Single mom na feeling isinumpa dahil sa dami ng problema

ni Sister Isabel del Mundo - @Mga kuwento ng buhay at pag-ibig | June 21, 2021

Dear Sister Isabel,

Ako ay iniwan ng aking asawa at ipinagpalit sa iba. Bakit ganito ang buhay? Sadyang napakalupit. Tindera ako ng mga gulay, inutang ko ang puhunan, pero hindi ko mabayaran dahil mahina ang benta ko araw-araw at palaging natitira at nalalanta ang aking mga paninda.

Tulad ng nabanggit ko, iniwan ako ng aking asawa dahil sa babae, kaya ngayon ay wala akong maaasahan. Sinikap kong palakihin ang aming tatlong anak. Ang panganay ko ay masipag mag-aral pero nagkasakit siya. May cyst siya sa kaliwang dibdib. Graduation pa naman bago magka-pandemic, pero hindi siya nakatapos dahil sa dami ng kanyang absent. Hirap na hirap na ako at parang isinumpa ako ng tadhana dahil puro hirap ang dinaranas ko.

Isa pa, may sakit ang nanay ko na cancer at siya ay matanda na, ako rin ang tumutulong sa kanya. Nagtataka ako kung bakit ganito ang buhay ko? Napapansin ko rin itong mga tindera ng gulay na katabi ko na maraming bumibili, pero sa akin ay konti lang.

Ano ba itong buhay na sinapit ko? Tulungan at payuhan n’yo ako para maglubag ang aking kalooban. Minsan, naiisip ko nang wakasan ang aking buhay.

Gumagalang,

Carmen ng Obando, Bulacan

Sa iyo, Carmen,

Labis akong nalungkot nang mabasa ang iyong mga problema. Sadyang ang buhay ng tao ay dumaraan sa matitinding pagsubok. Patay lang ang walang problema, ngunit buhay ka pa at patuloy na naglalakbay sa mundong ito. Magpasalamat ka at malakas pa ang iyong katawan. Kung tutuusin, mapalad ka kung ikukumpara sa mga may kapansanan tulad ng mga bulag, pipi, bingi at pulubi na patuloy na nakikibaka sa buhay nang walang reklamo. Sila pa nga ang huwaran ng iba dahil ginagamit nila ang talento sa pagkanta, pagtugtog ng gitara at masayang ibinabahagi ito sa kanilang kapwa. Oh, hindi ba higit kang mapalad kaysa sa kanila?

Simple lang ang buhay, kaya maging mabuti ka sa iyong kapwa. Malinis ang kalooban, walang halong inggit, pagmamayabang, pagkukunwari at higit sa lahat, dapat ay palaging nagdarasal sa Diyos Amang Kataas-taasan na siyang may likha sa lahat ng nilalang. Sa palagay ko ay nakakalimot kang magdasal at hindi nakakapagsimba tuwing Linggo. Taimtim na panalangin nang bukal sa puso ang isang sangkap para pagpalain ka ng Diyos, ilayo sa kapahamakan at bigyan ng masaganang pamumuhay.

Mula ngayon, sama-sama kayong magdasal ng anak mo bago matulog at siguraduhing magsimba tuwing Linggo. Magpasalamat kayo sa Diyos sa buhay na ipinagkaloob Niya. Mag-alay ka rin kahit kaunti tuwing magsisimba ka at makikita mo na doble ang balik ng halagang inalay mo nang bukal sa loob. Gayundin, palagi kang tumahak sa tamang landas ng buhay at iwasan ang mga maling gawain na alam mong hindi kalugod-lugod sa Diyos. Inoobserbahan ka lang ng langit. Dumaraan ka sa mga pagsubok na sa sandaling malagpasan mo, buhos-buhos na biyaya ang mapasasaiyo. Walang permanente sa mundo, ang lahat ay dadaan at lilipas. Gayundin, lahat ng problema ay may kalutasan. Gamitin mo ang iyong talento at tamang kaisipan upang malagpasan mo ang mga pagsubok. Alalahanin mo na hangga’t mayroong lakas, may gintong silahis ang araw ng bukas. Sumaiyo nawa ang mga pagpapala at mga biyaya ng Dakilang Lumikha sa susunod na mga araw.

Sumasaiyo,

Sister Isabel del Mundo

#Sister Isabel del Mundo #SisterIsabeldelMundo

Pamilya at mga kaibigan, tutol sa pagpapakasal ng 67-anyos na biyuda

ni Sister Isabel del Mundo - @Mga kuwento ng buhay at pag-ibig | June 17, 2021

Dear Sister Isabel,

Sa edad na 67, ako ay biyuda na pero sa totoo lang, mukha akong bata pa at marami pang na-a-attract sa akin na mas bata at halos ka-edad lang ng anak ko. Ang problema ay nararamdaman ko na umiibig na naman ako at halos kalahati ng edad ko ang lalaking iniibig ko. Gayunman, kapwa kami nagmamahalan at balak na niya akong pakasalan. Pero tutol ang mga anak ko at halos lahat ng mga kaibigan at kamag-anak ko ay ganundin at hindi sang-ayon na mag-asawa pa akong muli.

