Bet mag-abroad ulit pero tutol ang mister

ni Sister Isabel del Mundo - @Mga kuwento ng buhay at pag-ibig | August 23, 2021

Dear Sister Isabel,

Dati akong domestic helper sa abroad. May kapansanan ang asawa ko dahil napilay ang isa niyang paa at may apat kaming anak. Nandito ako ngayon sa Pilipinas dahil pinauwi ako ng employer ko bago pa magkaroon ng COVID-19 pandemic.

Hirap na hirap kami ngayon ng pamilya ko kung paano mairaraos ang buhay kaya naisip kong mag-abroad ulit, pero ayaw na akong payagan ng asawa ko. Lumalaki na kasi ang mga bata at naghahanap ng kalinga at pagmamahal ng isang ina. Kaya lang, gutom talaga ang aabutin namin kapag hindi ako bumalik sa abroad. Nagkataon naman na muli akong tinawagan ng dati kong amo at nag-offer ng mas malaking suweldo, basta’t bumalik ako sa kanila.

Ano ang dapat kong gawin at sino ang susundin ko, ang asawa ko ba o ang employer ko sa abroad na nag-offer ng mas malaking suweldo? Naguguluhan ako at hindi ko na alam ang gagawin, kaya sana ay mapayuhan ninyo ako.

Nagpapasalamat,

Belinda ng Roxas City

Sa iyo, Belinda,

Makabubuting sundin mo ang asawa mo. Isa pa, huwag mong iwanan ang mga anak ninyo na lumalaki na at naghahanap ng kalinga at pagmamahal ng isang ina. Napakahalaga ng family bonding kaysa sa anumang bagay dahil hindi ito matutumbasan ng pera. Marami ang nawawasak na pamilya kapag ang ama o ina ay nagtrabaho sa abroad. Nar’yang nagkaroon ng kabit ang isa sa kanila na mas mahal pa sa tunay na asawa. Ano ang nangyari? Wasak na pamilya ang resulta at ang mga anak ay nasira rin ang kinabukasan.

May mas malala pa, inabuso ng sariling ama ang anak habang ang asawa niya ay nasa abroad. Kalimitan pa, nawawalan ng pagmamahal ang mga anak sa ina o ama na nasa malayo para bigyan sila ng magandang buhay. Matabang, walang tunay na pagmamahal o pag-aalala ang mararanasan mo kapag pinili mong lumayo muli upang magtrabaho sa abroad.

Aanhin mo ang pera, kayamanan o kasaganaan kung salat ka naman sa tunay na pagmamahal? Hindi mo naman masisisi ang mga anak mo kung hindi mo maipadama ang pagmamahal ng isang ina na hinahanap nila. Wala kasing pagkakataon na magkasama kayo nang matagal dahil bakasyon lang ang nangyayari tuwing uuwi ka sa Pilipinas. Huwag mo nang hayaang maranasan mo ‘yun dahil luluha ka ng bato ‘pag nangyari ‘yun at ikaw pa ang sisisihin ng mga anak mo dahil iniwan mo sila. Kahit ano’ng paliwanag ay hindi nila tatanggapin dahil malabo pa ang pang-unawa nila ngayon. Mararanasan mo na ni kape ay hindi ka man lang maipagtimpla, wala man lang pag-aalala kung may dinaramdam ka o anuman. Walang-wala talaga dahil kani-kanya silang pinagkakaabalahan.

Pagtiyagaan mo na lang dito sa Pilipinas, tutal may asawa ka pa naman. ‘Yun nga lang, may kapansanan siya, pero hindi hadlang upang mabuhay kayo nang maayos at payapa. Ang mag-asawang nagdadamayan sa hirap at ginhawa ay pinagpapala. Maging masipag lang kayo at madiskarte, tiyak na makakaraos kayo at mapagtatapos ninyo ang inyong mga anak.

Sumasaiyo,

Sister Isabel del Mundo

Teenager na apo, super-pasaway kaya problemado

ni Sister Isabel del Mundo - @Mga kuwento ng buhay at pag-ibig | August 22, 2021

Dear Sister Isabel,

Ibig kong ihingi ng payo ang apo ko na ubod ng tigas ng ulo. Nasa abroad ang anak ko na nanay ng batang ito. Biyuda na ang anak ko, habang teenager naman ang apo ko na nag-asawang bigla dahil nabuntis ‘yung babae at inuwi rito sa bahay. Hay naku, Sister Isabel, lalong nadagdagan ang problema ko, ang anak ko ay parang walang balak bumalik dito at kaunti lang ang ipinadadalang pera dahil maliit lang daw ang sahod niya bilang domestic helper.

Wala akong masabi kundi pasaway talaga ang batang ito dahil ayaw makinig ng pangaral.

Pumapasada siya ng tricycle at boundary lang ang ibinibigay sa kanya. Bigla siyang hindi nakauwi at ‘yun pala ay nakakulong na ngayon sa municipal jail namin. Itinuro raw siya ng kasamahang tricycle driver na sangkot sa droga. Hindi ko na malaman ang gagawin dahil manganganak pa itong asawa niya na nasa poder ko. Hintay nang hintay sa kanya ‘yung babae para ipambili ng pagkain ang kita niya sa pagpasada, pero bigla na lang siyang hindi nakauwi.

