligaya kung gagawin mo ‘yan, kaya ano pa ang hinihintay mo? Huwag ka nang magpatumpik-tumpik pa at pirmahan mo na sa lalong madaling panahon ang divorce paper n’yo. Hangad ko ang kaligayahan n’yo sa piling ng napili n’yong mahalin sa buhay.

Matapat na sumasaiyo,

Sister Isabel del Mundo