Isa pa, nagbanta ang mga anak ko na tuluyan na nila kong itatakwil bilang ina kapag nagpakasal ako sa lalaking napupusuan ko dahil masyadong bata at halos anak ko na. Nakakahiya raw sa aming mga kaanak at hindi sila naniniwala na mahal talaga ako ng lalaking ‘yun. Sinasabi nilang luluha lang ako at siguradong hindi magtatagal ay papalitan ako ng mas bata, sexy at mahusay sa kama. Bakit kaya ganu’n na lang kung manghusga ang mga tao?

Ano ang dapat kong gawin? Nakatakda na ang kasal namin, pero magulong-magulo ang isip ko at hindi malaman ang gagawin. Sana ay mabigyan n’yo ako ng nararapat na payo para sa kalutasan ng problema kong ito.

Gumagalang,

Donita ng Pasig

Sa iyo, Donita,

Nasa hustong edad ka na para magpasya sa sarili mo, kaya kung ano makapagpapasaya sa iyo, gawin mo. Huwag mong intindihin ang mga nakapaligid sa iyo na hindi nakauunawa sa iyong nararamdaman. Kailanman ay hindi nila maibibigay ang kaligayahan ng dalawang pusong nagmamahalan at wala silang karapatan na hadlangan ka sa nalalapit mong pag-aasawa. Maging ang mga anak mo ay walang karapatan kung ano ang gusto mong gawin sa kasalukuyan.

Nagampanan mo na ang iyong tungkulin bilang ina sa kanila at maayos mo silang napalaki. Nagsumikap ka para mabigyan sila ng magandang kinabukasan, kaya panahon na para hanapin mo naman ang sarili mong kaligayahan. Sundin mo tinitibok ng puso mo at pakasalan ang lalaking nagmamahal sa iyo at maghahatid sa iyo sa altar nang walang pasubali.

Gayundin, huwag mong pansinin ang sasabihin ng mga tumututol sa pag-iibigan n’yo. Humayo ka at harapin ang masagana, mapayapa at maligayang buhay sa piling ng lalaking pakakasalan mo. Natitiyak ko na sa pagdaan ng mga araw ay maliliwanagan din ang isip ng mga anak mo at ng iba pang tao na tumututol sa muli mong pag-aasawa. Ipanatag mo ang iyong isipan at magpasalamat sa Diyos dahil sa kabila ng edad mo ay mayroon pang lalaking inilaan sa iyo ang tadhana na handang pakasalan ka at samahan sa hirap at ginhawa.

Sumasaiyo,

Sister Isabel del Mundo

Problemado sa away ng pamilya sa lupa

ni Sister Isabel del Mundo - @Mga kuwento ng buhay at pag-ibig | June 14, 2021

Dear Sister Isabel,

Isa ako sa tagasubaybay ng column mo na Mga Kuwento ng Buhay at Pag-ibig. Ako nga pala si Gertrudes ng Guimaras. May namana akong lupa rito galing sa aking yumaong ama, pero wala kaming katahimikan dahil inaangkin ito ng uncle ko. Hindi na lang namin pinapansin hanggang sa gumamit na siya ng dahas. May dala siyang baril nang pumunta sa bahay at nagbanta na kung hindi namin ibibigay ang kalahati man lang ng lupa ay magkakamatayan na raw.

Dalawang hektarya ang lupang namana ko at may tanim itong mga mangga sa kasalukuyan. Kasama ko ang aking pamilya dahil dito na rin kami nagtayo ng bahay. Bagama’t tinatakot kami ng tiyuhin ko, hindi kami nagpapasindak dahil may hawak kaming titulo.

Nang minsang nagbanta na naman siya ay ipina-barangay namin, pero hindi pa rin doon nagwakas ang lahat. Muli siyang pumunta sa bahay at may dalang baril. Ang ginawa ng panganay kong anak ay kinuha rin ang baril niya kaya nagkaputukan pero wala namang tinamaan. Upang hindi mapatay ng anak ko ang uncle ko, lumuwas ng Maynila ang anak ko at doon pansamantalang tumira at magtrabaho.

Ano ang dapat kong gawin para tigilan na ng tiyuhin ko panggugulo sa amin? Sana ay mabigyan n’yo ako ng kaukulang payo.

Gumagalang,

Gertrudes

Sa iyo, Gertrudes,

Makabubuting kausapin n’yo nang mahinahon ang uncle mo at ipaliwanag sa kanya na kayo talaga ang may-ari ng lupa.

Ipakita mo sa kanya ang titulo at kung sakaling hindi pa rin siya tumigil sa kabila ng pakikipag-usap n’yo, tumawag kayo ng nakatatandang kamag-anak na iginagalang niya at siya ang kausapin n’yo upang mamagitan sa inyo.

Kung hindi pa rin siya tumigil sa panggugulo, bigyan n’yo ng kahit maliit na parte ng lupa dahil malaki naman ang namana mo. Sa palagay ko ay papayag naman siya dahil maliwanag na maliwanag, wala siyang karapatan sa lupang inaangkin niya. Wala siyang kahabol-habol kahit magsampa pa siya ng kaso sa hukuman dahil may hawak kang titulo, katibayan na ikaw mismo ang legal na tagapagmana nito.

Huwag ka nang magpatumpik-tumpik pa, pumunta ka sa tiyuhin mo at kausapin mo siya nang mahinahon. Magpasama ka sa kamag-anak n’yo na inirerespeto nya at hindi kayang pahindian. Umaasa ako at dumadalangin na malutas na ang problema mo sa lalong madaling panahon.

Sumasaiyo,

Sister Isabel del Mundo