Ako naman ay matanda na, hinihintay ko lang ang padala ng nanay niya, pero nade-delay din. Hirap na hirap na ako sa sitwasyon ko ngayon. Sana ay mapayuhan ninyo ako ng dapat kong gawin.

Nagpapasalamat,

Lita ng Paco Manila

Sa iyo, Lita,

Sadyang ganyan ang buhay, bahagi na ng buhay natin ang mga problemang kakaharapin at lahat ay may kani-kanyang problema, iba-iba nga lang ng sitwasyon.

Huwag kang panghinaan ng loob dahil ang lahat ng problema ay may solusyon at walang permanente sa mundo, lahat ay dadaan at lilipas. Huwag mong masyadong dibdibin ang problema mo dahil ikaw na rin ang nagsabi na matanda ka na. Pag-iingat lang sa sarili mo ang iyong dapat gawin at baka ikaw ang magkasakit, lalong malaking problema ‘yan.

Tutal, may nanay naman ang apo mo at may asawa na, sila dapat ang gumawa ng paraan. Sabihin mo sa iyong anak ang sinapit ng apo mo, huwag kang maglihim. Lahat-lahat ay sabihin mo at natitiyak ko na siya ang gagawa ng kaukulang solusyon sa katayuan ninyo ngayon.

Tumawag ka rin sa Diyos na may lalang sa ating lahat. Magdasal ka nang taimtim. Baka nakakalimutan mo nang magdasal, kaya dumarating sa buhay mo ang matitinding problema. Taimtim na panalangin ang makakatulong sa iyo. Gagabayan ka ng Holy Spirit sa dapat mong gawin. Gayundin, ipanatag mo ang iyong isipan, mamahinga at manalangin ka. Matulog ka kung kinakailangan para mapanatag ang pagod na isipan.

Kapag magulo kasi ang isip at palaging nag-aalala, hindi makakapasok ang Holy Spirit. Hindi mo maririnig sa iyong konsensya ang dikta ng banal na espiritu para sa kalutasan ng problema mo. Payapain mo ang iyong isipan at taimtim kang magdasal. Sa mga susunod na araw, malulutas na ang problemang gumugulo sa iyong isipan. Diyos ang kikilos, basta’t manalig ka lang nang walang pag-aalinlangan.

Sumasaiyo,

Sister Isabel del Mundo

Labs na labs ang isa’t isa pero tutol ang parents dahil sa magkaibang relihiyon

ni Sister Isabel del Mundo - @Mga kuwento ng buhay at pag-ibig | August 17, 2021

Dear Sister Isabel,

Payapa at panatag ang buhay ko nang dumating ang lalaking nagpatibok ng puso ko. Sa una pa lang naming pagkikita, napakagaan na ng loob namin sa isa’t isa. Mabilis kaming nagka-ibigan at masaya naman kami sa bawat araw na lumilipas. Halos walang pagsidlan ang aming galak kapag magkasama kami, pero ang problema ko ay iba ang relihiyon niya.

Buddhism ang relihiyon ng pamilya niya dahil may dugo siyang Chinese, habang ako naman ay Katoliko at gusto ng mga magulang ko ay sa Catholic church kami magpakasal. Gayunman, ang parents niya ay tutol na tutol ding makapag-asawa siya ng hindi Buddhist.

Ano ang gagawin namin para maikasal at magsama kami sa iisang bubong sa piling ng aming magiging mga anak? Hihintayin ko ang inyong kasagutan.

Nagpapasalamat,

Belinda ng Cubao

Sa iyo, Belinda,

Hindi mo binanggit kung ilan taon na kayo ng boyfriend mo. Pero kung nasa wastong gulang na kayo, walang magagawa ang mga magulang ninyo kung saan ninyo gustong magpakasal, pero siyempre, bilang respeto, dapat ay ipaalam niyo rin ang inyong balak.

Kausapin ninyo sila nang maayos at sabihin nang may halong respeto at pagpapakumbaba ang balak ninyo. Sa panahon ngayon, hindi na gaanong mahigpit ang mga magulang sa bagay na ‘yan dahil ang mahalaga ay nakikita nila na maligaya ang kanilang anak at taos-pusong nagmamahalan.

Kung ano ang mapagkasunduan ninyong dalawa, ‘yun nawa ang mangyari. Kung sa Katoliko o kung sa Buddhism man, pagpalain nawa ang pagsasama ninyo habambuhay. Maging tapat kayo sa isa’t isa at huwag maglilihim kahit katiting. Karapatan ng bawat isa na malaman ang mga bagay sa pagitan ninyong dalawa.

Ang nagsasama nang tapat ay nagsasama nang maluwat. Ibig sabihin, kung mananatili kayong tapat sa isa’t isa, magsasama kayo hanggang sa dulo ng walang hanggan o hanggang kamatayan, mundo man ay magunaw. Panatilihing alive na alive ang init ng inyong pagmamahalan at unawain ang kahinaan ng bawat isa. Alalahaning ang pag-aasawa ay hindi kanin na isusubo at iluluwa ‘pag napaso.

Hanggang dito na lang, sumainyo nawa ang walang hanggang pagpapala at mga biyaya ng Dakilang Lumikha.

Sumasainyo,

Sister Isabel del Mundo